പെർത്ത്: വെസ്റ്റേൺ ഓസ്ട്രേലിയയിലെ വാഗറപ്പിൽ പ്രവർത്തിക്കുന്ന യുഎസ് മൈനിംഗ് ഭീമനായ അൽകോവയുടെ (Alcoa) റിഫൈനറിയിൽ മെർക്കുറി പുറന്തള്ളൽ ക്രമാതീതമായി വർദ്ധിക്കുന്നത് വലിയ പരിസ്ഥിതി-ആരോഗ്യ ആശങ്കകൾക്ക് കാരണമാകുന്നു. 2022-ലെ കണക്കുകളെ അപേക്ഷിച്ച് 2025-ഓടെ മെർക്കുറി പുറന്തള്ളൽ ഏകദേശം ഇരട്ടിയായി 400 കിലോഗ്രാമിൽ എത്തിയിരിക്കുകയാണ്. ഇതേത്തുടർന്ന് അൽകോവയുടെ പ്രവർത്തന ലൈസൻസ് റദ്ദാക്കണമെന്ന് ആവശ്യപ്പെട്ട് കൺസർവേഷൻ കൗൺസിൽ ഓഫ് ഡബ്ല്യുഎ (CCWA) അപ്പീൽ നൽകി.
ബോക്സൈറ്റ് ഖനനത്തിന്റെയും സംസ്കരണത്തിന്റെയും സ്വാഭാവിക ഉപോൽപ്പന്നമാണ് മെർക്കുറി. ഇത് മനുഷ്യശരീരത്തെയും പരിസ്ഥിതിയെയും ദോഷകരമായി ബാധിക്കുന്ന മാരകമായ ഒരു ന്യൂറോടോക്സിൻ (Neurotoxin) കൂടിയാണ്. എന്നാൽ മെർക്കുറി പുറന്തള്ളലിൽ ഉണ്ടായ വർദ്ധനവ് ബോക്സൈറ്റ് സംസ്കരണത്തിന്റെ അളവ് കൂട്ടിയത് മൂലമാണെന്നും ഇത് നിയന്ത്രണാതീതമായ ഒന്നല്ലെന്നും അൽകോവ വിശദീകരിച്ചു. ബോക്സൈറ്റ് അയിരിലെ മെർക്കുറിയുടെ സാന്ദ്രതയിലുണ്ടായ സ്വാഭാവിക മാറ്റങ്ങളും ഇതിന് കാരണമായേക്കാമെന്ന് കമ്പനി വക്താവ് പറഞ്ഞു.
അൽകോവയുടെ വിശദീകരണം തൃപ്തികരമല്ലെന്ന് കൺസർവേഷൻ കൗൺസിൽ എക്സിക്യൂട്ടീവ് ഡയറക്ടർ മാറ്റ് റോബർട്ട്സ് ആരോപിച്ചു. അന്തരീക്ഷത്തിലേക്ക് പുറന്തള്ളപ്പെടുന്ന മെർക്കുറി മണ്ണിലും വെള്ളത്തിലും അടിഞ്ഞുകൂടുന്നത് പ്രദേശത്തെ വംശനാശഭീഷണി നേരിടുന്ന ബ്ലാക്ക് കോക്കറ്റൂസ് (Black Cockatoos), നംബാറ്റ് (Numbat) തുടങ്ങിയ ജീവിവർഗ്ഗങ്ങളെ ബാധിക്കുമെന്ന് അദ്ദേഹം മുന്നറിയിപ്പ് നൽകി. എന്നാൽ ഈ മെർക്കുറി പുറന്തള്ളൽ നിലവിൽ വലിയ ആരോഗ്യ ഭീഷണി ഉയർത്തുന്നില്ലെന്നാണ് ജല-പരിസ്ഥിതി വകുപ്പിന്റെ (DWER) പ്രാഥമിക വിലയിരുത്തൽ. വിഷയത്തിൽ അപ്പീൽ നടപടികൾ പുരോഗമിക്കുകയാണ്.