ആൽഫബെറ്റിനു കീഴിലുള്ള ഗൂഗിൾ പാപുവ ന്യൂ ഗിനിയയിൽ മൂന്ന് സബ്സീ കേബിളുകൾ നിർമ്മിക്കും. ഇരുരാജ്യങ്ങൾ തമ്മിലുള്ള പ്രതിരോധ കരാറിന്റെ ഭാഗമായി നടപ്പാക്കുന്ന ഈ പദ്ധതി, പസഫിക് മേഖലയിലെ ചൈനീസ് സ്വാധീനം ചെറുക്കാനുള്ള തന്ത്രപരമായ നീക്കമായാണ് വിലയിരുത്തപ്പെടുന്നത്.
ഏകദേശം 120 മില്യൺ ഡോളർ ചെലവഴിച്ച് നടപ്പാക്കുന്ന പദ്ധതി, പാപുവ ന്യൂ ഗിനിയയുടെ വടക്കൻ–തെക്കൻ മേഖലകളും സ്വയംഭരണ പ്രദേശമായ ബൂഗൻവില്ലെയും തമ്മിൽ ബന്ധിപ്പിക്കും. “പുക്പുക്” എന്ന പേരിലുള്ള പ്രതിരോധ കരാർ പ്രകാരം പദ്ധതിയുടെ മുഴുവൻ ധനസഹായവും ഓസ്ട്രേലിയ നൽകുമെന്ന് പിഎൻജി സർക്കാർ അറിയിച്ചു.
നിലവിൽ, 2018-ൽ ചൈനീസ് കമ്പനിയായ ഹുവായ് നിർമ്മിച്ച ആഭ്യന്തര കേബിളിനാണ് രാജ്യം പ്രധാനമായും ആശ്രയിക്കുന്നത്. പുതിയ കേബിളുകൾ നിലവിലെ ആശ്രയം കുറയ്ക്കുകയും, ഇന്റർനെറ്റ് ചെലവ് കുറയ്ക്കുകയും, രാജ്യത്തെ ഏകദേശം 90 ലക്ഷം ജനങ്ങൾക്ക് മെച്ചപ്പെട്ട ഡിജിറ്റൽ കണക്റ്റിവിറ്റി ഉറപ്പാക്കുകയും ചെയ്യും.
പസഫിക് മേഖലയിലെ ചൈനീസ് അടിസ്ഥാന സൗകര്യ പദ്ധതികൾക്ക് എതിരായി, സബ്സീ കേബിൾ നെറ്റ്വർക്കുകളിൽ ഓസ്ട്രേലിയ ഇതിനകം 300 മില്യൺ ഡോളറിലധികം നിക്ഷേപിച്ചിട്ടുണ്ട്. ഈ പശ്ചാത്തലത്തിൽ, ഗൂഗിളിന്റെ പങ്കാളിത്തം സാങ്കേതിക കമ്പനികൾ സർക്കാർ തന്ത്രപരമായ ലക്ഷ്യങ്ങളുമായി കൂടുതൽ ചേർന്ന് പ്രവർത്തിക്കുന്നതിന്റെ സൂചനയായി വിലയിരുത്തപ്പെടുന്നു.
