ടെഹ്റാൻ: ലോകത്തെ കടുത്ത ആശങ്കയിലാഴ്ത്തിയ പശ്ചിമേഷ്യൻ യുദ്ധത്തിന് അറുതി വരുത്തിക്കൊണ്ട് ഇറാനും അമേരിക്കയും സമാധാന കരാറിലേക്ക് നീങ്ങുന്നതായി സൂചന. കരാർ യാഥാർത്ഥ്യമാകുന്നതോടെ ആഗോള എണ്ണവ്യാപാരത്തിന്റെ ഹൃദയമിടിപ്പായ ഹോർമുസ് കടലിടുക്കിലൂടെയുള്ള (Strait of Hormuz) കപ്പൽ ഗതാഗതം 30 ദിവസത്തിനകം പൂർണ്ണതോതിൽ പുനഃസ്ഥാപിക്കുമെന്ന് ഇറാന്റെ ഔദ്യോഗിക വാർത്താ ഏജൻസിയായ 'തസ്നിം' (Tasnim) റിപ്പോർട്ട് ചെയ്തു. ഇരുരാജ്യങ്ങളും തമ്മിലുള്ള ഉന്നതതല ചർച്ചകൾ അവസാന ഘട്ടത്തിലാണെന്നാണ് ലഭ്യമാകുന്ന വിവരങ്ങൾ.
പുതിയ ധാരണപ്രകാരം ഹോർമുസ് കടലിടുക്കിലെ കപ്പൽ ഗതാഗതം സാധാരണ നിലയിലാക്കുന്നതിനൊപ്പം, ഇറാനെതിരെ അമേരിക്ക ഏർപ്പെടുത്തിയിരുന്ന നാവിക ഉപരോധം (Naval Blockade) 30 ദിവസത്തിനുള്ളിൽ പൂർണ്ണമായി പിൻവലിക്കും. കൂടാതെ വിവിധ വിദേശ ബാങ്കുകളിൽ അമേരിക്ക മരവിപ്പിച്ചു നിർത്തിയിരിക്കുന്ന ഇറാന്റെ ഫണ്ടുകളിൽ ഒരു ഭാഗം വിട്ടുകൊടുക്കാനും കരാറിൽ വ്യവസ്ഥയുണ്ടെന്നാണ് തസ്നിം ന്യൂസ് ഏജൻസി വ്യക്തമാക്കുന്നത്. ഇന്ത്യ സന്ദർശനത്തിനിടെ യു.എസ് സ്റ്റേറ്റ് സെക്രട്ടറി മാർക്കോ റൂബിയോ (Marco Rubio), പശ്ചിമേഷ്യൻ പ്രതിസന്ധിയിൽ ഏതാനും മണിക്കൂറുകൾക്കകം നല്ല വാർത്തകൾ പ്രതീക്ഷിക്കാമെന്ന് പ്രസ്താവിച്ചിരുന്നു. ചർച്ചകളിൽ വൻ പുരോഗതിയുണ്ടെന്ന അദ്ദേഹത്തിന്റെ വാക്കുകൾക്ക് പിന്നാലെയാണ് ഇറാന്റെ ഭാഗത്തുനിന്നും സ്ഥിരീകരണം വരുന്നത്.
കഴിഞ്ഞ ഫെബ്രുവരി 28-ന് അമേരിക്കയും ഇസ്രായേലും സംയുക്തമായി ഇറാനിൽ നടത്തിയ വ്യോമാക്രമണത്തോടെയാണ് മേഖലയിൽ യുദ്ധം പൊട്ടിപ്പുറപ്പെട്ടത്. ഇതിന് തിരിച്ചടിയായി ലോകത്തെ ആകെ ഊർജ്ജ വിതരണത്തിന്റെ 20 ശതമാനവും കടന്നുപോകുന്ന തന്ത്രപ്രധാനമായ ഹോർമുസ് കടലിടുക്ക് ഇറാൻ അടച്ചിടുകയായിരുന്നു. ഇതുവഴിയുള്ള ഇന്ധന നീക്കം തടസ്സപ്പെട്ടത് ആഗോളതലത്തിൽ വൻ എണ്ണപ്രതിസന്ധിക്കും വിലക്കയറ്റത്തിനും കാരണമായിരുന്നു. പുതിയ സമാധാന ഉടമ്പടി യാഥാർത്ഥ്യമായാൽ അത് അന്താരാഷ്ട്ര വിപണിയിലും ആഗോള സാമ്പത്തിക രംഗത്തും വലിയ ആശ്വാസം പകരും.
