പെർത്ത്: പശ്ചിമേഷ്യൻ യുദ്ധത്തെത്തുടർന്നുള്ള ഇന്ധന പ്രതിസന്ധി രൂക്ഷമാകുന്ന സാഹചര്യത്തിൽ, വെസ്റ്റേൺ ഓസ്ട്രേലിയയിലെ (WA) എല്ലാ പ്രാദേശിക ഇന്ധന വിതരണക്കാരും 'ഫ്യൂവൽ വാച്ച്' പദ്ധതിയിൽ ചേരണമെന്ന് സർക്കാർ നിർദ്ദേശിച്ചു. നിലവിൽ നഗരമേഖലകളിലും 80 ശതമാനം ഗ്രാമീണ മേഖലകളിലും നിലവിലുള്ള ഈ പദ്ധതി മെയ് 1 മുതൽ സംസ്ഥാനത്തെ എല്ലാ സർവീസ് സ്റ്റേഷനുകൾക്കും ബാധകമാകും. ഇതോടെ ഇരുനൂറോളം പുതിയ റീട്ടെയിലർമാർ കൂടി ഈ സംവിധാനത്തിന്റെ പരിധിയിൽ വരും.
പുതിയ നിയമപ്രകാരം, എല്ലാ ഇന്ധന വിതരണക്കാരും അടുത്ത ദിവസത്തെ തങ്ങളുടെ ഇന്ധനവില തലേദിവസം ഉച്ചയ്ക്ക് 2 മണിക്ക് മുൻപായി ഫ്യൂവൽ വാച്ചിനെ അറിയിക്കണം. ഈ വില അടുത്ത 24 മണിക്കൂർ നേരത്തേക്ക് മാറ്റമില്ലാതെ തുടരുകയും വേണം. പകൽസമയത്ത് ഇന്ധനവിലയിൽ ഉണ്ടാകുന്ന പെട്ടെന്നുള്ള മാറ്റങ്ങളിൽ നിന്ന് ഉപഭോക്താക്കളെ സംരക്ഷിക്കുകയാണ് ഇതിലൂടെ ലക്ഷ്യമിടുന്നത്. ഈ നിയമം ലംഘിക്കുന്നവർക്കുള്ള പിഴ 1,000 ഡോളറിൽ നിന്ന് 4,000 ഡോളറായി ഉയർത്തിയിട്ടുണ്ട്. വരും ദിവസങ്ങളിൽ പിഴത്തുക ഇനിയും വർദ്ധിപ്പിക്കുമെന്ന് സർക്കാർ മുന്നറിയിപ്പ് നൽകി.
ഇന്ധനവില റിപ്പോർട്ട് ചെയ്യുന്നതിന് പുറമെ, പമ്പുകളിൽ ഇന്ധനം തീർന്നുപോകുന്ന സാഹചര്യമുണ്ടെങ്കിൽ അതും ഫ്യൂവൽ വാച്ച് വെബ്സൈറ്റിൽ നിർബന്ധമായും രേഖപ്പെടുത്തണം. ഇത് കർഷകർക്കും ബിസിനസ്സുകൾക്കും യാത്രകൾ മുൻകൂട്ടി പ്ലാൻ ചെയ്യാൻ സഹായകമാകും. ഇന്ധന വിതരണ ശൃംഖലയിൽ സുതാര്യത ഉറപ്പാക്കാനും ഏതൊക്കെ മേഖലകളിലാണ് ക്ഷാമം അനുഭവപ്പെടുന്നത് എന്ന് കൃത്യമായി മനസ്സിലാക്കാനും ഈ നീക്കം ഉപകരിക്കുമെന്ന് പ്രീമിയർ റോജർ കുക്ക് പറഞ്ഞു.