ബ്രസീൽ പ്രസിഡന്റ് തിരഞ്ഞെടുപ്പിൽ ഇടതുപക്ഷ നേതാവ് ലൂയിസ് ഇനാസിയോ ലുല ഡ സിൽവയ്ക്ക് വിജയം. വലതുപക്ഷ സെനറ്റർ ഫ്ലാവിയോ ബോൾസൊനാരോയെ രണ്ടാംഘട്ട വോട്ടെടുപ്പിൽ പരാജയപ്പെടുത്തി ലുല നാലാം തവണ പ്രസിഡന്റാകുമെന്ന് റിപ്പോർട്ട്. മുൻ പ്രസിഡന്റ് ജയർ ബോൾസൊനാരോയുടെ മകനാണ് ഫ്ലാവിയോ.
100 ശതമാനം വോട്ടുകളും എണ്ണിക്കഴിഞ്ഞപ്പോൾ ഫ്ലാവിയോയെക്കാൾ വ്യക്തമായ ലീഡ് ലുലയ്ക്കുണ്ടെന്ന് ബ്രസീലിലെ തിരഞ്ഞെടുപ്പ് കോടതി അറിയിച്ചു. തുടർച്ചയായല്ലാത്ത നാലാം തവണയാണ് ലുല പ്രസിഡന്റ് പദവിയിലെത്തുന്നത്.
തിരഞ്ഞെടുപ്പ് സർവേകളെയും മുൻകാല പ്രവണതകളെയും മറികടന്നാണ് ലുലയുടെ വിജയം. ലാറ്റിനമേരിക്കയിൽ വലതുപക്ഷ സ്ഥാനാർഥികൾ തുടർച്ചയായി വിജയിച്ചുവരുന്ന സാഹചര്യത്തിനും ഈ ഫലം തിരിച്ചടിയായി.
തിരഞ്ഞെടുപ്പ് ദിവസം വോട്ടർമാർക്ക് നിരവധി പ്രതിസന്ധികൾ നേരിടേണ്ടിവന്നു. പ്രാദേശിക സമയം വൈകിട്ട് അഞ്ചിന് അവസാനിക്കേണ്ടിയിരുന്ന വോട്ടെടുപ്പ് രണ്ടുമണിക്കൂർ നീട്ടി. ബഹിയ സംസ്ഥാനത്തെ മൂന്ന് നഗരങ്ങളിൽ പൊതുഗതാഗതവുമായി ബന്ധപ്പെട്ട പ്രശ്നങ്ങൾ ചൂണ്ടിക്കാട്ടി ലുലയുടെ പ്രചാരണസംഘം സമയം നീട്ടണമെന്ന് ആവശ്യപ്പെട്ടിരുന്നു. സുപ്രീം കോടതി ജസ്റ്റിസ് ക്രിസ്റ്റ്യാനോ സാനിൻ ആവശ്യം അംഗീകരിച്ചതോടെയാണ് വോട്ടെടുപ്പ് രാത്രി ഏഴുവരെ നീട്ടിയത്. അതേസമയം ആദ്യഘട്ടത്തിൽ ലുല മുന്നിട്ടുനിന്നെങ്കിലും പിന്നീട് ഫ്ലാവിയോ ലീഡ് നേടി. എന്നാൽ രാത്രി 8.30ഓടെ പകുതിയോളം വോട്ടുകൾ എണ്ണിക്കഴിഞ്ഞപ്പോൾ ലുല വീണ്ടും മുന്നിലെത്തി. തുടർന്നും ലീഡ് നിലനിർത്തിയാണ് വിജയം ഉറപ്പിച്ചത്.
ജനാധിപത്യ പ്രക്രിയയുടെ വിജയമെന്ന് വിലയിരുത്തൽ
ലുലയുടെ വിജയം ജനാധിപത്യ സംവിധാനങ്ങളിലൂടെയും നിയമവാഴ്ചയിലൂടെയും രാഷ്ട്രീയ പ്രശ്നങ്ങൾ പരിഹരിക്കാനുള്ള ശ്രമത്തിന്റെ വിജയമാണെന്ന് ഡീക്കിൻ സർവകലാശാലയിലെ അന്താരാഷ്ട്ര രാഷ്ട്രീയ വിശകലന വിദഗ്ധ ഫ്ലാവിയ ബെല്ലിയേനി സിമ്മർമാൻ പറഞ്ഞു. ബ്രസീലിലെ രാഷ്ട്രീയ രംഗത്ത് വലതുപക്ഷത്തെ പ്രതിനിധീകരിക്കുന്ന കുടുംബമാണ് ബോൾസൊനാരോയുടേതെന്നും സൈനിക ഭരണകാലത്ത് ശക്തിപ്പെട്ട രാഷ്ട്രീയ ശക്തികളുമായി ഇവർക്ക് ബന്ധമുണ്ടെന്നും അവർ ചൂണ്ടിക്കാട്ടി. മുൻ സൈനിക ഉദ്യോഗസ്ഥനായ ജയർ ബോൾസൊനാരോ, 2023ലെ തിരഞ്ഞെടുപ്പിൽ വീണ്ടും അധികാരത്തിലെത്താനുള്ള ശ്രമം പരാജയപ്പെട്ടതിനു പിന്നാലെ അട്ടിമറിശ്രമവുമായി ബന്ധപ്പെട്ട കേസിൽ വീട്ടുതടങ്കലിലാണെന്നും അവർ പറഞ്ഞു. ഫ്ലാവിയോ ബോൾസൊനാരോ അമേരിക്കൻ നേതൃത്വവുമായി അടുത്ത നിലപാടുകൾ പുലർത്തുന്നയാളാണെന്നും സിമ്മർമാൻ വിലയിരുത്തി.
