ബാലലൈംഗിക ചൂഷണ ദൃശ്യങ്ങൾ കൈവശംവെക്കുകയും വിതരണം ചെയ്യുകയും ചെയ്ത കേസിൽ ഏഴ് മാസം തടവുശിക്ഷ ലഭിച്ച ഓസ്‌ട്രേലിയൻ എഴുത്തുകാരൻ ക്രെയ്ഗ് സിൽവി, പ്രസിദ്ധീകരണ പ്ലാറ്റ്‌ഫോമായ സബ്‌സ്റ്റാക്കിലൂടെ 9,000 വാക്കുകളുള്ള ക്ഷമാപണക്കുറിപ്പ് പുറത്തുവിട്ടു. തിങ്കളാഴ്ചയാണ് വെസ്റ്റേൺ ഓസ്‌ട്രേലിയ ജില്ലാ കോടതി സിൽവിക്ക് തടവുശിക്ഷ വിധിച്ചത്. സിൽവിയുടെ ഐഫോണിലും മാക്‌ബുക്കിലും മുതിർന്നവർ യഥാർഥ കുട്ടികളെ ലൈംഗികമായി പീഡിപ്പിക്കുന്ന 12 ചിത്രങ്ങളും വീഡിയോകളും പൊലീസ് കണ്ടെത്തിയിരുന്നു. ഓൺലൈനിൽ വ്യാജ ഉപയോക്താവുമായി ഒരു ചിത്രം പങ്കുവെച്ചതിനെത്തുടർന്നാണ് ഇയാൾ പിടിയിലായത്. എൻക്രിപ്റ്റഡ് മെസേജിങ് പ്ലാറ്റ്‌ഫോമുകളിലൂടെ നടത്തിയ സംഭാഷണങ്ങളിൽ ലൈംഗിക വൈകൃതങ്ങളോടും കൊച്ചുകുട്ടികളോടും തനിക്ക് താൽപര്യമുണ്ടെന്ന് ഇയാൾ പറഞ്ഞിരുന്നു. താൻ പൊലീസ് ഉദ്യോഗസ്ഥനാണെന്ന് കരുതപ്പെടുന്ന ഒരു ഉപയോക്താവിനോട് എട്ടുവയസ്സുകാരാണ് ഏറ്റവും അനുയോജ്യമായ പ്രായമെന്നും സിൽവി പറഞ്ഞിരുന്നു.
തന്റെ പെരുമാറ്റത്തിൽ ഞെട്ടലും കടുത്ത ലജ്ജയും തോന്നുന്നുവെന്നും അഗാധമായി ഖേദിക്കുന്നുവെന്നും ക്ഷമാപണക്കുറിപ്പിൽ സിൽവി പറഞ്ഞു. കുടുംബാംഗങ്ങളെയും സുഹൃത്തുക്കളെയും വേദനിപ്പിച്ചെന്നും താൻ ഏറെ സ്നേഹിക്കുകയും കരുതുകയും ചെയ്യുന്നവരുടെ വിശ്വാസം തകർത്തുവെന്നും അദ്ദേഹം എഴുതി. വർഷങ്ങളായി തനിക്ക് സ്നേഹവും പിന്തുണയും നൽകിയ ആയിരക്കണക്കിന് ആളുകളുടെ വിശ്വാസത്തെയാണ് വഞ്ചിച്ചതെന്നും കൂട്ടിച്ചേർത്തു. കുട്ടിക്കാലത്ത് വൈകാരിക അവഗണനയും ശാരീരിക അതിക്രമങ്ങളും ലൈംഗിക പീഡനവും നേരിട്ടിട്ടുണ്ടെന്നും കഴിഞ്ഞ വർഷം അവസാനത്തോടെ കടുത്ത മാനസിക പ്രതിസന്ധിയിലൂടെ കടന്നുപോയെന്നും സിൽവി കുറിപ്പിൽ അവകാശപ്പെട്ടു. ദേശീയ പുസ്തകപ്രചാരണ പര്യടനത്തിനു പിന്നാലെ താൻ മാനസികമായി തകർന്നുവെന്നും ഭയവും പരിഭ്രാന്തിയും മറക്കാൻ യാഥാർഥ്യത്തിൽനിന്ന് അകന്നുപോയെന്നും അദ്ദേഹം വിശദീകരിച്ചു.
എന്നാൽ ശിക്ഷ വിധിക്കവെ, തടവുശിക്ഷ മാത്രമാണ് ഉചിതമായ ശിക്ഷയെന്ന് ജഡ്ജി ഹെയ്‌ലി കോർമാൻ വ്യക്തമാക്കി. സിൽവി തന്റെ പ്രവൃത്തികളെ സാങ്കൽപ്പിക ലോകത്തേക്കുള്ള ഒളിച്ചോട്ടമായി വിശേഷിപ്പിച്ചെങ്കിലും അതിൽ ഉൾപ്പെട്ട കുട്ടികൾ യഥാർഥ വ്യക്തികളാണെന്നും അവർക്ക് മാനസികാഘാതമുണ്ടായെന്നും ജഡ്ജി ചൂണ്ടിക്കാട്ടി. ഓൺലൈൻ സംഭാഷണങ്ങളിൽ കുട്ടികളെക്കുറിച്ചും അവരെ ലൈംഗികമായി പീഡിപ്പിക്കുന്നതിനെക്കുറിച്ചും സിൽവി നിരന്തരം സംസാരിച്ചിരുന്നതായി ജഡ്ജി പറഞ്ഞു. മറ്റുള്ളവരുമായി ലൈംഗിക താൽപര്യങ്ങൾ പങ്കുവെക്കാനും സ്വന്തം ലൈംഗിക സംതൃപ്തിക്കും ആശയവിനിമയം നടത്തിയിരുന്നുവെന്നും കോടതി നിരീക്ഷിച്ചു. സിൽവിയുടെ സന്ദേശങ്ങൾ വെറുപ്പുളവാക്കുന്നതും അപമാനകരവും കുറ്റകരവുമാണെന്നും ജഡ്ജി വ്യക്തമാക്കി. സിൽവിക്ക് ഇനി വിശ്വാസ്യതയോ അംഗീകാരമോ അവകാശപ്പെടാനാകില്ലെന്ന് ക്രിയേറ്റീവ് ഇൻഡസ്ട്രീസ് മന്ത്രി സിമോൺ മക്‌ഗർക്ക് പ്രതികരിച്ചു. അദ്ദേഹത്തിന്റെ പുസ്തകങ്ങൾ ഏറെ ജനപ്രിയമായിരുന്നു. എന്നാൽ അവ എഴുതിയ വ്യക്തി ഇത്തരം കുറ്റകൃത്യങ്ങളിൽ കുറ്റക്കാരനാണെന്ന് തെളിഞ്ഞത് അംഗീകരിക്കാനാവില്ലെന്നും മന്ത്രി പറഞ്ഞു.