2026 ഫോർമുല വൺ സീസണിലെ ആദ്യ പോരാട്ടത്തിന് മെൽബണിലെ ആൽബർട്ട് പാർക്ക് സർക്യൂട്ട് ഒരുങ്ങി. ഇന്ന് ഉച്ചയ്ക്ക് പ്രാദേശിക സമയം 3 മണിക്കാണ് (ഇന്ത്യൻ സമയം രാവിലെ 9:30) മത്സരം ആരംഭിക്കുന്നത്. ക്വാളിഫയിംഗിൽ തകർപ്പൻ പ്രകടനം കാഴ്ചവെച്ച മെഴ്സിഡസിന്റെ ജോർജ്ജ് റസ്സലാണ് പോൾ പൊസിഷനിൽ (ഒന്നാം സ്ഥാനം) നിന്ന് മത്സരം തുടങ്ങുന്നത്. മെഴ്സിഡസിന്റെ തന്നെ കിമി ആന്റനെല്ലി രണ്ടാം സ്ഥാനത്തുണ്ട്.
ഓസ്ട്രേലിയയുടെ പ്രതീക്ഷയായ മക്ലാരൻ ഡ്രൈവർ ഓസ്കാർ പിയാസ്ട്രി അഞ്ചാം സ്ഥാനത്ത് നിന്നാണ് റേസ് ആരംഭിക്കുന്നത്. 1980-ന് ശേഷം ഈ കിരീടം നേടുന്ന ആദ്യ ഓസ്ട്രേലിയൻ താരം എന്ന റെക്കോർഡാണ് പിയാസ്ട്രി ലക്ഷ്യമിടുന്നത്. പിയാസ്ട്രിയുടെ സഹതാരം ലാൻഡോ നോറിസ് ആറാം സ്ഥാനത്താണ്. റെഡ് ബുള്ളിന്റെ ഐസക് ഹദ്ജാർ മൂന്നാം സ്ഥാനത്ത് നിന്ന് തുടങ്ങും.
2026-ൽ പുതിയ എഞ്ചിൻ, ചേസിസ് നിയമങ്ങൾ നിലവിൽ വന്നതോടെ കാറുകളിൽ വലിയ മാറ്റങ്ങളാണ് വരുത്തിയിട്ടുള്ളത്. ഡിആർഎസ് (DRS) സംവിധാനത്തിന് പകരം 'ഓവർടേക്ക് മോഡ്' ആണ് ഈ സീസൺ മുതൽ ഡ്രൈവർമാർക്ക് കരുത്താകുന്നത്. ആകെ 58 ലാപ്പുകളിലായി 306.124 കിലോമീറ്റർ ദൂരമാണ് ഡ്രൈവർമാർ പിന്നിടേണ്ടത്.