ടിറാന: അഴിമതിക്കെതിരെ പോരാടാൻ ലോകത്താദ്യമായി ഒരു എഐ മന്ത്രിയെ നിയമിച്ച് അൽബേനിയൻ മന്ത്രിസഭ. അൽബേനിയൻ ഭാഷയിൽ സൂര്യൻ എന്നർഥം വരുന്ന ‘ഡിയല്ല’ എന്നാണ് പുതിയ മന്ത്രിയുടെ പേര്. പരമ്പരാഗത അൽബേനിയൻ വസ്ത്രം ധരിച്ച ഒരു യുവതിയുടെ ചിത്രമാണ് എഐ മന്ത്രിക്ക് നൽകിയിരിക്കുന്നത്. അഴിമതിക്കെതിരെ പോരാടുക എന്നതാണ് ഈ മന്ത്രിയുടെ ചുമതല. എന്നാൽ ഡിയല്ല പ്രവർത്തിക്കുന്നത് ഏതെങ്കിലും വ്യക്തിയുടെ മേൽനോട്ടത്തിലാണോ എന്നത് സംബന്ധിച്ച് സർക്കാർ വ്യക്തമാക്കിയിട്ടില്ല.
സർക്കാറിന്റെ കരാറുകൾ കമ്പനികൾക്ക് നൽകുക, പൊതുവായ ടെൻഡറുകൾക്ക് മേൽനോട്ടം വഹിക്കുക തുടങ്ങിയവയാണ് എഐ മന്ത്രിയുടെ ജോലി. പുതിയ മന്ത്രി പൊതു ടെൻഡറുകൾ പൂർണമായും അഴിമതി മുക്തമാക്കുമെന്ന് പ്രധാനമന്ത്രി ഈദി രമ പറഞ്ഞു. ജനുവരിയിൽ ആദ്യമായി എഐ മന്ത്രി പ്രവർത്തിച്ച് തുടങ്ങിയതിന് ശേഷം ഇതുവരെ 36,000 സർക്കാർ രേഖകളിലെ പ്രശ്‌നങ്ങൾ പരിഹരിക്കുകയും, ആയിരത്തോളം സേവനങ്ങൾ പ്ലാറ്റഫോം വഴി നൽകിയിട്ടുണ്ടെന്നും സർക്കാർ രേഖകൾ ചൂണ്ടികാണിക്കുന്നു.