സിഡ്നി: പശ്ചിമേഷ്യയിലെ സംഘർഷങ്ങൾ നാളെ അവസാനിച്ചാൽ പോലും ഓസ്ട്രേലിയൻ കുടുംബങ്ങൾ വരും മാസങ്ങളിൽ ഉയർന്ന ഇന്ധന-പലവ്യഞ്ജന വിലകളും പലിശ നിരക്കുകളും നേരിടേണ്ടി വരുമെന്ന് സാമ്പത്തിക വിദഗ്ധർ. യുദ്ധം അവസാനിക്കുന്നതോടെ ഇന്ധനവിലയിൽ നേരിയ കുറവുണ്ടായേക്കാമെങ്കിലും അത് യുദ്ധത്തിന് മുൻപുള്ള നിരക്കിലേക്ക് ഉടൻ മടങ്ങിയെത്തില്ലെന്ന് സിഡ്നി സർവകലാശാലയിലെ അസോസിയേറ്റ് പ്രൊഫസർ ഡേവിഡ് ഉബിലാവ പറഞ്ഞു.
യുദ്ധസമയത്ത് ഇന്ധനവിലയിലുണ്ടായ വർദ്ധനവ് ചരക്ക് നീക്കം, ഉൽപ്പന്ന സംസ്കരണം, സംഭരണം എന്നിവയുടെ ചെലവ് വൻതോതിൽ വർദ്ധിപ്പിച്ചിട്ടുണ്ട്. ഈ അധികച്ചെലവ് വരും മാസങ്ങളിൽ പലവ്യഞ്ജനങ്ങളുടെയും മറ്റ് നിത്യോപയോഗ സാധനങ്ങളുടെയും വില വർദ്ധനവിന് കാരണമാകും. "സാധാരണഗതിയിൽ വിലകൾ എപ്പോഴും വർദ്ധിച്ചുകൊണ്ടിരിക്കും, എന്നാൽ ഇപ്പോൾ അത് പ്രതീക്ഷിച്ചതിലും വേഗത്തിലാണ് സംഭവിക്കുന്നത്," ഡോ. ഉബിലാവ വ്യക്തമാക്കി. ലോജിസ്റ്റിക്സ് മുതൽ മാനുഫാക്ചറിംഗ് വരെയുള്ള എല്ലാ മേഖലകളെയും ഇത് ബാധിക്കും.
ഇന്ധനവില വർദ്ധനവ് പണപ്പെരുപ്പത്തിന് കാരണമായതോടെ റിസർവ് ബാങ്ക് പലിശ നിരക്കുകൾ ഉയർത്താനുള്ള സാധ്യതയും വർദ്ധിച്ചിട്ടുണ്ട്. 2026-ൽ ഒന്നോ രണ്ടോ തവണ പലിശ വർദ്ധിപ്പിക്കുമെന്ന് കരുതിയിരുന്ന സ്ഥാനത്ത് ഇപ്പോൾ അത് നാലിരട്ടിയാകാനാണ് സാധ്യത. ഹോർമുസ് കടലിടുക്ക് വഴി എണ്ണക്കപ്പലുകൾ വീണ്ടും സഞ്ചരിച്ചു തുടങ്ങിയാൽ പോലും അതിന്റെ ഗുണം ഓസ്ട്രേലിയൻ വിപണിയിലെത്താൻ ആഴ്ചകളോ മാസങ്ങളോ എടുത്തേക്കാം. മിഡിൽ ഈസ്റ്റിൽ നിന്നുള്ള ക്രൂഡ് ഓയിൽ കിഴക്കൻ ഏഷ്യയിൽ എത്തിച്ച് സംസ്കരിച്ച ശേഷമാണ് ഓസ്ട്രേലിയയിലെത്തുന്നത് എന്നതാണിതിന് കാരണം. ഈ സാഹചര്യത്തിൽ അത്യാവശ്യമല്ലാത്ത യാത്രകൾ ഒഴിവാക്കിയും കുറഞ്ഞ വിലയുള്ള സാധനങ്ങൾ തിരഞ്ഞെടുത്തും പ്രതിസന്ധിയോട് പൊരുത്തപ്പെടാൻ ജനങ്ങൾ നിർബന്ധിതരാകും.