സിഡ്നി: സിഡ്നിയുടെ തെക്കുപടിഞ്ഞാറൻ മേഖലയിലെ ഓസ്ട്രാലിൽ നടന്ന ഹൗസ് പാർട്ടിക്കിടെ രണ്ട് പേർക്ക് കുത്തേറ്റു. ഇരുവരെയും ആശുപത്രിയിൽ പ്രവേശിപ്പിച്ചതായി ന്യൂ സൗത്ത് വെയിൽസ് പൊലീസ് അറിയിച്ചു. സെഫിർ സ്ട്രീറ്റിലെ ഒരു വീട്ടിൽ ആക്രമണം നടന്നതായി വിവരം ലഭിച്ചതിനെ തുടർന്ന് പൊലീസ് സ്ഥലത്തെത്തിയെങ്കിലും പരിക്കേറ്റവരെ കണ്ടെത്താനായില്ല. തുടർന്ന് സമീപത്തെ ബ്രൗൺസ് റോഡിൽ നിർത്തിയിട്ടിരുന്ന ഒരു കാറിനുള്ളിൽ ശരീരത്തിന്റെ മധ്യഭാഗത്ത് കുത്തേറ്റ നിലയിൽ ഒരാളെ കണ്ടെത്തി.
ഇതിനിടെ മറ്റൊരു പൊലീസ് സംഘം മിഡിൽട്ടൺ ഗ്രേഞ്ചിലെ ഫ്ലെച്ചർ സ്ട്രീറ്റിൽ എത്തിയപ്പോൾ, മറ്റൊരു കാറിനുള്ളിൽ തുടയിൽ കുത്തേറ്റ നിലയിൽ രണ്ടാമത്തെ യുവാവിനെയും കണ്ടെത്തി. ഇരുവർക്കും പാരാമെഡിക്കുകൾ പ്രാഥമിക ചികിത്സ നൽകിയ ശേഷം സ്ഥിരതയുള്ള നിലയിൽ ആശുപത്രിയിലേക്ക് മാറ്റി. ആക്രമണം നടത്തിയ വ്യക്തി ആരാണെന്ന് ഇതുവരെ വ്യക്തമായിട്ടില്ല. സംഭവവുമായി ബന്ധപ്പെട്ട് പൊലീസ് ഒന്നിലധികം കുറ്റകൃത്യ സ്ഥലങ്ങൾ (crime scenes) പ്രഖ്യാപിച്ച് അന്വേഷണം ആരംഭിച്ചിട്ടുണ്ട്.