ഓസ്‌ട്രേലിയൻ ഇതിഹാസം ജോണി യങ് അന്തരിച്ചു

സിഡ്‌നി: ഓസ്‌ട്രേലിയൻ ടെലിവിഷൻ, സംഗീത രംഗങ്ങളിലെ പ്രമുഖ വ്യക്തിത്വവും Young Talent Time ന്റെ സ്രഷ്ടാവുമായ ജോണി യങ് അന്തരിച്ചു. 79 വയസ്സായിരുന്നു. പാൻക്രിയാറ്റിക് ക്യാൻസറിനെ തുടർന്ന് ചികിത്സയിലിരിക്കെയാണ് അന്ത്യം. വെള്ളിയാഴ്ച രാവിലെയാണ് കുടുംബം മരണവിവരം സ്ഥിരീകരിച്ചത്.

ഓസ്‌ട്രേലിയയിലെ നിരവധി തലമുറകളുടെ ബാല്യത്തിന്റെ ഭാഗമായിരുന്ന Young Talent Time 1971ലാണ് ജോണി യങ് ആരംഭിച്ചത്. ഏകദേശം രണ്ട് പതിറ്റാണ്ടോളം സംപ്രേഷണം ചെയ്ത കുട്ടികളുടെ വൈവിധ്യമാർന്ന പരിപാടിയും ടാലന്റ് മത്സരവുമായ ഇത് ഓസ്‌ട്രേലിയൻ പോപ് സംസ്കാരത്തിന്റെ പ്രധാന ഭാഗമായി മാറി. ടീന അരീന, ഡാനി മിനോഗ് തുടങ്ങിയ നിരവധി താരങ്ങളുടെ കരിയറിന് പരിപാടി തുടക്കമിട്ടു. ജോണി യങ് ‘The Real Thing’, ‘Smiley’ തുടങ്ങിയ നിരവധി ഹിറ്റ് ഗാനങ്ങൾ രചിക്കുകയും നിർമിക്കുകയും ചെയ്തിട്ടുണ്ട്.

സംഗീതരംഗത്തേക്കുള്ള തുടക്കം

1947 മാർച്ച് 12ന് നെതർലാൻഡ്സിലെ റോട്ടർഡാമിൽ Johnny Benjamin Arthur de Jong എന്ന പേരിലാണ് യങ് ജനിച്ചത്. ബാല്യകാലത്ത് കുടുംബം ഓസ്‌ട്രേലിയയിലേക്ക് കുടിയേറി. 1960കളുടെ മധ്യത്തിൽ പെർത്ത് ആസ്ഥാനമായ പോപ് ബാൻഡായ Johnny Young & Kompany യുടെ ഗായകനായതോടെയാണ് അദ്ദേഹത്തിന്റെ സംഗീതജീവിതം ശ്രദ്ധേയമായത്. പിന്നീട് The Go!! Show എന്ന ടെലിവിഷൻ പോപ് മ്യൂസിക് പരിപാടിയുടെ അവതാരകനായും അദ്ദേഹം ദേശീയ ശ്രദ്ധ നേടി. ദി റോളിങ് സ്റ്റോൺസ്, റോയ് ഓർബിസൺ തുടങ്ങിയ പ്രമുഖ സംഗീതജ്ഞർക്കൊപ്പവും അദ്ദേഹം പര്യടനം നടത്തി. 1971ൽ Young Talent Time ആരംഭിച്ചതോടെ ജോണി യങിന്റെ കരിയറിന് പുതിയ വഴിത്തിരിവുണ്ടായി.

സംഗീതത്തിലും ടെലിവിഷൻ പ്രക്ഷേപണ രംഗത്തും നൽകിയ സംഭാവനകൾക്ക് 1990ൽ TV Week Logie Hall of Fame ലും 2010ൽ ARIA Hall of Fame ലും അദ്ദേഹത്തെ ഉൾപ്പെടുത്തി. രണ്ട് പ്രമുഖ ഹാൾ ഓഫ് ഫെയിമുകളിലും ആദരിക്കപ്പെട്ട ആദ്യ വിനോദതാരമായിരുന്നു അദ്ദേഹം.

