കാലിഫോര്ണിയ: ചൈനക്ക് വേണ്ടി ചാര പ്രവര്ത്തനം നടത്തിയെന്ന് ആരോപിച്ചുള്ള കേസിന് പിന്നാലെ അമേരിക്കയിലെ സതേൺ കാലിഫോർണിയയിലുള്ള അർക്കേഡിയ നഗരത്തിലെ മേയർ ഐലീൻ വാംഗ്(58)രാജിവെച്ചു. അർക്കാഡിയയിലെ മേയറായ എലീൻ വാങ് ചൈനീസ് സർക്കാരിന്റെ അനധികൃത ഏജന്റായി പ്രവർത്തിച്ചുവെന്നായിരുന്നു കേസ്. ചൈനീസ് ഭരണകൂടത്തിന് വേണ്ടി യു.എസിൽ രഹസ്യമായി പ്രവർത്തിച്ചുവെന്ന കുറ്റം ഇവർ സമ്മതിച്ചു. പിന്നാലെ എലീൻ മേയർ പദവിയിൽ നിന്നും രാജി വെക്കുകയായിരുന്നു. യുഎസ് സർക്കാരിനെ അറിയിക്കാതെ വിദേശ രാജ്യത്തിന് വേണ്ടി ചാരവൃത്തിയിലേർപ്പെട്ടു എന്ന കുറ്റമാണ് ഐലീനെതിരെ ചുമത്തിയത്. പരമാവധി 10 വർഷം വരെ തടവ് ശിക്ഷ ലഭിക്കാവുന്ന കുറ്റമാണിത്.
2020 മുതൽ 2022 വരെയുള്ള കാലയളവിലാണ് എലീൻ ചൈനക്ക് വേണ്ടി ചാര പ്രവർത്തനം നടത്തിയത്. ചൈനീസ് ഉദ്യോഗസ്ഥരുടെ നിർദ്ദേശപ്രകാരം ചൈനയ്ക്ക് അനുകൂലമായ വാർത്തകളും ലേഖനങ്ങളും പ്രചരിപ്പിക്കാൻ ഇവർ സഹായിച്ചുവെന്നും ഇതിനായി 'യുഎസ് ന്യൂസ് സെന്റർ' എന്ന വെബ്സൈറ്റ് ഉപയോഗിച്ചു എന്നുമാണ് മേയർക്കെതിരെ ആരോപിക്കപ്പെട്ട കുറ്റം. വാംഗിന്റെ മുൻ പ്രതിശ്രുത വരൻ യാവോനിംഗ് മൈക്ക് സൺ ഇതേ കുറ്റത്തിന് നിലവിൽ നാല് വർഷത്തെ തടവ് ശിക്ഷ അനുഭവിക്കുകയാണ്. ഇയാളാണ് വാംഗിന്റെ തെരഞ്ഞെടുപ്പ് പ്രചാരണത്തിന് പണം കൈകാര്യം ചെയ്തിരുന്നത്.
2022 നവംബറിൽ ആണ് എലീൻ അർക്കാഡിയ മേയറാകുന്നത്. ലോസ് ഏഞ്ചൽസിന് സമീപമുള്ള അർക്കേഡിയ നഗരത്തിൽ ഭൂരിഭാഗവും ഏഷ്യൻ വംശജരാണ്. ചൈനീസ് വംശജരായ വലിയൊരു വിഭാഗം അവിടെ താമസിക്കുന്നുണ്ട്. തന്റെ വ്യക്തിജീവിതത്തിലുണ്ടായ തെറ്റായ ബന്ധങ്ങളാണ് തന്നെ ഇതിലേക്ക് നയിച്ചതെന്നും, നഗരത്തോടുള്ള സ്നേഹത്തിൽ മാറ്റമില്ലെന്നും എലീൻ വാങ് രാജിക്ക് പിന്നാലെ തന്റെ അഭിഭാഷകർ മുഖേന പ്രസ്താവനയിറക്കിയിട്ടുണ്ട്.