സിഡ്നിയുടെ വടക്കുപടിഞ്ഞാറ് ഭാഗത്തുള്ള ഒരു ഇരുനില വീടിന്റെ മേൽക്കൂര തകർന്നുവീണ് രണ്ട് പേർ മരിച്ചു. ബോവൻ പർവതത്തിലെ ലെഫ്റ്റനന്റ് ബോവൻ റോഡിലുള്ള വീട്ടിലാണ് സംഭവം. പുലർച്ചെ 2 മണിയോടെയാണ് ഇത് സംഭവിച്ചതെന്ന് കരുതപ്പെടുന്നു. അടിയന്തര സംഘങ്ങൾ എത്തുന്നതിനുമുമ്പ് തന്നെ തീപിടിച്ച വീട്ടിൽ നിന്ന് ഒരു പുരുഷനും നാല് കുട്ടികളും രക്ഷപ്പെട്ടിരുന്നു. പുക ശ്വസിച്ചത് കൊണ്ടും ചെറിയ പരിക്കുകൾ പറ്റിയത് കൊണ്ട് അവരെ സ്ഥലത്ത് വെച്ച് തന്നെ ചികിത്സിക്കുകയും പിന്നീട് ആശുപത്രിയിലേക്ക് മാറ്റുകയും ചെയ്തു.
അതേസമയം പുലർച്ചെ 2:00 ഓടെ ലെഫ്റ്റനന്റ് ബോവൻ റോഡിലെ ഒരു വീട് തീപിടിച്ചതായി നിരവധി റിപ്പോർട്ടുകൾ ലഭിച്ചതിനെത്തുടർന്ന് അടിയന്തര സേവനങ്ങൾ സ്ഥലത്തെത്തി. അഗ്നിശമന സേനാംഗങ്ങൾ എത്തുമ്പോൾ, തീ പടർന്ന് മേൽക്കൂര ഉൾപ്പെടെയുള്ള ഭാഗങ്ങൾ തകർന്നു തുടങ്ങിയിരുന്നു. ആ സമയത്ത് കുട്ടികളാണെന്ന് കരുതപ്പെടുന്ന രണ്ടുപേരെ കാണാതായിരുന്നു. തീ വളരെ ശക്തമായതിനാൽ വീട്ടിലേക്ക് കടക്കാൻ കഴിയാതെ വന്നപ്പോൾ പ്രതിരോധ നടപടികൾ സ്വീകരിക്കാൻ അഗ്നിശമന സേനാംഗങ്ങൽ നിർബന്ധിതരായി. അഗ്നിശമന സേനയും രക്ഷാപ്രവർത്തകരും, ഒന്നിലധികം അടിയന്തര യൂണിറ്റുകളുടെ പിന്തുണയോടെ, ഏകദേശം രണ്ട് മണിക്കൂർ കൊണ്ട് തീ നിയന്ത്രണവിധേയമാക്കി. പിന്നാലെ തകർന്ന കെട്ടിടത്തിലേക്ക് സുരക്ഷിതമായി പ്രവേശിക്കാൻ അഗ്നിശമന സേനാംഗങ്ങൾക്ക് കഴിഞ്ഞപ്പോൾ, കാണാതായ കുട്ടികളുടെതാണെന്ന് കരുതുന്ന രണ്ട് മൃതദേഹങ്ങൾ അവശിഷ്ടങ്ങൾക്കിടയിൽ നിന്ന് കണ്ടെത്തി. കൂടുതൽ തിരച്ചിലുകൾക്ക് ശേഷം, വീടിനുള്ളിൽ രണ്ട് മൃതദേഹങ്ങൾ കണ്ടെത്തിയതായി പോലീസും സ്ഥിരീകരിച്ചു. മൃതദേഹങ്ങൾ ഔദ്യോഗികമായി തിരിച്ചറിഞ്ഞിട്ടില്ല.
ഇത് "വളരെ ബുദ്ധിമുട്ടുള്ള" ജോലിയാണെന്ന് എൻഎസ്ഡബ്ല്യു റൂറൽ ഫയർ സർവീസ് കമ്മീഷണർ ട്രെന്റ് കർട്ടിൻ പറഞ്ഞു, എന്നാൽ തുടക്കത്തിൽ പ്രതിരോധ നടപടികൾ സ്വീകരിക്കുകയല്ലാതെ അവർക്ക് മറ്റ് മാർഗമില്ലെന്ന് പറഞ്ഞു."അഗ്നിശമന സേനാംഗങ്ങൾ അവരുടെ ഹോസ്ലൈനുകൾ ഉപയോഗിച്ച് അവിടെയെത്തി, പക്ഷേ കെട്ടിടത്തിന്റെ മതിലുകളുടെ ഭാഗങ്ങൾ ഇടിഞ്ഞുവീഴാൻ പോകുന്നുണ്ടെന്നും ചില ഭാഗങ്ങൾ തകർന്നിട്ടുണ്ടെന്നും തിരിച്ചറിഞ്ഞു," അദ്ദേഹം പറഞ്ഞു. "വീട് തകർന്നുവീഴുമ്പോൾ അതിനുള്ളിൽ കയറിയാൽ അത് വളരെ അപകടകരമാകുമായിരുന്നു."- അദ്ദേഹം വ്യക്തമാക്കി. തീപിടുത്തം മറ്റ് വീടുകളിലേക്ക് പടരാതിരിക്കാൻ നടപടി സ്വീകരിച്ച സംഘത്തെ കർട്ടിൻ പ്രശംസിച്ചു, എല്ലാ അഗ്നിശമന സേനാംഗങ്ങൾക്കും പിന്തുണ നൽകുമെന്ന് അദ്ദേഹം പറഞ്ഞു. അതേസമയം തീ എങ്ങനെ പിടിച്ചെന്നതിനെ കുറിച്ച് അന്വേഷണം ആരംഭിച്ചു.