സിഡ്നിയിലെ പ്രമുഖ ആശുപത്രിയായ റോയൽ പ്രിൻസ് ആൽഫ്രഡ് ഹോസ്പിറ്റലിലെ ട്രാൻസ്പ്ലാന്റ് യൂണിറ്റിൽ ഫംഗസ് ബാധയെത്തുടർന്ന് രണ്ട് രോഗികൾ മരിച്ചു. കഴിഞ്ഞ വർഷം ഒക്ടോബറിനും ഡിസംബറിനും ഇടയിൽ ആറ് രോഗികളിലാണ് 'ആസ്പർഗില്ലസ്' (Aspergillus) എന്ന ഫംഗസ് ബാധ കണ്ടെത്തിയത്. നിലവിൽ ആശുപത്രിയിൽ നടക്കുന്ന 940 മില്യൺ ഡോളറിന്റെ പുനർനിർമ്മാണ പ്രവർത്തനങ്ങളാകാം ഈ ഫംഗസ് ബാധയ്ക്ക് കാരണമായതെന്നാണ് പ്രാഥമിക നിഗമനം. മണ്ണിലും പൊടിപടലങ്ങളിലും നിർമ്മാണ സ്ഥലങ്ങളിലും സാധാരണയായി കാണപ്പെടുന്ന ഒന്നാണ് ഈ ഫംഗസ്.
അവയവമാറ്റ ശസ്ത്രക്രിയ കഴിഞ്ഞ രോഗികളുടെ പ്രതിരോധശേഷി കുറവായതിനാലാണ് ഫംഗസ് ബാധ ഇവരെ മാരകമായി ബാധിച്ചത്. സംഭവത്തെത്തുടർന്ന് ട്രാൻസ്പ്ലാന്റ് വാർഡ് താൽക്കാലികമായി അടയ്ക്കുകയും രോഗികളെ മാറ്റിപ്പാർപ്പിക്കുകയും ചെയ്തിരുന്നു. ആഴത്തിലുള്ള ശുചീകരണത്തിനും എയർ ഫിൽട്ടറുകൾ മാറ്റുന്നതിനും ശേഷം ഫെബ്രുവരി 9-ന് വാർഡ് വീണ്ടും തുറന്നു. മറ്റ് നാല് രോഗികൾ സുഖം പ്രാപിച്ചതായും നിലവിൽ ആശങ്കപ്പെടേണ്ട സാഹചര്യമില്ലെന്നും ആശുപത്രി അധികൃതർ വ്യക്തമാക്കി.
മരിച്ച രോഗികളുടെ കുടുംബങ്ങൾ നൽകിയ പരാതിയിന്മേൽ എൻഎസ്ഡബ്ല്യു ഹെൽത്ത് കെയർ കംപ്ലയിന്റ്സ് കമ്മീഷൻ അന്വേഷണം ആരംഭിച്ചിട്ടുണ്ട്. ആശുപത്രി അധികൃതർ ഉചിതമായ നടപടികൾ വേഗത്തിൽ സ്വീകരിച്ചതായി ആരോഗ്യ മന്ത്രി റയാൻ പാർക്ക് അറിയിച്ചു. രോഗപ്രതിരോധ ശേഷി കുറഞ്ഞവരിലേക്ക് ഈ ഫംഗസ് പടരാനുള്ള സാധ്യതകളെക്കുറിച്ച് കൂടുതൽ പഠനം നടത്തുമെന്നും അദ്ദേഹം പറഞ്ഞു.
