ന്യൂ സൗത്ത് വെയിൽസിലെ കഫേകളിൽ ഇരുന്ന് ഭക്ഷണം കഴിക്കുന്ന ഉപഭോക്താക്കൾക്ക് ഡിസ്പോസിബിൾ കപ്പുകൾക്ക് പകരം പുനരുപയോഗിക്കാവുന്ന മഗുകളും ഗ്ലാസുകളും നൽകുന്നത് നിർബന്ധമാക്കാനുള്ള തീരുമാനം സർക്കാർ പിൻവലിക്കുന്നു. പുനരുപയോഗ കപ്പ് പദ്ധതിയിൽ പങ്കെടുക്കാത്ത സ്ഥാപനങ്ങൾക്ക് 1.1 ലക്ഷം ഓസ്‌ട്രേലിയൻ ഡോളർ വരെ പിഴ ചുമത്താൻ വ്യവസ്ഥ ചെയ്ത നിയമവും ഉപേക്ഷിക്കുമെന്ന് സർക്കാർ അറിയിച്ചു. നിയമനിർമാണം പാർലമെന്റ് പാസാക്കി ഒരാഴ്ചയ്ക്കുശേഷമാണ് ലേബർ സർക്കാർ നിലപാട് മാറ്റിയത്. ചെറുകിട വ്യാപാരികളിൽനിന്നും മാധ്യമങ്ങളിൽനിന്നും ശക്തമായ എതിർപ്പുയർന്നതിനെത്തുടർന്നാണ് നടപടി.
പരിസ്ഥിതിമന്ത്രി പെന്നി ഷാർപ്പ് ബുധനാഴ്ച റേഡിയോ അഭിമുഖത്തിൽ മുഖ്യമന്ത്രി ക്രിസ് മിൻസുമായി വിഷയം ചർച്ച ചെയ്തതായി പറഞ്ഞു. ഇത്തരം മാറ്റങ്ങൾ നിയമം വഴി നിർബന്ധമാക്കേണ്ടതില്ലെന്ന് സർക്കാർ തീരുമാനിച്ചതായും അവർ വ്യക്തമാക്കി. ചെറുകിട സ്ഥാപനങ്ങൾ ഇതിനകം സാമ്പത്തിക സമ്മർദം നേരിടുന്നുണ്ടെന്നും സ്വന്തം ബിസിനസ് ആവശ്യങ്ങൾക്കനുസരിച്ച് പ്രവർത്തിക്കാൻ അവയ്ക്ക് അവസരം നൽകണമെന്നുമാണ് സർക്കാരിന്റെ നിലപാട്. എന്നാൽ, ഉപഭോക്താക്കൾ സ്വന്തം പുനരുപയോഗ കപ്പുകൾ കൊണ്ടുവരുമ്പോൾ അവ വൃത്തിയുള്ളതാണെങ്കിൽ സ്വീകരിക്കണമെന്ന വ്യവസ്ഥ തുടരും. ഒറ്റത്തവണ ഉപയോഗിക്കുന്ന ടേക്ക്‌അവേ കപ്പുകൾ 2028ഓടെ പുനരുപയോഗത്തിന് അനുയോജ്യമാക്കണമെന്ന നിയമവും നിലനിൽക്കും.
പുതിയ നിയമപ്രകാരം 2028 മുതൽ കഫേകളിൽ ഇരുന്ന് ഭക്ഷണം കഴിക്കുന്നവർക്ക് മഗുകളോ ഗ്ലാസുകളോ നൽകേണ്ടതായിരുന്നു. എന്നാൽ, പുനരുപയോഗ കപ്പ് പദ്ധതിയിൽ പങ്കെടുക്കുന്നതിനുള്ള ചെലവും അധിക നിയന്ത്രണങ്ങളും ചെറുകിട വ്യാപാരികൾക്ക് ഭാരമാകുമെന്ന് വിമർശനം ഉയർന്നു. നിയമം ഔദ്യോഗികമായി റദ്ദാക്കുന്നത് 2027 മാർച്ചിലെ സംസ്ഥാന തിരഞ്ഞെടുപ്പിന് ശേഷമായിരിക്കും. അതിനു മുമ്പ് പാർലമെന്റിന് ഇനി രണ്ട് സമ്മേളന ആഴ്ചകൾ മാത്രമാണുള്ളത്. അതുവരെ നിർദിഷ്ട മാറ്റങ്ങൾ നടപ്പാക്കില്ലെന്ന് വ്യക്തമാക്കുന്ന അറിയിപ്പ് പുറപ്പെടുവിക്കാൻ പരിസ്ഥിതി സംരക്ഷണ അതോറിറ്റിയോട് മന്ത്രി ആവശ്യപ്പെട്ടിട്ടുണ്ട്.
