ക്വീൻസ്‌ലൻഡിൽ നാല് പതിറ്റാണ്ടായി കാലാവസ്ഥാ വാർത്തകൾ അവതരിപ്പിക്കുന്ന എബിസി ന്യൂസ് അവതാരക ജെന്നി വുഡ്‌വാർഡിന് സംസ്ഥാനത്തിന്റെ മോസ്റ്റ് ഔട്ട്‌സ്റ്റാൻഡിങ് കോൺട്രിബ്യൂഷൻ ടു ജേണലിസം പുരസ്‌കാരം. ബ്രിസ്‌ബേനിൽ നടന്ന ക്വീൻസ്‌ലൻഡ് ക്ലാരിയോൺ പുരസ്‌കാരച്ചടങ്ങിലാണ് വുഡ്‌വാർഡിനെ ആദരിച്ചത്. പ്രക്ഷേപണ മാധ്യമരംഗത്തെ ശ്രദ്ധേയമായ സംഭാവനകളും വിശ്വസ്തയും ആദരണീയയുമായ വാർത്താ അവതാരകയായി നേടിയ അംഗീകാരവുമാണ് പുരസ്‌കാരത്തിന് അർഹയാക്കിയത്.
1970-കളിൽ ടൂവൂംബയിലെ ചാനൽ 10/4/5a-യിൽ കുട്ടികൾക്കായുള്ള പരിപാടികളും പ്രത്യേക പരിപാടികളും അവതരിപ്പിച്ചുകൊണ്ടാണ് വുഡ്‌വാർഡ് മാധ്യമരംഗത്തേക്ക് കടന്നുവന്നത്. പ്രാദേശിക ചാനലിൽ വാർത്തകളും കാലാവസ്ഥാ വിവരങ്ങളും അവതരിപ്പിക്കുന്ന ചുമതലയും അവർക്കുണ്ടായിരുന്നു. ബ്രിസ്‌ബേനിലെ ചാനൽ 7-ൽ ഹ്രസ്വകാലം പ്രവർത്തിച്ച ശേഷം 1986-ൽ ഓസ്‌ട്രേലിയൻ ബ്രോഡ്കാസ്റ്റിങ് കോർപ്പറേഷനിൽ (ABC) ചേർന്നു. 1987 മുതൽ എബിസി ന്യൂസിന്റെ കാലാവസ്ഥാ അവതാരകയായി പ്രവർത്തിച്ചുവരുന്നു. അന്ന് കാലാവസ്ഥാ ബ്യൂറോയിൽ നിന്ന് ചാർട്ടുകൾ ശേഖരിച്ച് പ്രവചനവിദഗ്ധരുമായി സംസാരിച്ചശേഷം സ്റ്റുഡിയോയിലെത്തി വാർത്ത അവതരിപ്പിക്കേണ്ടിയിരുന്നു. സാങ്കേതികവിദ്യ മാറിയെങ്കിലും കാലാവസ്ഥാ ബ്യൂറോയുമായി ദിവസവും സംസാരിക്കുന്നതും പ്രേക്ഷകരിലേക്ക് ദിവസത്തെ കാലാവസ്ഥാ വിവരങ്ങൾ എത്തിക്കുന്നതും ഇന്നും തുടരുന്നതായി വുഡ്‌വാർഡ് പറഞ്ഞു. കാലാവസ്ഥാ വിവരങ്ങൾ അവതരിപ്പിക്കുമ്പോൾ സാങ്കേതിക പദങ്ങളും ശാസ്ത്രീയ വിവരങ്ങളും പ്രേക്ഷകർക്ക് എളുപ്പം മനസ്സിലാകുന്ന രീതിയിൽ കൈമാറാനാണ് ശ്രമിക്കുന്നതെന്ന് അവർ വ്യക്തമാക്കി. വിശദാംശങ്ങളുടെ ആധിക്യത്തിൽ പ്രേക്ഷകരെ ബുദ്ധിമുട്ടിക്കാതെ എന്താണ് സംഭവിക്കുന്നതെന്ന് മനസ്സിലാക്കിക്കൊടുക്കുകയാണ് ലക്ഷ്യമെന്നും വുഡ്‌വാർഡ് പറഞ്ഞു.
