കാൻബെറ: 25 വർഷത്തെ സേവനത്തിനു ശേഷം ജീവനക്കാരിയെ പറഞ്ഞുവിട്ട് പകരം എഐ ചാറ്റ്ബോട്ടിനെ ഉപയോഗിച്ച് ഓസ്ട്രേലിയൻ ബാങ്ക്.
ഓസ്‌ട്രേലിയയിലെ ഏറ്റവും വലിയ ബാങ്കായ കോമൺവെൽത്ത് ബാങ്ക് ഓഫ് ഓസ്‌ട്രേലിയയിൽ (CBA) 25 വർഷം ജോലി ചെയ്ത കാതറിൻ സള്ളിവൻ എന്ന 63-കാരിയായ വനിത, താൻ പരിശീലിപ്പിച്ച ആർട്ടിഫിഷ്യൽ ഇന്റലിജൻസ് (AI) ചാറ്റ്ബോട്ട് തന്റെ ജോലി എടുത്തുകളഞ്ഞതായി വെളിപ്പെടുത്തി.
ജൂലൈ മാസത്തിൽ 44 ജീവനക്കാരോടൊപ്പം സള്ളിവനും ജോലിയിൽ നിന്ന് പിരിച്ചുവിടപ്പെട്ടു. ബാങ്കിന്റെ എഐ സാങ്കേതികവിദ്യ ഉപയോഗവുമായി ബന്ധപ്പെട്ട് ജോലി നഷ്ടപ്പെടുന്നത് ഇതാദ്യമാണ്.
കാൻബറയിൽ നടന്ന എഐ സിമ്പോസിയത്തിൽ ആണ് താൻ പരിശീലിപ്പിച്ച എഐ തന്നെ തന്റെ ജോലി കളഞ്ഞ കാര്യം കാതറിൻ സള്ളിവൻ പറഞ്ഞത്.
ബാങ്കിന്റെ 'ബംബിൾബീ' എന്ന എഐ ചാറ്റ്ബോട്ടിനായി സ്ക്രിപ്റ്റുകൾ തയ്യാറാക്കുകയും പ്രതികരണങ്ങൾ പരിശോധിക്കുകയും ചെയ്ത തന്റെ ജോലി, തന്റെ തൊഴിൽ നഷ്ടപ്പെടുത്തുമെന്ന് ഒരിക്കലും വിചാരിച്ചിരുന്നില്ലെന്ന് സള്ളിവൻ പറഞ്ഞു. "ഞാൻ എന്റെ ജോലി എടുത്തുകളഞ്ഞ ഒരു ചാറ്റ്ബോട്ടിനെ പരിശീലിപ്പിക്കുകയായിരുന്നു," ന്യൂസ് കോർപ്പ് ഓസ്‌ട്രേലിയയോട് വെളിപ്പെടുത്തി.
"മെസേജിംഗ് ജോലികൾ വിദേശത്തേക്ക് മാറ്റുമെന്ന് ഞങ്ങൾക്കറിയാമായിരുന്നു, പക്ഷേ 25 വർഷത്തെ സേവനത്തിന് ശേഷം എനിക്ക് ജോലി നഷ്ടപ്പെടുമെന്ന് ഞാൻ ഒരിക്കലും കരുതിയിരുന്നില്ല," സള്ളിവൻ കൂട്ടിച്ചേർത്തു. ചാറ്റ്ബോട്ടിന്റെ പരിശീലനം പൂർത്തിയായ ശേഷം മറ്റൊരു വിഭാഗത്തിലേക്ക് മാറ്റപ്പെടുമെന്നാണ് അവർ പ്രതീക്ഷിച്ചിരുന്നത്. എന്നാൽ, തന്റെ സേവനം ഇനി ആവശ്യമില്ലെന്ന് അറിയിക്കപ്പെട്ടപ്പോൾ "ഞെട്ടലാണ്" ഉണ്ടായതെന്ന് അവർ പറഞ്ഞു.
"എഐയുടെ ഉപയോഗത്തെ ഞാൻ സ്വാഗതം ചെയ്യുന്നു, ജോലിസ്ഥലത്തും പുറത്തും അതിന്റെ പ്രയോജനങ്ങൾ ഞാൻ കാണുന്നു. എന്നാൽ, പകർപ്പവകാശ ലംഘനങ്ങൾ തടയാനും മനുഷ്യരെ പകരം വയ്ക്കുന്നത് നിയന്ത്രിക്കാനും നിയന്ത്രണങ്ങൾ ആവശ്യമാണ്," അവർ അഭിപ്രായപ്പെട്ടു.
AI-യുടെ വർദ്ധിച്ചുവരുന്ന സ്വാധീനവും തൊഴിൽ മേഖലയിലെ മാറ്റങ്ങളെക്കുറിച്ചുള്ള ആശങ്കകളും സള്ളിവന്റെ അനുഭവം ഉയർത്തിക്കാട്ടുന്നു.