ഓസ്‌ട്രേലിയയിലെ ജനപ്രിയ കുട്ടികളുടെ കാർട്ടൂൺ കഥാപാത്രമായ ‘ബ്ലൂയി’യെ രാഷ്ട്രീയ കാർട്ടൂൺ പരമ്പരയിൽ അനുമതിയില്ലാതെ ഉപയോഗിച്ചതിനെതിരെ വൺ നേഷനെതിരെ നിയമനടപടി സ്വീകരിക്കുന്ന കാര്യം പരിഗണിച്ച് ഓസ്‌ട്രേലിയൻ ബ്രോഡ്കാസ്റ്റിങ് കോർപ്പറേഷൻ (എബിസി). പോളിൻ ഹാൻസന്റെ നേതൃത്വത്തിലുള്ള വൺ നേഷന്റെ Please Explain എന്ന കാർട്ടൂൺ പരമ്പരയിലെ 2024-ലെ ‘The State of Melbourne’ എന്ന എപ്പിസോഡിലാണ് വിവാദ രംഗങ്ങളുള്ളത്. പ്രധാനമന്ത്രി ആന്തണി അൽബനീസിനെയും മുൻ വിക്ടോറിയൻ മുഖ്യമന്ത്രി ഡാനിയൽ ആൻഡ്രൂസിനെയും കാർ ഇടിച്ചുവീഴ്ത്തുന്ന ബ്ലൂയിയെ ഇതിൽ ചിത്രീകരിക്കുന്നുണ്ട്. മറ്റൊരു രംഗത്തിൽ അൽബനീസും ആൻഡ്രൂസും ബ്ലൂയിയെയും പരിസ്ഥിതി പ്രവർത്തകൻ റോബർട്ട് ഇർവിനെയും കാർ ഇടിച്ചുവീഴ്ത്തി മൃതദേഹങ്ങൾ കാറിന്റെ ഡിക്കിയിൽ വയ്ക്കുന്നതായും കാണിക്കുന്നു. ഈ എപ്പിസോഡിന് യൂട്യൂബിൽ 13 ലക്ഷം കാഴ്ചകളുണ്ട്.
വിവാദ കാർട്ടൂൺ വീണ്ടും ശ്രദ്ധയിൽപ്പെട്ടതിനെത്തുടർന്ന് വിഷയത്തിൽ നിയമോപദേശം തേടിയതായി എബിസി മാനേജിങ് ഡയറക്ടർ ഹ്യൂ മാർക്സ് ചൊവ്വാഴ്ച സെനറ്റ് എസ്റ്റിമേറ്റ്സ് ഹിയറിങ്ങിൽ പറഞ്ഞു. “തുടർനടപടികൾ സ്വീകരിക്കുമെന്ന് ഉറപ്പുനൽകുന്നു,” എന്നും അദ്ദേഹം വ്യക്തമാക്കി. ബ്ലൂയിയുടെ ബൗദ്ധിക സ്വത്തവകാശം എബിസിയുടെ ഉടമസ്ഥതയിലല്ലെങ്കിലും, പരമ്പരയുടെ അന്താരാഷ്ട്ര വിതരണക്കാരായ ബിബിസി സ്റ്റുഡിയോസുമായും ബ്രിസ്ബേനിലെ നിർമാതാക്കളായ ലുഡോയുമായും എബിസി ബന്ധപ്പെട്ടിട്ടുണ്ട്. കഥാപാത്രത്തെ ഉപയോഗിക്കാൻ വൺ നേഷൻ അനുമതി തേടിയിട്ടില്ലെന്നാണ് എബിസിയുടെ കണ്ടെത്തൽ.