ക്വീൻസ്‌ലൻഡിലെ പ്രശസ്തമായ എക്കാ മേളയിൽ നിന്നുള്ള കാലാവസ്ഥാ റിപ്പോർട്ടുകളും വുഡ്‌വാർഡിന്റെ അവതരണത്തിന്റെ ഭാഗമായി ശ്രദ്ധ നേടിയിട്ടുണ്ട്. മൃഗങ്ങൾക്കിടയിൽ നിന്നുള്ള തത്സമയ റിപ്പോർട്ടുകൾ പലപ്പോഴും അപ്രതീക്ഷിത സംഭവങ്ങൾ നിറഞ്ഞതും രസകരവുമാണെന്ന് അവർ പറഞ്ഞു. പ്രേക്ഷകർ അയച്ചുനൽകുന്ന കാലാവസ്ഥാ ചിത്രങ്ങളും ക്വീൻസ്‌ലൻഡിലെ പ്രകൃതിദൃശ്യങ്ങളും അവതരണത്തിൽ ഉൾപ്പെടുത്തുന്നതും പതിവാണ്. 2024-ൽ പ്രക്ഷേപണ മാധ്യമരംഗത്തെ സേവനങ്ങൾക്ക് വുഡ്‌വാർഡിന് ഓർഡർ ഓഫ് ഓസ്‌ട്രേലിയ മെഡൽ (OAM) ലഭിച്ചിരുന്നു.
എബിസിക്കും പുരസ്‌കാരങ്ങൾ
ക്ലാരിയോൺ പുരസ്‌കാരങ്ങളിൽ എബിസിയിലെ മറ്റ് മാധ്യമപ്രവർത്തകരും അംഗീകാരം നേടി. ടെലിവിഷൻ ക്യാമറാ പ്രവർത്തനത്തിനുള്ള ജോൺ ബീൻ മെമ്മോറിയൽ പുരസ്‌കാരം സ്കോട്ട് കൈൽ നേടി. കാബൂൾച്ചർ ആശുപത്രിയിലെ മെഡിക്കൽ സ്കാനിങ് പിഴവിനെക്കുറിച്ചുള്ള റേഡിയോ റിപ്പോർട്ടിങ്ങിന് അന്റോണിയ ഒ’ഫ്ലാഹെർട്ടിയും ബഹുസാംസ്കാരിക റിപ്പോർട്ടിങ്ങിന് ആഞ്ചലിക്ക സിൽവയും ആദരിക്കപ്പെട്ടു.
ഐവിഎഫ് നടപടികളിലെ പിഴവുകളെക്കുറിച്ചുള്ള റിപ്പോർട്ടിങ്ങിന് ഗ്രേസ് ടോബിനും കിർസ്റ്റൻ റോബും അംഗീകാരം നേടി. പ്രാദേശിക-സമുദായ റിപ്പോർട്ടിങ്ങിന് ടൂവൂംബ ബ്യൂറോയിലെ ഗ്രേസ് നകമുറയും കായിക റിപ്പോർട്ടിങ്ങിന് സൺഷൈൻ കോസ്റ്റ് ബ്യൂറോയിലെ ഓവൻ ജാക്വസും പുരസ്‌കാരം നേടി.
ജോഷ് റോബർട്ട്‌സൺ, ജസ്റ്റിൻ ലാൻഡിസ്-ഹാൻലി, ബാക്ക്ഗ്രൗണ്ട് ബ്രീഫിങ് സംഘം എന്നിവർ ഒരുക്കിയ Dark Reality of Australia’s AI Dream Factory ബിസിനസ്, പോഡ്‌കാസ്റ്റ് വിഭാഗങ്ങളിൽ പുരസ്‌കാരം നേടി. എബിസിയുടെ സ്റ്റോറി ലാബ് സംഘം Deep Time: Tell Me a Story എന്ന കൃതിക്ക് ആദിവാസി-ടോറസ് സ്‌ട്രെയിറ്റ് ദ്വീപ് നിവാസികളുടെ വിഷയങ്ങളിലെ റിപ്പോർട്ടിങ്ങിനുള്ള പുരസ്‌കാരവും Deep Time: Time, Place and Topic Views എന്ന കൃതിക്ക് നവീകരണത്തിനുള്ള പുരസ്‌കാരവും നേടി.