ലക്ഷക്കണക്കിന് H-1B വിസ അപേക്ഷകരെയും അവരുടെ ആശ്രിതരെയും ബാധിക്കുന്ന തരത്തിൽ ഡിജിറ്റൽ-വെറ്റിംഗ് നടപടികൾ പുതുക്കി യുഎസ്. എച്ച്1ബിക്ക് അപേക്ഷിക്കുന്നവരും എച്ച്4 വിസയ്ക്ക് അപേക്ഷിക്കുന്ന അവരുടെ ആശ്രിതരും തങ്ങളുടെ സമൂഹമാധ്യമ അക്കൗണ്ടുകൾ ആർക്കും സന്ദർശിക്കാവുന്ന വിധത്തിൽ പബ്ലിക് ആക്കണമെന്ന് സ്റ്റേറ്റ് ഡിപ്പാർട്മെന്റ് അറിയിച്ചു.
2025 ഡിസംബർ 15 മുതൽ, H-1B, H-4 വിസ അപേക്ഷകർ അവരുടെ സോഷ്യൽ മീഡിയ പ്രൊഫൈലുകൾ പൊതുജനങ്ങൾക്ക് ലഭ്യമാക്കണം, അതുവഴി കോൺസുലാർ ഉദ്യോഗസ്ഥർക്ക് അപേക്ഷാ അവലോകനത്തിന്റെ ഭാഗമായി ഓൺലൈൻ പ്രവർത്തനം പരിശോധിക്കാൻ കഴിയും.
ഇതുവരെ വിദ്യാർത്ഥി, എക്സ്ചേഞ്ച് വിസ വിഭാഗങ്ങളായ F, M, J വിസകളിൽ മാത്രമാണ് സോഷ്യൽ മീഡിയ സ്ക്രീനിംഗ് ബാധകമായിരുന്നത്. ഇപ്പോൾ ഈ പരിശോധന H-1B തൊഴിലാളികളിലേക്കും അവരുടെ ജീവിത പങ്കാളികളിലേക്കും വ്യാപിപ്പിച്ചിരിക്കുകയാണ്. വിസ അനുവദിക്കുന്നത് ദേശീയ സുരക്ഷാ വിഷയമാണെന്നും ലഭ്യമായ എല്ലാ വിവരങ്ങളും പരിശോധിക്കുമെന്നും സ്റ്റേറ്റ് ഡിപ്പാർട്ട്മെന്റ് അറിയിച്ചു.
പുതിയ മാർഗനിർദ്ദേശപ്രകാരം കോൺസുലർ ഓഫീസർമാർ ഇനി ചുവടെ പറയുന്ന കാര്യങ്ങളിൽ കൂടുതൽ കർശന പരിശോധന നടത്തും:
ജോലി സംബന്ധിച്ച കൂടുതൽ വിശദമായ പരിശോധന
ജോലി ചുമതലകളുടെ കൃത്യത ഉറപ്പാക്കൽ
അധിക പശ്ചാത്തല പരിശോധനകൾ
സോഷ്യൽ മീഡിയ ഉൾപ്പെടെയുള്ള മുഴുവൻ ഓൺലൈൻ സാന്നിധ്യ വിലയിരുത്തൽ
എല്ലാ സോഷ്യൽ മീഡിയ അക്കൗണ്ടുകളും പബ്ലിക്കായി സജ്ജമാക്കണം. ഇതിലൂടെ താഴെ പറയുന്ന കാര്യങ്ങൾ പരിശോധിക്കും:
അമേരിക്കക്കെതിരായ വൈരാഗ്യ പ്രവണതകൾ
നിയമവിരുദ്ധമായ സെമിറ്റിക് വിരുദ്ധ അക്രമത്തിനോ ഉപദ്രവത്തിനോ ഉള്ള പിന്തുണ
ഭീകരവാദ പ്രവർത്തനങ്ങൾക്ക് അനുകൂലമായ ഉള്ളടക്കം
