ഏഷ്യയിലെ ഏറ്റവും വലിയ ചേരികളിലൊന്നായ മുംബൈയിലെ ധാരാവിയിൽ മൂന്ന് ദിവസം "അതിജീവിച്ചു" എന്ന് അവകാശപ്പെടുന്ന ഒരു വീഡിയോ പോസ്റ്റ് ചെയ്തതിന് ശേഷം ഓസ്ട്രേലിയൻ വ്‌ളോഗർക്ക് സോഷ്യൽ മീഡിയയിൽ കടുത്ത വിമർശനം. ഇൻസ്റ്റാഗ്രാമിലും യൂട്യൂബിലും വ്യാപകമായി പങ്കിട്ട വീഡിയോ, ദാരിദ്ര്യത്തെ വിനോദമായി ചിത്രീകരിക്കുന്നതിന്റെ ധാർമ്മികതയെക്കുറിച്ചുള്ള ചർച്ചയ്ക്കാണ് വഴി വെച്ചിരിക്കുന്നത്. പീറ്റ് ഇസഡ് എന്നറിയപ്പെടുന്ന കണ്ടന്റ് ക്രിയേറ്റർ തന്റെ വീഡിയോയ്ക്ക് "ഐ ട്രൈഡ് സർവൈവിംഗ് ഇന്ത്യാസ് 'ഡെഡ്ലീസ്റ്റ് സ്ലം'" എന്നാണ് തലക്കെട്ട് നൽകിയിരിക്കുന്നത്. റീൽ ആരംഭിക്കുന്നത് ഒരു വോയ്‌സ് ഓവറും ഒരു സ്റ്റേജ് സീനും ഉപയോഗിച്ചാണ്. ഒരു സ്ത്രീ കൊള്ളയടിക്കപ്പെടുന്നതായി അദ്ദേഹം കാണിക്കുന്നു.
തുടർന്ന് അദ്ദേഹം തന്റെ ഇന്ത്യൻ സുഹൃത്ത് ആയുഷിയെ പരിചയപ്പെടുത്തുന്നു. ആയുഷിയും ഈ യാത്രയിൽ അദ്ദേഹത്തോടൊപ്പം ചേരുന്നുണ്ട്. പിന്നീട് അദ്ദേഹം ധാരാവിയിൽ ഒരു ചെറിയ വീട് സന്ദർശിക്കുന്നതും രാത്രി വിശ്രമിക്കാൻ ഒരു കിടക്ക കണ്ടെത്തുന്നതും കാണാം.ഇൻസ്റ്റാഗ്രാം വീഡിയോ ഇവിടെ അവസാനിക്കുമ്പോൾ, യൂട്യൂബിലെ ദൈർഘ്യമേറിയ പതിപ്പിൽ അദ്ദേഹം അയൽപക്കത്തിലൂടെ നടക്കുന്നതും നാട്ടുകാരെ കണ്ടുമുട്ടുന്നതും അവരുടെ ദൈനംദിന ജീവിതം രേഖപ്പെടുത്താൻ ശ്രമിക്കുന്നതും കാണിക്കുന്നു. ഈ വീഡിയോ നിരവധി പേരെയാണ് ചൊടിപ്പിച്ചിക്കുന്നത്. "ഏറ്റവും ഭീകരമായ ചേരി" എന്ന പ്രയോഗത്തിന്റെ ഉപയോഗത്തെ പലരും വിമർശിച്ചു, ജനസാന്ദ്രതയുള്ള ഒരു റെസിഡൻഷ്യൽ ഏരിയ മാത്രമല്ല, നൂറുകണക്കിന് ചെറുകിട ബിസിനസുകളും കുടിൽ വ്യവസായങ്ങളും ഉള്ള ധാരാവിയെ സംബന്ധിച്ചിടത്തോളം ഇത് വികലവും സംവേദനാത്മകവുമായ ലേബലാണെന്ന് വിശേഷിപ്പിച്ചു. ആഗോള പ്രേക്ഷകർക്കായി കണ്ടൻ്റ് ഉണ്ടാക്കാൻ ആളുകളുടെ ബുദ്ധിമുട്ടുകൾ ഉപയോഗിച്ച് "പോവർട്ടി ടൂറിസം" എന്ന ആശയത്തിൽ മുഴുകിയിരിക്കുകയാണെന്ന് മറ്റുള്ളവർ ചിലർ ആരോപിച്ചു.