കുടുംബജീവിതത്തിലും വേദനയുടെ അധ്യായം

ജോണി യങിന് മൂന്ന് മക്കളായിരുന്നു — അന്ന, ഫ്ലൂർ, മകൻ ക്രെയ്ഗ്. ഒമ്പത് കൊച്ചുമക്കളും രണ്ട് പ്രപൗത്രന്മാരുമുണ്ട്.

എന്നാൽ കുടുംബജീവിതത്തിൽ വലിയ ദുരന്തങ്ങളും അദ്ദേഹത്തെ തേടിയെത്തി. ഏക മകൻ ക്രെയ്ഗ് യങ് 2014ൽ, 48-ാം വയസ്സിൽ പാൻക്രിയാറ്റിക് ക്യാൻസർ ബാധിച്ച് മരിച്ചു. ബാല്യകാല പ്രണയിനിയായ ജെയ്നുമായുള്ള ആദ്യ വിവാഹത്തിലെ മകനായിരുന്നു ക്രെയ്ഗ്. ജെയ്നും 20കളിൽ ലുക്കീമിയ ബാധിച്ച് മരിച്ചിരുന്നു.

രണ്ടാം വിവാഹത്തിൽ അന്നയും ഫ്ലൂറും ജനിച്ചു. 20 വർഷത്തെ ദാമ്പത്യത്തിനുശേഷം ആ ബന്ധം 1995ൽ അവസാനിച്ചു. പിന്നീട് പോളണ്ടിൽ ജനിച്ച മരിഷയെ മൂന്നാം വിവാഹം കഴിച്ച യങ്, മരണസമയത്തോളം 20 വർഷത്തിലേറെ അവർക്കൊപ്പം ജീവിച്ചു. 2018ൽ Sunday Life ക്ക് നൽകിയ അഭിമുഖത്തിൽ മൂന്നാം വിവാഹത്തെക്കുറിച്ച് യങ് പറഞ്ഞത്, “അവസാനം എല്ലാം ശരിയായി. അവളെ കണ്ടുമുട്ടാൻ കഴിഞ്ഞതിൽ ഞാൻ വളരെ ഭാഗ്യവാനാണ്. ഒന്നിനെയും ഞാൻ നിസാരമായി കാണുന്നില്ല; ഓരോ നിമിഷവും വിലമതിക്കുന്നു” എന്നായിരുന്നു.

ജോണി യങിന്റെ മരണവാർത്ത പുറത്തുവന്നതിന് പിന്നാലെ ഓസ്‌ട്രേലിയൻ വിനോദലോകത്ത് നിരവധി പേർ അനുശോചനം രേഖപ്പെടുത്തി. “നമ്മളിൽ ഭൂരിഭാഗം പേരും ജോണിക്കൊപ്പമാണ് വളർന്നത്. അദ്ദേഹം അതിശയകരമായ ആദ്യകാല പോപ് താരവും പയനിയറുമായിരുന്നു. ഓസ്‌ട്രേലിയൻ സംഗീതത്തെ അദ്ദേഹം സ്നേഹിച്ചു,” ഡേവിഡ് ക്യാംപ്ബെൽ Today പരിപാടിയിൽ പറഞ്ഞു. “ഓരോ വാരാന്ത്യത്തിലും അദ്ദേഹം ടെലിവിഷനിൽ ‘all my love’ എന്ന് പറയുന്നത് കേൾക്കുന്നത് ഓസ്‌ട്രേലിയയിൽ വളർന്നതിന്റെ മനോഹരമായൊരു ഭാഗമായിരുന്നു. ഓസ്‌ട്രേലിയൻ പ്രതിഭകളെയും അദ്ദേഹം ഏറെ സ്നേഹിച്ചു. നമ്മുടെ സംസ്കാരത്തിന്റെ അനിവാര്യമായൊരു ഭാഗമായിരുന്നു അദ്ദേഹം. അദ്ദേഹത്തെ വളരെ അധികം മിസ് ചെയ്യും,” ക്യാംപ്ബെൽ കൂട്ടിച്ചേർത്തു. അതേസമയം ജോണി യങിന്റെ കുടുംബം സ്വകാര്യത ആവശ്യപ്പെട്ടിട്ടുണ്ട്. അനുസ്മരണ ചടങ്ങിന്റെ വിശദാംശങ്ങൾ പിന്നീട് അറിയിക്കുമെന്നും കുടുംബം അറിയിച്ചു.