പലിശ നിരക്കുകളിൽ മാറ്റമില്ല; ആശ്വാസത്തോടെ ഓസ്‌ട്രേലിയ

സിഡ്‌നി: ഓസ്‌ട്രേലിയൻ സമ്പദ്‌വ്യവസ്ഥയുടെ വേഗത കുറയുകയും തൊഴിലില്ലായ്മ നിരക്ക് വർദ്ധിക്കുകയും ചെയ്യുന്ന പശ്ചാത്തലത്തിൽ, രാജ്യത്തെ ഔദ്യോഗിക പലിശ നിരക്കുകൾ (Official cash rate) മാറ്റമില്ലാതെ 4.35 ശതമാനത്തിൽ തന്നെ നിലനിർത്താൻ റിസർവ് ബാങ്ക് ഓഫ് ഓസ്‌ട്രേലിയ (RBA) ഐകകണ്ഠ്യേന തീരുമാനിച്ചു. ഈ വർഷത്തിന്റെ തുടക്കത്തിൽ മൂന്ന് തവണ പലിശ നിരക്ക് വർദ്ധിപ്പിച്ചതിനെത്തുടർന്ന് വിപണിയിലെ പണലഭ്യത കുറഞ്ഞിട്ടുണ്ടെങ്കിലും, പണപ്പെരുപ്പം (Inflation) ഇപ്പോഴും ലക്ഷ്യമിട്ടതിനേക്കാൾ ഉയർന്ന നിലയിലായതിനാലാണ് പലിശ നിരക്ക് തൽക്കാലം ഉയർത്തുകയോ താഴ്ത്തുകയോ ചെയ്യാതെ സ്ഥിരമായി നിർത്താൻ ആർ.ബി.എ ബോർഡ് തീരുമാനിച്ചത്. ഇതനുസരിച്ച് അടുത്ത രണ്ട് മാസത്തേക്ക് പലിശ നിരക്ക് ഇതേപടി തുടരും. ഓഗസ്റ്റ് 10, 11 തീയതികളിലാണ് അടുത്ത ബാങ്ക് യോഗം നടക്കുക.

അമേരിക്കയും ഇറാനും തമ്മിൽ ചൊവ്വാഴ്ച താല്കാലിക വെടിനിർത്തൽ ധാരണാപത്രത്തിൽ ഒപ്പുവെച്ചത് പശ്ചിമേഷ്യൻ യുദ്ധം അവസാനിക്കുമെന്ന പ്രതീക്ഷകൾ നൽകുന്നുണ്ടെങ്കിലും, സാമ്പത്തിക രംഗത്ത് കടുത്ത ജാഗ്രത വേണമെന്ന് സാമ്പത്തിക വിദഗ്ദ്ധർ മുന്നറിയിപ്പ് നൽകുന്നു. യുദ്ധം കാരണം കഴിഞ്ഞ നാല് മാസമായി തകരാറിലായ ഹോർമുസ് കടലിടുക്കിലൂടെയുള്ള (Strait of Hormuz) എണ്ണക്കപ്പൽ ഗതാഗതം ഒറ്റരാത്രികൊണ്ട് പഴയപടിയാകില്ലെന്ന് ഓക്സ്ഫോർഡ് ഇക്കണോമിക്സ് ഓസ്‌ട്രേലിയയിലെ ഹാരി മർഫി ക്രൂസ് പറഞ്ഞു. കടലിനടിയിലെ മൈനുകൾ കണ്ടെത്തി നീക്കം ചെയ്യൽ, കപ്പലുകളുടെ ഇൻഷുറൻസ് തുകയിലെ വർദ്ധനവ് എന്നിവ കാരണം അന്താരാഷ്ട്ര എണ്ണ വിപണിയിലെ വിലക്കയറ്റത്തിന്റെ ആഘാതം കുറയാൻ ആഴ്ചകളോ മാസങ്ങളോ എടുത്തേക്കാം. ഈ ഭൗമരാഷ്ട്രീയ അനിശ്ചിതത്വം കൂടി കണക്കിലെടുത്താണ് ആർ.ബി.എ നിരക്കുകൾ വർദ്ധിപ്പിക്കാതെ താല്കാലികമായി കാത്തിരിക്കാൻ തീരുമാനിച്ചത്.

പലിശ നിരക്കിന്റെ ഭാവി; സാമ്പത്തിക വിദഗ്ദ്ധർ ഭിന്നപക്ഷത്ത്:

പലിശ നിരക്കുകൾ ഇനി ഏത് ദിശയിലേക്ക് നീങ്ങുമെന്ന കാര്യത്തിൽ രാജ്യത്തെ പ്രമുഖ സാമ്പത്തിക വിദഗ്ദ്ധർക്കിടയിൽ വ്യക്തമായ അഭിപ്രായവ്യത്യാസമുണ്ട്. പണപ്പെരുപ്പം നിയന്ത്രണവിധേയമാക്കാൻ ഓഗസ്റ്റിലോ നവംബറിലോ ആർ.ബി.എ പലിശ നിരക്ക് വീണ്ടും 4.6 ശതമാനത്തിലേക്ക് ഉയർത്തിയേക്കുമെന്ന് കാപ്പിറ്റൽ ഇക്കണോമിക്സ് ഉൾപ്പെടെയുള്ള ഏജൻസികൾ പ്രവചിക്കുമ്പോൾ, പലിശ നിരക്കുകൾ ഇനി കുറയാനാണ് സാധ്യതയെന്ന് പ്രമുഖ ബാങ്കായ ANZ-ലെ സാമ്പത്തിക വിദഗ്ദ്ധൻ ആദം ബോയ്റ്റൺ വിലയിരുത്തുന്നു. എന്നാൽ ഈ കുറവ് 2027-ന്റെ രണ്ടാം പകുതിയിൽ മാത്രമേ പ്രതീക്ഷിക്കേണ്ടതുള്ളൂ എന്നും അദ്ദേഹം കൂട്ടിച്ചേർത്തു. പണപ്പെരുപ്പം തങ്ങൾ പ്രതീക്ഷിച്ച നിരക്കിൽ തന്നെയാണ് മുന്നോട്ട് പോകുന്നതെന്നും എന്നാൽ വിപണി അനുകൂലമായി പ്രതികരിച്ചില്ലെങ്കിൽ പലിശ നിരക്കുകൾ ഇനിയും വർദ്ധിപ്പിക്കേണ്ടി വന്നേക്കാമെന്നും ആർ.ബി.എ ഗവർണർ മിഷേൽ ബുള്ളക്ക് (Michele Bullock) വാർത്താസമ്മേളനത്തിൽ വ്യക്തമാക്കി.