വിദേശത്ത് ജോലിയും ജീവിതവുമായി സെറ്റിൽ ചെയ്യുവാനുള്ള ആഗ്രഹം ഇല്ലാത്ത മലയാളികൾ കുറവായിരിക്കും. ഒരുകാലത്ത് ഗൾഫ് രാജ്യങ്ങളിലേക്കായിരുന്നു ഈ കുടിയേറ്റമെങ്കിൽ ഇന്നത് പാശ്ചാത്യ രാജ്യങ്ങളിലേക്കും മറ്റു ഭൂഖണ്ഡങ്ങളിലേക്കും വ്യാപിച്ചിരിക്കുകയാണ്. ഇപ്പോഴിതാ, തൊഴിൽ തേടി കുടിയേറുന്ന രാജ്യങ്ങളിൽ ഇന്ത്യക്കാർക്ക് പ്രിയപ്പെട്ടതായി ഓസ്ട്രേലിയ മാറിയെന്നാണാണ് കണക്കുകൾ പറയുന്നത്.
താത്കാലിക തൊഴിൽ വിസയിൽ ഓസ്ട്രേലിയയിൽ എത്തുന്ന ഇന്ത്യക്കാരുടെ എണ്ണത്തിൽ വൻ വർധനവാണ് സമീപ വർഷങ്ങളിൽ ഉണ്ടായിരിക്കുന്നത്. 2024-2025 കാലയളവിൽ, ജൂൺ 30 വരെ, 26,000-ത്തിലധികം ഇന്ത്യക്കാർക്ക് ഓസ്ട്രേലിയയിൽ ജോലി ചെയ്യുന്നതിനായി താൽക്കാലിക സ്‌കിൽഡ് വർക്കർ വിസ ലഭിച്ചു. ഓസ്ട്രേലിയ അനുവദിച്ച എല്ലാ വിസകളുടെയും 20.6 ശതമാനവുമായി, ഈ വർഷം താൽക്കാലിക സ്‌കിൽഡ് വർക്കർമാരുടെ പട്ടികയിൽ ഇന്ത്യ ഒന്നാമതെത്തി, തൊട്ടുപിന്നാലെ ഫിലിപ്പീൻസ്, യുണൈറ്റഡ് കിംഗ്ഡം, നേപ്പാൾ എന്നിവയുണ്ട്.
2023-2024 കാലയളവിൽ, 2024 ജൂൺ വരെ, ഓസ്ട്രേലിയ ആകെ 18,400 താൽക്കാലിക സ്‌കിൽഡ് വർക്കർ വിസകൾ ആണ് നൽകിയത്. എന്നാൽ 2024- 2025 കാലയളവിൽ, 2025 ജൂൺ ആയപ്പോഴേക്കും, ഇന്ത്യക്കാർക്ക് മാത്രം നൽകിയ വിസകളുടെ എണ്ണം 26,880 ആയി ഉയർന്നു. അതായത്, ഒരു വർഷത്തിനുള്ളിൽ മാത്രം 46 ശതമാനം വർധനവാണ് എണ്ണത്തിൽ ഉണ്ടായിട്ടുള്ളത്.
താൽക്കാലിക തൊഴിലാളി വിസ അപേക്ഷകർക്കായി ഏറ്റവും കൂടുതൽ നാമനിർദ്ദേശം ചെയ്യപ്പെട്ട തസ്തികകൾ ന്യൂ സൗത്ത് വെയിൽസിൽ രേഖപ്പെടുത്തി, 5,180 തൊഴിലാളികൾ, വിക്ടോറിയ (3,960), ക്വീൻസ്‌ലാൻഡ് (1,340), വെസ്റ്റേൺ ഓസ്ട്രേലിയ (1,080) എന്നിവയാണ് തൊട്ടുപിന്നിൽ.
പ്രാഥമിക വിസ അപേക്ഷകളിലും (തൊഴിലാളികൾക്ക് നൽകുന്ന വിസകൾ) ദ്വിതീയ അപേക്ഷകളിലും (ഭാര്യമാർ, പങ്കാളികൾ അല്ലെങ്കിൽ ആശ്രിതരായ കുട്ടികൾ എന്നിവർക്ക് നൽകുന്ന വിസകൾ) ഗണ്യമായ വളർച്ച രേഖപ്പെടുത്തി. 2024 ജൂൺ വരെ, ഓസ്ട്രേലിയ 7,770 പ്രാഥമിക വിസകളും 10,620 സെക്കൻഡറി വിസകളും നൽകിയിരുന്നു. 2024–2025 കാലയളവിൽ, ജൂൺ 30 വരെ, ഈ എണ്ണം 12,360 പ്രാഥമിക വിസകളും 14,520 സെക്കൻഡറി വിസകളുമായി വർദ്ധിച്ചു.