സ്ഥാനാർഥികളുടെ വിവാദ പോസ്റ്റുകൾ: പരിശോധനാ നടപടികളെ ന്യായീകരിച്ച് വൺ നേഷൻ വിക്ടോറിയ നേതാവ്

സ്ഥാനാർഥികളുടെ സോഷ്യൽ മീഡിയ പോസ്റ്റുകളെച്ചൊല്ലി രണ്ട് പേരെ പാർട്ടിയിൽനിന്ന് പുറത്താക്കിയ സംഭവത്തിൽ വൺ നേഷൻ വിക്ടോറിയ നേതാവ് വാറൻ പിക്കറിങ് പാർട്ടിയുടെ സ്ഥാനാർഥി പരിശോധനാ നടപടികളെ ന്യായീകരിച്ചു. പരിശോധനാ സംവിധാനം തൃപ്തികരമാണെന്നും തുടർന്നും മെച്ചപ്പെടുത്തുമെന്നും അദ്ദേഹം പറഞ്ഞു. മെൽബൺ പ്രസ് ക്ലബ്ബും റൂറൽ പ്രസ് ക്ലബ് ഓഫ് വിക്ടോറിയയും ചേർന്ന് വ്യാഴാഴ്ച സംഘടിപ്പിച്ച പരിപാടിയിൽ സംസാരിക്കുകയായിരുന്നു പിക്കറിങ്. പാർട്ടിയുടെ നയപരിപാടികൾ വിശദീകരിച്ചുള്ള 25 മിനിറ്റ് പ്രസംഗത്തിനിടെ സ്ഥാനാർഥി തിരഞ്ഞെടുപ്പുമായി ബന്ധപ്പെട്ട ചോദ്യങ്ങളും ഉയർന്നു.

അഡോൾഫ് ഹിറ്റ്‌ലറെ അനുകൂലിക്കുന്ന തരത്തിലുള്ള പരാമർശങ്ങൾ നടത്തിയെന്ന വിവാദത്തെത്തുടർന്ന് പ്രെസ്റ്റൺ മണ്ഡലത്തിലെ മുൻ സ്ഥാനാർഥി ഫ്രാങ്കോ ഗാർഡിയാനിയെ പാർട്ടിയിൽനിന്ന് പുറത്താക്കിയിരുന്നു. ഇതിന് പിന്നാലെ, സോഷ്യൽ മീഡിയയിലെ വിവാദ പരാമർശങ്ങളുടെ പേരിൽ മെൽബൺ സ്ഥാനാർഥി മാത്യു കോളിൻസും ഈ മാസം ആദ്യം പാർട്ടി വിട്ടിരുന്നു. സ്ഥാനാർഥികളുടെ പശ്ചാത്തല പരിശോധനയെക്കുറിച്ചുള്ള ചോദ്യത്തിന്, വൺ നേഷൻ ഇതുവരെ നടത്തിയ പരിശോധനകളിൽ തൃപ്തരാണെന്ന് പിക്കറിങ് മറുപടി നൽകി. കുറഞ്ഞ സമയത്തിനുള്ളിൽ പാർട്ടി അസാധാരണമായ വളർച്ച കൈവരിച്ചതായും ഇത് ചില വെല്ലുവിളികൾ സൃഷ്ടിക്കുന്നുണ്ടെന്നും അദ്ദേഹം പറഞ്ഞു. കഴിഞ്ഞ ഒന്നോ രണ്ടോ വർഷത്തിനിടെ ദുരുദ്ദേശ്യത്തോടെ നിരവധി പേർ പാർട്ടിയിൽ ചേർന്നിട്ടുണ്ടെന്നും അദ്ദേഹം ആരോപിച്ചു. അതേസമയം, ഈ തിരഞ്ഞെടുപ്പ് കാലയളവിൽ വിക്ടോറിയൻ ലിബറൽ പാർട്ടിയും മൂന്ന് സ്ഥാനാർഥികളെ പുറത്താക്കിയിട്ടുണ്ടെന്ന് ചൂണ്ടിക്കാട്ടിയ പിക്കറിങ്, വൺ നേഷൻ ഇതുവരെ രണ്ടുപേരെയാണ് പുറത്താക്കിയതെന്നും കൂടുതൽ നടപടികൾ വേണ്ടിവരില്ലെന്നാണ് പ്രതീക്ഷയെന്നും പറഞ്ഞു.