വിജയാഘോഷവുമായി ലുലയുടെ അനുയായികൾ
വിജയവാർത്ത പുറത്തുവന്നതോടെ സാവോ പോളോയിലെ പ്രധാന പാതയായ പൗലിസ്റ്റ അവന്യൂവിലേക്ക് ലുലയുടെ നൂറുകണക്കിന് അനുയായികൾ എത്തിത്തുടങ്ങി. രാത്രി വൈകിയും ആഘോഷങ്ങൾ നടത്താനാണ് അനുയായികളുടെ തീരുമാനം. ലുലയുടെ വിജയത്തിൽ ആശ്വാസമുണ്ടെന്ന് ചെറുകിട സംരംഭകയായ റാക്വൽ കോസ്റ്റ പറഞ്ഞു. “വിജയം എപ്പോഴും സന്തോഷം നൽകുന്നതാണ്. എന്നാൽ ഇത് വെറുമൊരു വിജയമല്ല. കൂടുതൽ സാമൂഹിക നീതിയെയും നമ്മളെയും ഭാവിയെയും എങ്ങനെ കാണുന്നു എന്നതിനെയും സംബന്ധിച്ചുള്ളതാണ്,” അവർ പറഞ്ഞു. എന്നാൽ ലുല വീണ്ടും അധികാരത്തിലെത്തുന്നത് സമ്പദ്‌വ്യവസ്ഥയെ ദോഷകരമായി ബാധിക്കുമെന്ന് 51കാരനായ വ്യവസായി റോഡ്രിഗോ വാലന്റിം അഭിപ്രായപ്പെട്ടു. “ആളുകൾക്ക് എങ്ങനെയാണ് ലുലയ്ക്ക് വോട്ട് ചെയ്യാൻ കഴിയുന്നതെന്ന് എനിക്ക് മനസ്സിലാകുന്നില്ല. രാജ്യം തകർച്ചയിലേക്ക് നീങ്ങുകയാണ്,” അദ്ദേഹം പറഞ്ഞു.
സാമ്പത്തിക പ്രതിസന്ധി വെല്ലുവിളിയാകും
തിരഞ്ഞെടുപ്പ് പ്രചാരണകാലത്ത് ബ്രസീലിന്റെ സാമ്പത്തിക സ്ഥിതി ലുലയ്ക്ക് വലിയ വെല്ലുവിളിയായിരുന്നുവെന്ന് സിമ്മർമാൻ പറഞ്ഞു. രാജ്യത്തെ സാമ്പത്തിക പ്രതിസന്ധി ജനങ്ങളിൽ അസംതൃപ്തി വർധിപ്പിക്കുകയും ലുലയുടെ പ്രചാരണത്തെ പ്രതികൂലമായി ബാധിക്കുകയും ചെയ്തിരുന്നു. അടുത്ത വർഷം ബ്രസീൽ സമ്പദ്‌വ്യവസ്ഥ 2.3 ശതമാനം മാത്രം വളരുമെന്നാണ് സർക്കാർ പ്രവചനം. ഉയർന്ന പലിശനിരക്കുകളും വർധിച്ചുവരുന്ന പൊതുകടവും സാമ്പത്തിക ആശങ്കകൾ ശക്തമാക്കുന്നു. രാജ്യത്തിന്റെ മൊത്ത ആഭ്യന്തര ഉൽപാദനത്തിന്റെ (ജിഡിപി) 82 ശതമാനത്തിലധികമായി പൊതുകടം ഉയർന്നിട്ടുണ്ട്. കോവിഡ് മഹാമാരിക്കുശേഷമുള്ള കാലയളവിലെ ഏറ്റവും ഉയർന്ന നിരക്കാണിത്.
സർക്കാരിന്റെ ചെലവഴിക്കൽ നയങ്ങളെയാണ് ലുലയുടെ വിമർശകർ കടബാധ്യത വർധിച്ചതിന് പ്രധാനമായും കുറ്റപ്പെടുത്തുന്നത്. എന്നാൽ കടത്തിലെ വർധനയുടെ ഭൂരിഭാഗത്തിനും കാരണം പലിശച്ചെലവുകളാണെന്നാണ് റിപ്പോർട്ട് വ്യക്തമാക്കുന്നത്. ജനാധിപത്യ സംവിധാനത്തിലൂടെ അധികാരം നിലനിർത്തിയ ലുലയ്ക്ക് ഇനി സാമ്പത്തിക പ്രതിസന്ധി നേരിടുന്നതിനൊപ്പം രാജ്യത്തെ രാഷ്ട്രീയ ഭിന്നതകൾ കുറയ്ക്കുകയെന്ന വെല്ലുവിളിയും മുന്നിലുണ്ട്.
AP/Reuters/ABC