ലണ്ടൻ: ഫുട്ബോൾ ലോകം ആകാംക്ഷയോടെ കാത്തിരിക്കുന്ന 2026-ലെ ബാലൺദ്യോർ പുരസ്കാര ജേതാവിനെ പ്രഖ്യാപിക്കാൻ ഇനി മണിക്കൂറുകൾ മാത്രം. ലണ്ടൻ പലാഡിയത്തിൽ നടക്കുന്ന ചടങ്ങിൽ ബാഴ്‌സലോണയുടെ സ്പാനിഷ് കൗമാരതാരം ലമിൻ യമാൽ, ബയേൺ മ്യൂണിക്കിന്റെ ഇംഗ്ലീഷ് ഗോൾമെഷീൻ ഹാരി കെയ്ൻ, റയൽ മാഡ്രിഡിന്റെ ഫ്രഞ്ച് സ്ട്രൈക്കർ കിലിയൻ എംബാപ്പെ എന്നിവർ തമ്മിലാണ് പുരസ്കാരത്തിനായുള്ള പ്രധാന മത്സരം നടക്കുന്നത്.
ഫ്രഞ്ച് ഡാറ്റാ അനാലിസിസ് സ്ഥാപനമായ 'അവിസിയ'യുടെ ആർട്ടിഫിഷ്യൽ ഇന്റലിജൻസ് പ്രവചന പ്രകാരം 23 ശതമാനം സാധ്യതയോടെ 19-കാരനായ ലമിൻ യമാലാണ് മുന്നിൽ. സ്പെയിനിനൊപ്പം ലോകകപ്പും ബാഴ്സലോണയ്ക്കൊപ്പം ലാ ലിഗ കിരീടവും നേടിയതാണ് യമാലിന് കരുത്താകുന്നത്. പുരസ്കാരം സ്വന്തമാക്കിയാൽ 1997-ൽ 21-ാം വയസ്സിൽ പുരസ്കാരം നേടിയ ബ്രസീലിയൻ ഇതിഹാസം റൊണാൾഡോയുടെ റെക്കോർഡ് മറികടന്ന് ചരിത്രത്തിലെ ഏറ്റവും പ്രായം കുറഞ്ഞ ബാലൺദ്യോർ ജേതാവെന്ന ഖ്യാതി യമാലിന് സ്വന്തമാകും.
അതേസമയം, പ്രമുഖ ബെറ്റിംഗ് ഏജൻസികൾ ഹാരി കെയ്ന് 70 ശതമാനം സാധ്യതയാണ് കൽപ്പിക്കുന്നത്. കഴിഞ്ഞ സീസണിൽ ബയേണിനും ഇംഗ്ലണ്ടിനുമായി 73 ഗോളുകൾ അടിച്ചുകൂട്ടിയ കെയ്ൻ, ബുണ്ടസ്‌ലിഗ കിരീടവും സ്വന്തമാക്കിയിരുന്നു. ലാ ലിഗയിലും ചാമ്പ്യൻസ് ലീഗിലുമായി 40 ഗോളുകൾ നേടിയതിനൊപ്പം 2026 ലോകകപ്പിൽ ഗോൾഡൻ ബൂട്ട് സ്വന്തമാക്കിയ കിലിയൻ എംബാപ്പെ വ്യക്തിഗത കണക്കുകളിൽ മുന്നിലാണെങ്കിലും, പ്രധാന കിരീടങ്ങൾ നേടാനാകാത്തത് തിരിച്ചടിയായേക്കാം. 2024-ലെ ജേതാവ് റോഡ്രി, ലയണൽ മെസ്സി എന്നിവരും ആദ്യ അഞ്ചിൽ ഇടംപിടിച്ചിട്ടുണ്ട്.