സിഡ്‌നി: 2027 മാർച്ചിൽ നടക്കാനിരിക്കുന്ന ന്യൂ സൗത്ത് വെയിൽസ് (എൻഎസ്ഡബ്ല്യു) സംസ്ഥാന തിരഞ്ഞെടുപ്പിന് മുന്നോടിയായി സമ്പദ്‌വ്യവസ്ഥയ്ക്ക് ഉണർവ് നൽകുമെന്നും നികുതി കുറയ്ക്കാനും തൊഴിൽ അവസരങ്ങൾ സൃഷ്ടിക്കാനും താങ്ങാനാവുന്ന നിരക്കിൽ വീടുകൾ ലഭ്യമാക്കാനും നടപടിയെടുക്കുമെന്നും പ്രതിപക്ഷ നേതാവ് കെല്ലി സ്ലോൺ. തിരഞ്ഞെടുപ്പ് ലക്ഷ്യമിട്ടുള്ള ആദ്യ വീഡിയോ സന്ദേശത്തിലാണ് ലിബറൽ പാർട്ടി നേതാവ് വാഗ്ദാനങ്ങൾ മുന്നോട്ടുവെച്ചത്.
ലേബർ പാർട്ടിയുടെ ഭരണത്തിൽ സംസ്ഥാനത്തിന്റെ സമ്പദ്‌വ്യവസ്ഥ ഏറ്റവും വേഗത്തിൽ വളരുന്നതിൽനിന്ന് ഏറ്റവും മന്ദഗതിയിലുള്ളതിലേക്കു മാറിയെന്ന് സ്ലോൺ ആരോപിച്ചു. കഠിനാധ്വാനം ചെയ്താൽ ജീവിതത്തിൽ മുന്നേറാമെന്ന സാഹചര്യം മാറി, ജനങ്ങൾ ഇപ്പോൾ അതിജീവനത്തിനായി പോരാടുകയാണെന്നും അവർ പറഞ്ഞു. “സമ്പദ്‌വ്യവസ്ഥയെ വീണ്ടും ചലിപ്പിച്ച് നികുതി കുറയ്ക്കുകയും തൊഴിലവസരങ്ങൾ സൃഷ്ടിക്കുകയും താങ്ങാനാവുന്ന ഭവനങ്ങൾ ലഭ്യമാക്കുകയും ചെയ്യും,” സ്ലോൺ വ്യക്തമാക്കി. ജനങ്ങൾ നേരിടുന്ന ജീവിതച്ചെലവിലെ പ്രതിസന്ധികൾ മനസ്സിലാക്കിയാണ് ലിബറൽ പാർട്ടി ഭാവി പദ്ധതികൾ തയ്യാറാക്കുന്നതെന്നും അവർ അവകാശപ്പെട്ടു. വൗക്ലൂസ് മണ്ഡലത്തിൽനിന്നുള്ള എംഎൽഎയായ സ്ലോൺ 2023ലാണ് ആദ്യമായി നിയമസഭയിലെത്തിയത്. മുൻ മാധ്യമപ്രവർത്തകയും ലൈഫ് എജ്യുക്കേഷൻ എൻഎസ്ഡബ്ല്യുവിന്റെ മുൻ ചീഫ് എക്സിക്യൂട്ടീവുമായ അവർ കഴിഞ്ഞ വർഷം പാർട്ടിക്കുള്ളിലെ നേതൃത്വമാറ്റത്തിലൂടെയാണ് പ്രതിപക്ഷ നേതൃസ്ഥാനത്തെത്തിയത്. മാർക്ക് സ്പീക്ക്മാനായിരുന്നു മുൻ പ്രതിപക്ഷ നേതാവ്.
