മെൽബൺ: വിക്ടോറിയൻ റോഡുകളുടെ നിലവാരം ഉയർത്തുന്നതിനായി 1.04 ബില്യൺ ഡോളറിന്റെ റെക്കോർഡ് നിക്ഷേപം പ്രഖ്യാപിച്ച് പ്രീമിയർ ജസീന്ത അലന്.
സംസ്ഥാനത്തെ പ്രധാന റോഡുകൾ, പാലങ്ങൾ, സൈൻ ബോർഡുകൾ എന്നിവയുടെ അറ്റകുറ്റപ്പണികൾക്കായി ഈ തുക ഉപയോഗിക്കും. കഴിഞ്ഞ വർഷത്തെ അപേക്ഷിച്ച് 64 മില്യൺ ഡോളറിന്റെ (6.5 ശതമാനം) വർദ്ധനവാണ് ഇത്തവണ ബജറ്റിൽ വരുത്തിയിരിക്കുന്നത്.
ഏകദേശം രണ്ട് ലക്ഷം കുഴികൾ (Potholes) അടയ്ക്കാൻ ഈ തുക മതിയാകുമെന്ന് സർക്കാർ അവകാശപ്പെടുന്നു. പദ്ധതിയുടെ 70 ശതമാനം തുകയും മെൽബണിന് പുറത്തുള്ള റീജിയണൽ മേഖലകളിലെ റോഡുകൾ നന്നാക്കാനാണ് ഉപയോഗിക്കുക. 2022 മുതൽ 2024 വരെയുണ്ടായ പ്രളയവും കനത്ത മഴയും വിക്ടോറിയൻ റോഡുകളെ വൻതോതിൽ നശിപ്പിച്ചിരുന്നു. ഇതിന് പരിഹാരം കാണുക എന്നതാണ് സർക്കാരിന്റെ പ്രധാന ലക്ഷ്യം.
പ്രധാന പ്രഖ്യാപനങ്ങൾ:
റീജിയണൽ റോഡുകൾ: ഫണ്ടിന്റെ സിംഹഭാഗവും (70%) ഗ്രാമീണ മേഖലകളിലെ റോഡ് ശൃംഖലയ്ക്കായി മാറ്റിവെക്കും.
മാലിന്യ നിർമ്മാർജ്ജനം: മോനാഷ്, കാൽഡർ, ഹ്യൂം ഫ്രീവേകളിലെ ഗ്രാഫിറ്റികൾ നീക്കം ചെയ്യാനും മാലിന്യം വൃത്തിയാക്കാനും 36.9 മില്യൺ ഡോളർ ചിലവാക്കും.
മെൽബൺ ഫ്രീവേകൾ: നഗരത്തിലെ തിരക്കേറിയ 10 ഫ്രീവേകൾക്ക് പ്രത്യേക പരിഗണന നൽകും.
അതേസമയം, സർക്കാരിന്റെ ഈ നീക്കം വെറും തിരഞ്ഞെടുപ്പ് തന്ത്രമാണെന്ന് പ്രതിപക്ഷം ആരോപിച്ചു. പണപ്പെരുപ്പം കണക്കിലെടുക്കുമ്പോൾ ഈ തുകയിൽ വലിയ വർദ്ധനവില്ലെന്നും കഴിഞ്ഞ പത്ത് വർഷമായി റോഡുകളെ സർക്കാർ അവഗണിക്കുകയാണെന്നും ഷാഡോ റോഡ് മിനിസ്റ്റർ ഡാനി ഓബ്രിയൻ പറഞ്ഞു. റോഡിലെ കുഴികൾ കാരണം വാഹനങ്ങൾക്ക് കേടുപാടുകൾ സംഭവിക്കുന്ന വിക്ടോറിയക്കാർക്ക് കൃത്യമായ നഷ്ടപരിഹാരം നൽകുന്നില്ലെന്ന പരാതിയും നിലനിൽക്കുന്നുണ്ട്.