നിയമം സംസ്ഥാനത്തെ വ്യാപാരികൾക്ക് മേൽ അനാവശ്യ നിയന്ത്രണങ്ങൾ അടിച്ചേൽപ്പിക്കുന്നുവെന്ന് ആരോപിച്ച്, അടുത്ത തിരഞ്ഞെടുപ്പിൽ അധികാരത്തിലെത്തിയാൽ നിയമം റദ്ദാക്കുമെന്ന് പ്രതിപക്ഷ സഖ്യം നേരത്തെ പ്രഖ്യാപിച്ചിരുന്നു. ലേബർ സർക്കാർ ഇപ്പോൾ പ്രതിപക്ഷ സഖ്യത്തിന്റെയും വൺ നേഷൻ പാർട്ടിയുടെയും സമ്മർദം നേരിടുകയാണ്. ചെറുകിട വ്യാപാരികൾക്ക് അനുകൂലമായ നയങ്ങളും തൊഴിൽദാതാക്കൾ നൽകുന്ന പേറോൾ നികുതിയിൽ ഇളവുകളും ഇരുപാർട്ടികളും വാഗ്ദാനം ചെയ്യുന്നുണ്ട്. തൊഴിലാളികൾക്ക് നൽകുന്ന വേതനത്തിന്മേലുള്ള നികുതി പകുതിയായി കുറയ്ക്കുമെന്നും പ്രാദേശിക മേഖലകളിൽ അത് പൂർണമായും ഒഴിവാക്കുമെന്നും വൺ നേഷൻ പ്രഖ്യാപിച്ചിട്ടുണ്ട്. എന്നാൽ, തിരഞ്ഞെടുപ്പ് വാഗ്ദാനങ്ങളുടെ ചെലവ് സംസ്ഥാന ബജറ്റ് ഓഫീസിനെക്കൊണ്ട് കണക്കാക്കിക്കണമെന്ന മിൻസിന്റെ ആവശ്യം പാർട്ടി നേതാവ് മൈക്ക് ന്യൂമാൻ അംഗീകരിച്ചിട്ടില്ല.
കഴിഞ്ഞയാഴ്ച പ്രാദേശിക, മേഖലാ റെയിൽ സർവീസുകളുടെ സമയക്രമത്തിൽ വരുത്താനിരുന്ന ചില മാറ്റങ്ങളും യാത്രക്കാരുടെ പ്രതിഷേധത്തെത്തുടർന്ന് മിൻസ് സർക്കാർ ഉപേക്ഷിച്ചിരുന്നു. കഴിഞ്ഞയാഴ്ച നടത്തിയ ഗാർഡിയൻ എസൻഷ്യൽ സർവേ പ്രകാരം, ദേശീയതലത്തിൽ ലേബറിനും വൺ നേഷനും 28 ശതമാനം വീതം പ്രാഥമിക വോട്ടുപിന്തുണയുണ്ടായിരുന്നു. കോയലിഷന് 23 ശതമാനമായിരുന്നു പിന്തുണ. അതേസമയം സിഡ്‌നിയിലെ മാലിന്യക്കൂമ്പാരങ്ങൾ 2030ഓടെ ശേഷി തീർന്നേക്കുമെന്ന പ്രവചനത്തിന്റെ പശ്ചാത്തലത്തിൽ പ്ലാസ്റ്റിക് മാലിന്യം കുറയ്ക്കാനുള്ള പദ്ധതിയുടെ ഭാഗമായാണ് പുനരുപയോഗ കപ്പ് പരിഷ്‌കാരം സർക്കാർ കൊണ്ടുവന്നത്.