മുൻ സിഡ്നി ചൈൽഡ്കെയർ ജീവനക്കാരനായ ഹാമിഷ് ടെയ്റ്റിന്റെ കേസിൽ ഇതുവരെ തിരിച്ചറിയാൻ കഴിയാത്ത കൂടുതൽ ഇരകളെ കണ്ടെത്തുന്നതിനായി ഓസ്ട്രേലിയൻ ഫെഡറൽ പൊലീസ് (AFP) കുട്ടികൾ ധരിച്ചിരുന്ന വസ്ത്രങ്ങളുടെ പുതിയ ചിത്രങ്ങൾ പുറത്തുവിട്ടു. 35-കാരനായ ടെയ്റ്റ് 320-ലധികം കുട്ടികളെ ലൈംഗികമായി പീഡിപ്പിച്ചതുമായി ബന്ധപ്പെട്ട കുറ്റങ്ങൾ നേരിടുകയാണ്. 2009 മുതൽ 2025 വരെ 62 ചൈൽഡ്കെയർ കേന്ദ്രങ്ങളിൽ ജോലി ചെയ്തതോ സേവനം അനുഷ്ഠിച്ചതോ ആയ ഇയാൾ, 2025-ലാണ് അറസ്റ്റിലായത്.
16 വർഷത്തിനിടെ 150-ലധികം കുട്ടികളെ ഇയാൾ ലൈംഗികമായി പീഡിപ്പിച്ചതായാണ് പൊലീസ് ആരോപിക്കുന്നത്. കൂടുതലും സിഡ്നിയുടെ വടക്കുപടിഞ്ഞാറൻ മേഖലയിലെ ചൈൽഡ്കെയർ കേന്ദ്രങ്ങളിലായിരുന്നു സംഭവങ്ങൾ. ആദ്യം തിരിച്ചറിയാനാകാത്ത 22 കുട്ടികൾ ഉണ്ടെന്ന് പൊലീസ് അറിയിച്ചിരുന്നെങ്കിലും, ഇപ്പോൾ ആ എണ്ണം 16 ആയി കുറഞ്ഞതായി AFP ഡിറ്റക്ടീവ് ആക്ടിങ് ഇൻസ്പെക്ടർ ഇമ്മാനുവൽ സാർഡൂലിയാസ് അറിയിച്ചു.
പുറത്തുവിട്ട ചിത്രങ്ങളിൽ ഉൾപ്പെടുന്നത്:
ഡൈനോസർ രൂപകൽപ്പനയുള്ള പ്രത്യേക പഫർ വെസ്റ്റ് (2023 ജൂൺ 26-ന് റൗസ് ഹിൽ ചൈൽഡ്കെയർ കേന്ദ്രത്തിൽ എടുത്തതെന്നാണ് കരുതുന്നത്)
നീല ഡിസൈനുള്ള ഷോർട്സും, മൃഗങ്ങളുടെ ചിത്രമുള്ള ടി-ഷർട്ടും (2020 ഫെബ്രുവരി മുതൽ 2024 മാർച്ച് വരെയുള്ള കാലയളവിൽ റൗസ് ഹിൽ കേന്ദ്രത്തിൽ എടുത്തതെന്നാണ് നിഗമനം)
രണ്ട് നിറങ്ങളുള്ള ടി-ഷർട്ട് (2018 ജനുവരി 9-ന് പുട്ട്നി ചൈൽഡ്കെയർ കേന്ദ്രത്തിൽ എടുത്തതെന്നാണ് കരുതുന്നത്)
ഈ വസ്ത്രങ്ങൾ തിരിച്ചറിയാൻ കഴിയുന്ന മാതാപിതാക്കളും പൊതുജനങ്ങളും 02 9765 1000 എന്ന നമ്പറിലുള്ള ലോക്കൽ കോൺടാക്റ്റ് പോയിന്റുമായി (LCP) ബന്ധപ്പെടണമെന്ന് പൊലീസ് അഭ്യർഥിച്ചു. ഇതുവരെ 300-ലധികം ഫോൺവിളികൾ ലഭിച്ചതായും, ഏറ്റവും ചെറിയ വിവരങ്ങൾ പോലും ഇരകളെ തിരിച്ചറിയാൻ സഹായകരമാകുമെന്നും പൊലീസ് അറിയിച്ചു.
'ഓപ്പറേഷൻ മൂൺബി'യുടെ ഭാഗമായി 2025 ജൂൺ 20-നാണ് ടെയ്റ്റിനെ അറസ്റ്റ് ചെയ്തത്. ഓൺലൈനിൽ അപ്ലോഡ് ചെയ്തതായി കണ്ടെത്തിയ കുട്ടികളുടെ ലൈംഗിക പീഡന ദൃശ്യങ്ങളെ തുടർന്നാണ് അന്വേഷണം ആരംഭിച്ചത്. ടെയ്റ്റിനെതിരെ നിലവിൽ 329 കുറ്റങ്ങൾ ചുമത്തിയിട്ടുണ്ട്. നാല് ചൈൽഡ്കെയർ കേന്ദ്രങ്ങളിലും ഇയാൾ നടത്തിയിരുന്ന സ്വകാര്യ ബിസിനസിലുമാണ് ഈ കുറ്റകൃത്യങ്ങൾ നടന്നതെന്നാണ് പൊലീസ് ആരോപിക്കുന്നത്.