ഈ ഉപയോഗം ബൗദ്ധിക സ്വത്തവകാശ ലംഘനമാണെന്നാണ് തന്റെ നിലപാടെന്ന് മാർക്സ് പറഞ്ഞു. കാർട്ടൂൺ ഉടൻ നീക്കം ചെയ്യാൻ ആവശ്യപ്പെട്ട് Cease and Desist നോട്ടീസ് അയയ്ക്കണമെന്നും അദ്ദേഹം അഭിപ്രായപ്പെട്ടു. ഇത് ബ്ലൂയിയുമായി ബന്ധപ്പെട്ട ഏതെങ്കിലും സൃഷ്ടിയുടെ പാരഡിയല്ലെന്നും അദ്ദേഹം കൂട്ടിച്ചേർത്തു. കുട്ടികൾ ഏറെ ഇഷ്ടപ്പെടുന്ന കഥാപാത്രത്തെ ഇത്തരത്തിൽ ഉപയോഗിച്ചത് ഞെട്ടിക്കുന്നതും അനാദരവുമാണെന്നും അദ്ദേഹം പറഞ്ഞു. വൺ നേഷന്റെ രാഷ്ട്രീയ ആവശ്യങ്ങൾക്കായി ബ്ലൂയിയെ ഉപയോഗിക്കുന്നതിൽ കടുത്ത ആശങ്കയുണ്ടെന്ന് എബിസി വക്താവും അറിയിച്ചു. നിയമപരമായ സാധ്യതകൾ പരിശോധിച്ചുവരികയാണെന്നും വിവാദ കാർട്ടൂണുകൾ വൺ നേഷന്റെ പ്ലാറ്റ്‌ഫോമുകളിൽനിന്ന് ഉടൻ നീക്കം ചെയ്യണമെന്നും ഇനി കഥാപാത്രത്തെ ഉപയോഗിക്കരുതെന്നും എബിസി ആവശ്യപ്പെട്ടു.
പാർലമെന്റ് ഹൗസിൽ മാധ്യമപ്രവർത്തകർ വിഷയത്തെക്കുറിച്ച് ചോദിച്ചപ്പോൾ പോളിൻ ഹാൻസൺ പ്രതികരിക്കാൻ തയ്യാറായില്ല. ഉപയോഗം നിയമലംഘനമാണോയെന്ന ചോദ്യത്തിന് “അല്ല” എന്നായിരുന്നു അവരുടെ മറുപടി. ബ്ലൂയിയെ ഉപയോഗിച്ചതിൽ എബിസിക്ക് ആശങ്കപ്പെടാൻ പൂർണ അവകാശമുണ്ടെന്ന് ആശയവിനിമയ മന്ത്രി അനിക വെൽസും പ്രതികരിച്ചു. ഓസ്‌ട്രേലിയയുടെ ഏറ്റവും പ്രശസ്തവും പ്രിയപ്പെട്ടതുമായ സാംസ്കാരിക കയറ്റുമതികളിലൊന്നാണ് ബ്ലൂയിയെന്നും വിഷയം നിയമപരമായി പരിശോധിക്കുന്നതിനാൽ കൂടുതൽ പ്രതികരിക്കുന്നില്ലെന്നും അവർ പറഞ്ഞു.
അതേസമയം, സ്വതന്ത്ര എംപി ഹെലൻ ഹെയ്‌ൻസിനെ വിക്ടോറിയയിലെ വാങരട്ടയിൽ അവരുടെ മണ്ഡലം ഓഫീസിന് പുറത്ത് കാർ ഇടിച്ച സംഭവത്തിന്റെ പശ്ചാത്തലത്തിൽ വിവാദം കൂടുതൽ ഗൗരവത്തോടെയാണ് ചർച്ചയാകുന്നത്. അപകടത്തിൽ ഇരുകാലുകളും മുറിച്ചുമാറ്റേണ്ടിവന്ന ഹെയ്‌ൻസ് ഇപ്പോഴും ആശുപത്രിയിലാണ്. സംഭവവും രാഷ്ട്രീയ കാർട്ടൂണിലെ രംഗങ്ങളും തമ്മിൽ നേരിട്ടുള്ള ബന്ധമുണ്ടെന്ന് റിപ്പോർട്ട് പറയുന്നില്ലെങ്കിലും, രാഷ്ട്രീയ പ്രസംഗങ്ങളും ഭീഷണികളും അക്രമവും തമ്മിലുള്ള ബന്ധത്തെക്കുറിച്ച് ഓസ്‌ട്രേലിയൻ ഫെഡറൽ പൊലീസ് കമ്മീഷണർ ക്രിസി ബാരറ്റ് ഞായറാഴ്ച എബിസിയോട് ആശങ്ക പ്രകടിപ്പിച്ചിരുന്നു. വിവാദ രംഗങ്ങൾ പുറത്തുവന്ന സാഹചര്യത്തിൽ, രാഷ്ട്രീയ ആവിഷ്‌കാരവും പകർപ്പവകാശ സംരക്ഷണവും സംബന്ധിച്ച ചർച്ചകൾക്കും സംഭവം വഴിവെച്ചിട്ടുണ്ട്.