മാഡ്രിഡ്: പതിറ്റാണ്ടുകളായി താമസിച്ചിരുന്ന വാടകവീട്ടിൽനിന്ന് 87 വയസ്സുള്ള വൃദ്ധയെ നിർബന്ധപൂർവ്വം കുടിയൊഴിപ്പിച്ചതിനെത്തുടർന്ന് സ്പെയിനിൽ വൻ ജനകീയ പ്രക്ഷോഭം. ഭവന പ്രതിസന്ധി രൂക്ഷമായ രാജ്യത്ത് കുടിയാന്മാർക്ക് നിയമപരമായ സംരക്ഷണം വേണമെന്നും ബദൽ പാർപ്പിടമില്ലാതെ കുടിയൊഴിപ്പിക്കുന്നത് നിരോധിക്കണമെന്നും ആവശ്യപ്പെട്ട് പതിനായിരക്കണക്കിന് ആളുകളാണ് തലസ്ഥാനമായ മാഡ്രിഡിൽ തെരുവിലിറങ്ങിയത്. 1956 മുതൽ സ്വന്തം കുടുംബം വാടകയ്ക്കെടുത്ത മാഡ്രിഡിലെ അപ്പാർട്ട്മെന്റിൽ കഴിഞ്ഞിരുന്ന മരിയ ഡെൽ കാർമെൻ അബാസ്കൽ എന്ന വയോധികയെ സ്ട്രെച്ചറിലാക്കി വീട്ടിൽനിന്ന് ആംബുലൻസിലേക്ക് മാറ്റിയ നാടകീയ രംഗങ്ങളാണ് വൻ പ്രതിഷേധത്തിന് തിരികൊളുത്തിയത്.
കെട്ടിടം വാങ്ങിയ സ്വകാര്യ നിക്ഷേപ കമ്പനി (Investment fund) പ്രതിമാസ വാടക 500 യൂറോയിൽ നിന്ന് പെട്ടെന്ന് 2,650 യൂറോയായും പിന്നീട് 1,650 യൂറോയായും കുത്തനെ ഉയർത്തുകയായിരുന്നു. പെൻഷൻ വരുമാനം മാത്രമുള്ള മരിയക്ക് ഇത് താങ്ങാൻ കഴിയാതെ വന്നതോടെയാണ് കുടിയൊഴിപ്പിക്കൽ നടപടികൾ ഉണ്ടായത്. മൂന്ന് തവണ കോടതികൾ ഒഴിപ്പിക്കൽ തടഞ്ഞിരുന്നെങ്കിലും ഒടുവിൽ നടപടി നടപ്പാക്കുകയായിരുന്നു. ഇതോടെ രാജ്യത്തെ ഭവന പ്രതിസന്ധിയുടെയും കോർപ്പറേറ്റ് കടന്നുകയറ്റത്തിന്റെയും പ്രതീകമായി മരിയ മാറി. മാഡ്രിഡിലെ പ്യൂർട്ട ഡെൽ സോൾ ചത്വരത്തിൽ ടെന്റുകൾ സ്ഥാപിച്ച് കുത്തിയിരുന്ന പ്രതിഷേധക്കാർ, നിക്ഷേപ ഫണ്ടുകൾ സാധാരണക്കാരുടെ പാർപ്പിടങ്ങൾ കൈയടക്കുന്നത് തടയാൻ കർശന നിയമങ്ങൾ കൊണ്ടുവരണമെന്ന് ആവശ്യപ്പെട്ടു.