മെൽബൺ ട്രാമുകളിലും ഇനി കാർഡില്ലാതെ യാത്ര ചെയ്യാം; ഡിജിറ്റൽ ടാപ്പ്-ആൻഡ്-ഗോ സംവിധാനം ഇന്ന് മുതൽ

മെൽബൺ: മെൽബണിലെ ട്രാം യാത്രക്കാർക്ക് ഇനിമുതൽ തങ്ങളുടെ ക്രെഡിറ്റ് കാർഡുകളോ, സ്മാർട്ട്‌ഫോണുകളോ, സ്മാർട്ട് വാച്ചുകളോ ഉപയോഗിച്ച് ട്രാമുകളിൽ നേരിട്ട് പണമടച്ച് യാത്ര ചെയ്യാം. ദീർഘനാളത്തെ കാത്തിരിപ്പിനും സാങ്കേതിക തടസ്സങ്ങൾക്കും ശേഷം ഈ മാസം ആദ്യം ട്രെയിനുകളിൽ നടപ്പിലാക്കിയ ടിക്കറ്റില്ലാ യാത്രാ സംവിധാനം (Ticketless Travel) ഇന്ന് മുതൽ ട്രാം ശൃംഖലയിലേക്കും വ്യാപിപ്പിച്ചതായി വിക്ടോറിയൻ സർക്കാർ അറിയിച്ചു. അടുത്ത മാസം മുതൽ ബസുകളിലും ഈ സൗകര്യം ലഭ്യമാകുമെങ്കിലും കൺസെഷൻ (Concession) ടിക്കറ്റ് ഉപയോഗിക്കുന്നവർ അടുത്ത വർഷം വരെ കാത്തിരിക്കേണ്ടി വരും.

പൊതുഗതാഗത കാർഡായ 'മൈക്കി' (myki) പരിഷ്കരിക്കുന്നതിനായി 2023-ൽ സർക്കാർ 1.7 ബില്യൺ ഡോളറിന്റെ വൻകിട കരാർ നൽകിയിരുന്നെങ്കിലും വലിയ സാങ്കേതിക തടസ്സങ്ങളും ചിലവ് വർദ്ധനവും കാരണം പദ്ധതി നീണ്ടുപോവുകയായിരുന്നു. സിഡ്‌നി ഉൾപ്പെടെയുള്ള മറ്റ് അന്താരാഷ്ട്ര നഗരങ്ങൾ വർഷങ്ങൾക്ക് മുൻപ് തന്നെ ബാങ്ക് കാർഡ് പേയ്‌മെന്റുകൾ നടപ്പിലാക്കിയിരുന്നെങ്കിലും മെൽബൺ ഇതിൽ ഏറെ പിന്നിലായിരുന്നു. ഈ വർഷം മാർച്ചിൽ ട്രെയിനുകളിൽ പരീക്ഷണം തുടങ്ങിയെങ്കിലും, യുഎസ്-ഇസ്രായേൽ സഖ്യവും ഇറാനും തമ്മിലുള്ള യുദ്ധത്തെത്തുടർന്ന് ഇന്ധനവില കുതിച്ചുയർന്നപ്പോൾ ജനങ്ങൾക്ക് ആശ്വാസമായി ഏപ്രിൽ, മെയ് മാസങ്ങളിൽ സർക്കാർ പ്രഖ്യാപിച്ച 'സൗജന്യ പൊതുഗതാഗത പദ്ധതി' കാരണം ഈ സ്മാർട്ട് പേയ്‌മെന്റ് റോൾഔട്ട് താല്കാലികമായി തടസ്സപ്പെട്ടിരുന്നു. നിലവിൽ ഈ പദ്ധതിക്ക് പകരമായി വർഷാവസാനം വരെ പകുതി നിരക്കിലാണ് (Half-price fares) സർവീസുകൾ നടത്തുന്നത്.

ഫോണും സ്മാർട്ട് വാച്ചും വഴി ലക്ഷക്കണക്കിന് യാത്രകൾ:

ജൂൺ ആദ്യം മുതൽ ട്രെയിൻ ശൃംഖലകളിൽ ഘട്ടഘട്ടമായി നടപ്പിലാക്കിയ ഈ സംവിധാനം വഴി ഇതിനകം 7 ലക്ഷത്തിലധികം യാത്രകൾ നടന്നു കഴിഞ്ഞതായി പൊതുഗതാഗത മന്ത്രി ഗബ്രിയേൽ വില്യംസ് (Gabrielle Williams) അറിയിച്ചു. ഇതിൽ അഞ്ചിൽ നാല് യാത്രക്കാരും തങ്ങളുടെ ഫോണോ സ്മാർട്ട് വാച്ചോ ഉപയോഗിച്ചാണ് പണമടച്ചത്. പേപ്പർ ടിക്കറ്റുകൾ ഉപയോഗിക്കുന്ന മറ്റ് റീജിയണൽ സ്റ്റേഷനുകളിൽ ഈ വർഷം അവസാനത്തോടെ പുതിയ സാങ്കേതികവിദ്യ ലഭ്യമാക്കും. അതേസമയം, ദിവസേന യാത്ര ചെയ്യുന്ന സാധാരണക്കാർക്ക് അധിക സാമ്പത്തിക ബാധ്യത ഉണ്ടാകാതിരിക്കാൻ പ്രതിവാര മൈക്കി പാസുകൾക്ക് സമാനമായ 'പ്രതിവാര ടാപ്പ്-ആൻഡ്-ഗോ ക്യാപ്' (Weekly cap) ഏർപ്പെടുത്തണമെന്ന് പബ്ലിക് ട്രാൻസ്‌പോർട്ട് യൂസേഴ്സ് അസോസിയേഷൻ ആവശ്യപ്പെട്ടു. പത്ത് വർഷം മുൻപ് നടപ്പിലാക്കേണ്ടിയിരുന്ന ഒരു കാര്യം ഇപ്പോൾ ചെയ്തതിന് സർക്കാർ വലിയ ആഘോഷം നടത്തേണ്ടതില്ലെന്ന് ഷാഡോ ട്രാൻസ്‌പോർട്ട് വക്താവ് മാത്യു ഗൈ പരിഹസിച്ചു.