സ്ഥാനാർഥികളുടെ വിവാദങ്ങൾ ഓരോന്നായി പരിശോധിക്കും

മുറേ പ്ലെയിൻസ് മണ്ഡലത്തിലെ സ്ഥാനാർഥി ഗാർണർ സ്മിത്ത് പ്രാദേശിക കൗൺസിലറായിരിക്കെ നടത്തിയ ഓൺലൈൻ പരാമർശങ്ങളുടെ പേരിൽ നടപടി നേരിട്ട കാര്യം തനിക്ക് അറിയാമായിരുന്നുവെന്നും പിക്കറിങ് വെളിപ്പെടുത്തി. സ്ഥാനാർഥി തിരഞ്ഞെടുപ്പ് നടപടികൾക്കിടെ തന്റെ ലൈംഗികവിവേചനപരവും സ്ത്രീവിരുദ്ധവുമായ സോഷ്യൽ മീഡിയ പോസ്റ്റുകളെക്കുറിച്ച് സ്മിത്ത് തുറന്നുപറഞ്ഞിരുന്നുവെന്ന് അദ്ദേഹം പറഞ്ഞു. പ്രസ്തുത പരാമർശങ്ങളിൽ സ്മിത്ത് ആത്മാർഥമായി ഖേദം പ്രകടിപ്പിച്ചെന്നും അവ ഇപ്പോഴത്തെ നിലപാടുകളെ പ്രതിഫലിപ്പിക്കുന്നില്ലെന്ന് പാർട്ടിക്ക് ബോധ്യപ്പെട്ടെന്നും പിക്കറിങ് വ്യക്തമാക്കി. സ്ഥാനാർഥികളുമായി ബന്ധപ്പെട്ട പ്രശ്നങ്ങൾ ഓരോന്നും അതിന്റെ സാഹചര്യങ്ങൾക്കനുസരിച്ച് പരിശോധിക്കുമെന്നും എന്നാൽ ചില കാര്യങ്ങൾ ഒരിക്കലും മാപ്പർഹിക്കാത്തവയാണെന്നും അദ്ദേഹം കൂട്ടിച്ചേർത്തു. വരാനിരിക്കുന്ന ന്യൂ സൗത്ത് വെയിൽസ് തിരഞ്ഞെടുപ്പിൽ ഇത്തരം പ്രശ്നങ്ങൾ ആവർത്തിക്കാതിരിക്കാൻ പശ്ചാത്തല പരിശോധനകൾ മെച്ചപ്പെടുത്തുമെന്നും അദ്ദേഹം പറഞ്ഞു.

സർക്കാർ രേഖകൾ പരസ്യപ്പെടുത്തുമെന്ന് വൺ നേഷൻ

വിക്ടോറിയയിൽ അധികാരത്തിലെത്തിയാൽ മുൻ ലേബർ, ലിബറൽ സർക്കാരുകളുടെ മന്ത്രിസഭാ രേഖകൾ പൊതുജനങ്ങൾക്ക് ലഭ്യമാക്കുമെന്നും പിക്കറിങ് പ്രഖ്യാപിച്ചു. കോവിഡ് മഹാമാരിയെ നേരിട്ട രീതി, ഹോട്ടൽ ക്വാറന്റൈൻ, ബിഗ് ബിൽഡ് പദ്ധതികൾ, പ്രധാന വികസന പദ്ധതികൾ, പൊതുകടം, ഭരണത്തിലെ സുതാര്യത തുടങ്ങിയ വിഷയങ്ങളുമായി ബന്ധപ്പെട്ട രേഖകൾക്കായിരിക്കും മുൻഗണന. ആദ്യഘട്ട രേഖകൾ ആറുമാസത്തിനുള്ളിൽ പുറത്തുവിടുമെന്നും 18 മാസത്തിനകം മുഴുവൻ രേഖകളും പ്രസിദ്ധീകരിക്കുമെന്നും അദ്ദേഹം പറഞ്ഞു. രേഖകൾ തിരയാൻ കഴിയുന്ന പൊതുപോർട്ടലുകളിൽ ലഭ്യമാക്കുമെന്നും സ്വതന്ത്ര മേൽനോട്ടവും അപ്പീൽ സംവിധാനവും ഉണ്ടാകുമെന്നും അദ്ദേഹം വ്യക്തമാക്കി. സ്വന്തം സർക്കാർ എടുക്കുന്ന തീരുമാനങ്ങളുമായി ബന്ധപ്പെട്ട മന്ത്രിസഭാ സമർപ്പണങ്ങൾ, തീരുമാനങ്ങൾ, അനുബന്ധ രേഖകൾ എന്നിവയും 30 പ്രവൃത്തിദിവസത്തിനുള്ളിൽ പരസ്യപ്പെടുത്തുമെന്ന് പിക്കറിങ് വാഗ്ദാനം ചെയ്തു. രഹസ്യ ഇടപാടുകൾക്കും രാഷ്ട്രീയ പക്ഷപാതപരമായ ഫണ്ട് വിതരണത്തിനും അഴിമതിക്കും അറുതിവരുത്തുകയാണ് ലക്ഷ്യമെന്നും അദ്ദേഹം പറഞ്ഞു.

സർവേകളിൽ വൺ നേഷന്റെ പിന്തുണ ഉയർന്ന നിലയിൽ

ലേബർ സർക്കാരിനുള്ള പിന്തുണ കുറയുന്നതായി സൂചിപ്പിക്കുന്ന രണ്ട് അഭിപ്രായ സർവേകൾ പുറത്തുവന്നതിന് പിന്നാലെയാണ് പിക്കറിങ്ങിന്റെ പ്രസംഗം. ഹെറാൾഡ് സൺ പത്രത്തിനുവേണ്ടി ഡെമോസ് എയു, പ്രീമിയർ നാഷണൽ എന്നിവർ 1,562 പേരിൽ നടത്തിയ സർവേയിൽ പ്രാഥമിക വോട്ടിൽ സഖ്യകക്ഷികൾക്ക് 33 ശതമാനവും വൺ നേഷന് 21 ശതമാനവും ലേബറിന് 18 ശതമാനവും ഗ്രീൻസിന് 17 ശതമാനവും പിന്തുണ ലഭിച്ചു. ദ ഏജ് പത്രത്തിനുവേണ്ടി റിസോൾവ് നടത്തിയ 1,000 പേരുടെ സർവേയിൽ സഖ്യകക്ഷികൾക്ക് 30 ശതമാനവും വൺ നേഷന് 23 ശതമാനവും ലേബറിന് 22 ശതമാനവും ഗ്രീൻസിന് 13 ശതമാനവും പിന്തുണയാണ് ലഭിച്ചത്. വിക്ടോറിയയിൽ നവംബർ 28-നാണ് തിരഞ്ഞെടുപ്പ്.