NRL ഗ്രാൻഡ് ഫൈനലിന് മുന്നോടിയായി നൈറ്റ്‌സ് ടീമിനെ യാത്രയയക്കാൻ ന്യൂകാസിലിൽ ഒത്തുകൂടിയ ആരാധകർക്കിടയിലേക്ക് കാർ ഇടിച്ചുകയറി. അപകടത്തിൽ 10 പേർക്ക് പരിക്കേറ്റു. അഞ്ച് വയസ്സുകാരി ഗുരുതരാവസ്ഥയിൽ തുടരുകയാണ്. ശനിയാഴ്ച രാവിലെ ന്യൂകാസിൽ ലിങ്ക് റോഡിലെ ട്രാൻസ്ഫീൽഡ് ഡ്രൈവ് റൗണ്ട്എബൗട്ടിന് സമീപമാണ് അപകടമുണ്ടായത്. പരിക്കേറ്റവരെ NSW ആംബുലൻസ് പാരാമെഡിക്കുകൾ സംഭവസ്ഥലത്ത് പ്രാഥമിക ചികിത്സ നൽകിയ ശേഷം ആശുപത്രികളിലേക്ക് മാറ്റി.
അപകടത്തിൽ ആദ്യം ഗുരുതരാവസ്ഥയിലായിരുന്ന 67കാരന്റെ നില പിന്നീട് ഗുരുതരമാണെങ്കിലും സ്ഥിരതയുള്ളതായി ആശുപത്രി അധികൃതർ അറിയിച്ചു. മറ്റ് അഞ്ച് പേർ സ്ഥിരതയുള്ള നിലയിലാണെന്നും മൂന്ന് പേർ ആശുപത്രി വിട്ടതായും ജോൺ ഹണ്ടർ ആശുപത്രി അറിയിച്ചു. പി-പ്ലേറ്റ് ഡ്രൈവറായ 18കാരനാണ് കാർ ഓടിച്ചിരുന്നത്. ഇയാളെ സംഭവസ്ഥലത്ത് പൊലീസ് അറസ്റ്റ് ചെയ്ത് നിർബന്ധിത പരിശോധനകൾക്കായി ആശുപത്രിയിലേക്ക് മാറ്റി. വാഹനം നിയന്ത്രണം വിട്ട് ജനക്കൂട്ടത്തിലേക്ക് ഇടിച്ചുകയറുന്നതിന് മുമ്പ് യുവാവ് അശ്രദ്ധമായി വാഹനമോടിച്ചിരുന്നതായി റിപ്പോർട്ടുകളുണ്ടെന്ന് അസിസ്റ്റന്റ് കമ്മീഷണർ ഡേവിഡ് വാഡൽ പറഞ്ഞു. ഇയാൾക്കെതിരെ ശനിയാഴ്ച തന്നെ കുറ്റം ചുമത്തുമെന്നാണ് പ്രതീക്ഷിക്കുന്നത്. കാറിൽ മറ്റ് രണ്ട് പേരും ഉണ്ടായിരുന്നതായി പൊലീസ് അറിയിച്ചു. ജനക്കൂട്ടം ഇവർക്കെതിരെ തിരിഞ്ഞതിനെ തുടർന്ന് അവരെ സ്ഥലത്തുനിന്ന് മാറ്റേണ്ടിവന്നതായും വാഡൽ പറഞ്ഞു.
സംഭവം ഭീകരാക്രമണവുമായി ബന്ധപ്പെട്ടതല്ലെന്നാണ് പ്രാഥമിക അന്വേഷണത്തിൽ വ്യക്തമായതെന്ന് NSW പൊലീസ് അറിയിച്ചു. അപകടത്തിന്റെ സാഹചര്യത്തിൽ അന്വേഷണം തുടരുകയാണ്. നൈറ്റ്‌സ് ആരാധകനായിരുന്ന ഡ്രൈവർ ടീമിന്റെ ബസ് എത്തുന്നതിന് തൊട്ടുമുമ്പ് വാഹനം റിവ് ചെയ്തുകൊണ്ടിരിക്കുകയായിരുന്നുവെന്നും തുടർന്ന് നിയന്ത്രണം നഷ്ടപ്പെട്ട് കാർ ജനക്കൂട്ടത്തിലേക്ക് വശത്തേക്ക് ഇടിച്ചുകയറിയതായും ന്യൂകാസിൽ മേയർ ഗാവിൻ മോറിസ് പറഞ്ഞു. അപകടത്തിന് മുമ്പ് കാർ റൗണ്ട്എബൗട്ടിലൂടെ വേഗത്തിൽ സഞ്ചരിക്കുന്ന ദൃശ്യങ്ങളും സമൂഹമാധ്യമങ്ങളിൽ പ്രചരിച്ചു. അപകടത്തെ തുടർന്ന് ന്യൂകാസിൽ ലിങ്ക് റോഡ് ഇരുവശത്തേക്കും അടച്ചു. ഇതോടെ നൈറ്റ്‌സ് ടീമിന്റെ ഗ്രാൻഡ് ഫൈനൽ യാത്രയയപ്പ് റൂട്ട് മാറ്റി. പൊതുസുരക്ഷയ്ക്കാണ് മുൻഗണനയെന്ന് ക്ലബ് അറിയിച്ചു.
അപകടം നടന്ന സ്ഥലത്ത് ആയിരത്തിലധികം പേർ ഉണ്ടായിരുന്നതിനാൽ ദുരന്തം കൂടുതൽ ഗുരുതരമാകാമായിരുന്നുവെന്ന് NSW റോഡ് മന്ത്രി ജെന്നി ഐച്ചിസൺ പറഞ്ഞു. ഒരു നിമിഷത്തെ തീരുമാനമാണ് നിരവധി പേരുടെ ജീവിതത്തെ ബാധിച്ചതെന്ന് NSW പൊലീസ് മന്ത്രി യാസ്മിൻ കാറ്റ്‌ലി പറഞ്ഞു. വാരാന്ത്യത്തിൽ വാഹനമോടിക്കുന്നവർ കൂടുതൽ ജാഗ്രത പാലിക്കണമെന്നും അവർ അഭ്യർഥിച്ചു. സംഭവത്തിൽ പരിക്കേറ്റവരുടെ കുടുംബാംഗങ്ങളെയും സുഹൃത്തുക്കളെയും കുറിച്ച് ആശങ്കയുണ്ടെന്ന് NSW പ്രീമിയർ ക്രിസ് മിൻസ് പറഞ്ഞു. സംഭവത്തെ തുടർന്ന് ന്യൂകാസിൽ സമൂഹം ഒറ്റക്കെട്ടായി തുടരണമെന്നും അദ്ദേഹം അഭ്യർഥിച്ചു. പരിക്കേറ്റവർക്കും സംഭവത്തിൽ ഉൾപ്പെട്ട എല്ലാവർക്കും പിന്തുണ അറിയിക്കുന്നതായി പ്രധാനമന്ത്രി ആന്തണി അൽബനീസ് പറഞ്ഞു. അടിയന്തര സേവന പ്രവർത്തകരും പൊലീസും വേഗത്തിൽ നടത്തിയ രക്ഷാപ്രവർത്തനത്തെയും അദ്ദേഹം പ്രശംസിച്ചു.