ജീവിതച്ചെലവും ഭവനപ്രതിസന്ധിയും തിരഞ്ഞെടുപ്പിൽ നിർണായകം
മുഖ്യമന്ത്രി ക്രിസ് മിൻസിന്റെ നേതൃത്വത്തിലുള്ള ലേബർ സർക്കാരിന് താരതമ്യേന ഉയർന്ന ജനപ്രീതി നിലനിൽക്കുന്നുണ്ടെങ്കിലും, സംസ്ഥാനത്ത് ജീവിതച്ചെലവും ഭവനവിലയും ഉയരുന്നത് പ്രധാന വെല്ലുവിളിയാണ്. മധ്യപൂർവദേശത്തെ യുദ്ധത്തെ തുടർന്നുള്ള വിലക്കയറ്റവും ജനങ്ങളുടെ സാമ്പത്തിക സമ്മർദം വർധിപ്പിക്കുന്നതായി റിപ്പോർട്ടിൽ പറയുന്നു. ഭവനപ്രതിസന്ധി പരിഹരിക്കുന്നതിനുള്ള ആസൂത്രണ പരിഷ്കാരങ്ങൾ, പുതിയ പദ്ധതികൾ, ജീവിതച്ചെലവ് കുറയ്ക്കാനുള്ള സഹായങ്ങൾ എന്നിവയ്ക്കാണ് മിൻസ് സർക്കാർ ഊന്നൽ നൽകുന്നത്. അടിസ്ഥാനസൗകര്യ വികസനത്തിൽ ഭാവിക്കായുള്ള ആസൂത്രണം ലേബർ സർക്കാർ പരാജയപ്പെടുത്തിയെന്നാണ് ലിബറലുകളുടെ വിമർശനം.
ബോണ്ടി ജങ്ഷനിലെ വെസ്റ്റ്ഫീൽഡ് കുത്തിക്കൊലപാതകവും ബോണ്ടി ബീച്ചിലെ ഭീകരാക്രമണവും ഉൾപ്പെടെ സംസ്ഥാനത്തെ പ്രതിസന്ധികൾക്കിടയിലാണ് മിൻസ് സർക്കാർ ഭരണം തുടരുന്നത്. 2025 ഡിസംബറിലെ ആക്രമണത്തിനു പിന്നാലെ പ്രഖ്യാപിച്ച തോക്കുനിയന്ത്രണ പരിഷ്കാരങ്ങളെ ആദ്യം പിന്തുണച്ച സ്ലോൺ പിന്നീട് ദേശീയ തോക്കുകൾ തിരിച്ചുവാങ്ങൽ പദ്ധതി അന്വേഷണ റിപ്പോർട്ട് വരുന്നതുവരെ മാറ്റിവെക്കണമെന്ന് ആവശ്യപ്പെട്ടു. വിഷയത്തിൽ ദേശീയതലത്തിലുള്ള റോയൽ കമ്മിഷൻ അന്വേഷണത്തെയും അവർ നേരത്തെ പിന്തുണച്ചിരുന്നു.
വൺ നേഷൻ ഉയർത്തുന്ന വെല്ലുവിളി
ലേബർ-ലിബറൽ മുന്നണികൾക്ക് പുറമെ പോളിൻ ഹാൻസന്റെ നേതൃത്വത്തിലുള്ള വൺ നേഷൻ പാർട്ടിയുടെ വളർച്ചയും തിരഞ്ഞെടുപ്പിൽ ശ്രദ്ധാകേന്ദ്രമാകുന്നുണ്ട്. സംസ്ഥാനത്തെ വൺ നേഷൻ നേതാവ് മാർക്ക് ന്യൂമാൻ, പ്രധാന പദ്ധതികൾക്ക് മേൽനോട്ടം വഹിക്കുന്ന സ്വതന്ത്ര പ്ലാനിങ് കമ്മിഷൻ പിരിച്ചുവിടുമെന്ന് നേരത്തെ പ്രഖ്യാപിച്ചിരുന്നു.
ന്യൂ സൗത്ത് വെയിൽസിൽ വ്യക്തമായ ഭൂരിപക്ഷം നേടുക പ്രയാസകരമായേക്കാമെന്ന രാഷ്ട്രീയ സാഹചര്യത്തിൽ, തിരഞ്ഞെടുപ്പിനു ശേഷം ന്യൂനപക്ഷ ലിബറൽ സർക്കാരിന് വൺ നേഷൻ പിന്തുണ നൽകുമോയെന്നതും ചർച്ചയാകുന്നു. അടുത്ത മാസം തിരഞ്ഞെടുപ്പ് നടക്കാനിരിക്കുന്ന വിക്ടോറിയയിലും വൺ നേഷൻ സമാനമായ രാഷ്ട്രീയ പങ്ക് ലക്ഷ്യമിടുന്നുണ്ട്. 2027ലെ തിരഞ്ഞെടുപ്പിന് മുന്നോടിയായി സമ്പദ്‌വ്യവസ്ഥ, ഭവനലഭ്യത, ജീവിതച്ചെലവ്, അടിസ്ഥാനസൗകര്യ വികസനം എന്നിവ പ്രധാന രാഷ്ട്രീയ ചർച്ചകളാകുമെന്നാണ് നിലവിലെ പ്രചാരണ സൂചനകൾ.