മെച്ചപ്പെട്ട തൊഴിലവസരങ്ങളും ജീവിതനിലവാരവും തേടി ഇന്ത്യയിൽ നിന്ന് വിദേശത്തേക്ക് കുടിയേറുന്നവരുടെ എണ്ണം വർദ്ധിച്ചുവരികയാണ്. എന്നാൽ പുതിയൊരു രാജ്യത്തെ ജീവിതം പലപ്പോഴും പ്രതീക്ഷിക്കാത്ത സർപ്രൈസുകളാണ് നൽകുന്നത്. ഓസ്ട്രേലിയയിൽ താമസിക്കുന്ന ആകാൻക്ഷ എന്ന ഇന്ത്യൻ യുവതി ഇൻസ്റ്റാഗ്രാമിൽ പങ്കുവെച്ച വീഡിയോ ഇപ്പോൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
പരിഹാസരൂപേണയുള്ള വോയ്സ് ഓവറിലൂടെ ഓസ്ട്രേലിയൻ ജീവിതം ഒരു 'കെണി'യാണെന്നാണ് ആകാൻക്ഷ പറയുന്നത്. "ആരും നിങ്ങളോട് ഇത് പറയില്ല, പക്ഷേ ഓസ്ട്രേലിയയിലേക്ക് മാറുന്നത് ഒരു കെണിയാണ്. ഉയർന്ന ശമ്പളമുള്ള ജോലി വാങ്ങി വിശ്രമിക്കാമെന്നാണ് ഞാൻ കരുതിയത്, എന്നാൽ ആറ് മാസത്തിനുള്ളിൽ ഞാൻ ഈ കെണിയിൽ വീണു," അവൾ തമാശയായി പറയുന്നു.
ഇന്ത്യയിൽ ആഡംബരമായി തോന്നിയിരുന്ന പല കാര്യങ്ങളും ഓസ്ട്രേലിയയിൽ സാധാരണ ജീവിതത്തിന്റെ ഭാഗമാണെന്ന് ആകാൻക്ഷ വിവരിക്കുന്നു. രാവിലെ 6 മണിക്ക് എഴുന്നേറ്റ് ജിമ്മിൽ പോകുക, വിനോദത്തിനായി പങ്കാളിയോടൊപ്പം 10 കിലോമീറ്റർ ഹൈക്കിംഗ് നടത്തുക എന്നിവയൊക്കെ ഇപ്പോൾ പതിവാണ്. ജോലിക്കു പോകാൻ പ്രത്യേക പ്രചോദനം തോന്നുന്നുവെന്നും വാരാന്ത്യങ്ങളിൽ ജോലിഭാരത്തെക്കുറിച്ചുള്ള കുറ്റബോധമില്ലാതെ സമയം ചിലവഴിക്കാൻ സാധിക്കുന്നുണ്ടെന്നും അവൾ കൂട്ടിച്ചേർക്കുന്നു.
സുരക്ഷിതമായ നഗരങ്ങൾ, ശുദ്ധവായു, സാമ്പത്തിക സ്ഥിരത, സമാധാനപരമായ അന്തരീക്ഷം എന്നിവയാൽ താൻ ഈ ജീവിതരീതിക്ക് അടിമപ്പെട്ടുവെന്നും, അതുകൊണ്ട് തന്നെ ഇതൊരു '10/10 ട്രാപ്പ്' ആണെന്നുമാണ് യുവതി കുറിച്ചത്. രാത്രിയിൽ ഭയമില്ലാതെ നടക്കാൻ കഴിയുന്നതും പ്രകൃതിയോട് ചേർന്ന് സമയം ചിലവഴിക്കാൻ സാധിക്കുന്നതും വലിയ മാറ്റങ്ങളായി അവൾ ചൂണ്ടിക്കാട്ടുന്നു.
സോഷ്യൽ മീഡിയയിൽ സമ്മിശ്ര പ്രതികരണങ്ങളാണ് വീഡിയോയ്ക്ക് ലഭിക്കുന്നത്. "ഏറ്റവും നല്ല തരം കെണി" എന്നും "എല്ലാവർക്കും ഇത്തരമൊരു കെണി അർഹതപ്പെട്ടതാണ്" എന്നുമാണ് പലരും കമന്റ് ചെയ്യുന്നത്.