ഓസ്‌ട്രേലിയയിലെ പ്രമുഖ ഡിപ്പാർട്ട്‌മെന്റ് സ്റ്റോർ ശൃംഖലയായ ഡേവിഡ് ജോൺസിന്റെ ഭാവി അനിശ്ചിതത്വത്തിൽ. കോർപ്പറേറ്റ് റെഗുലേറ്ററായ ഓസ്‌ട്രേലിയൻ സെക്യൂരിറ്റീസ് ആൻഡ് ഇൻവെസ്റ്റ്‌മെന്റ്‌സ് കമ്മീഷന് (ASIC) വാർഷിക സാമ്പത്തിക കണക്കുകൾ സമർപ്പിക്കാനുള്ള സമയപരിധി തുടർച്ചയായ രണ്ടാം വർഷവും കമ്പനി പാലിച്ചില്ല. ഒക്ടോബർ 30-നകം സമർപ്പിക്കേണ്ട കണക്കുകൾക്ക് ഓഡിറ്ററായ PwC ഇതുവരെ അംഗീകാരം നൽകിയിട്ടില്ലെന്നാണ് റിപ്പോർട്ട്.
ക്രിസ്മസ് വ്യാപാരകാലം മുന്നിൽക്കണ്ട് ഒക്ടോബർ അവസാനത്തോടെ പ്രധാന വായ്പാദാതാവിൽനിന്ന് 10 മില്യൺ ഡോളറിന്റെ അടിയന്തര ധനസഹായം കമ്പനി നേടിയിരുന്നു. ഇതിനുപിന്നാലെയാണ് നഷ്ടത്തിലോടുന്ന അഞ്ച് സ്റ്റോറുകൾ കൂടി അടച്ചുപൂട്ടാൻ കമ്പനി ആലോചിക്കുന്നതായുള്ള റിപ്പോർട്ടുകൾ പുറത്തുവന്നത്. നേരത്തെ ന്യൂ സൗത്ത് വെയിൽസിലെ കാസിൽ ഹിൽ, ടഗ്ഗറ എന്നിവിടങ്ങളിലെ രണ്ട് സ്റ്റോറുകൾ ജനുവരി മധ്യത്തിൽ അടച്ചുപൂട്ടിയിരുന്നു. സ്ഥിരമായി അടച്ചുപൂട്ടുന്ന സ്റ്റോറുകളുടെ അന്തിമ പട്ടിക കമ്പനി ഇതുവരെ പ്രഖ്യാപിച്ചിട്ടില്ല.
ഓസ്‌ട്രേലിയയിലും ന്യൂസിലൻഡിലുമായി നിലവിൽ 38 സ്റ്റോറുകളാണ് ഡേവിഡ് ജോൺസിനുള്ളത്. ഇത് 12 മുതൽ 20 വരെയായി കുറയ്ക്കാനാണ് പദ്ധതിയെന്നാണ് റിപ്പോർട്ട്. പെർത്തിയിലെ കാരസൽ, സിഡ്‌നിയിലെ പരമറ്റ, ഹോൺസ്‌ബി, കാൻബറയിലെ വോഡൻ, മെൽബണിലെ സൗത്ത്‌ലാൻഡ് എന്നിവിടങ്ങളിലെ വെസ്റ്റ്ഫീൽഡ് സ്റ്റോറുകളാണ് അടച്ചുപൂട്ടൽ ഭീഷണി നേരിടുന്നതായി പറയപ്പെടുന്നത്. വാരാന്ത്യത്തിൽ ഡേവിഡ് ജോൺസിന്റെ ഗിഫ്റ്റ് കാർഡുകൾ ഉപയോഗിക്കുന്നതിൽ ഉപഭോക്താക്കൾക്ക് ബുദ്ധിമുട്ട് നേരിട്ടതും കമ്പനിയുടെ ഭാവിയെക്കുറിച്ചുള്ള ആശങ്ക വർധിപ്പിച്ചു. ഗിഫ്റ്റ് കാർഡുകൾ എത്രയും വേഗം ഉപയോഗിക്കണമെന്ന് ചില ഉപഭോക്തൃ വിദഗ്ധർ നിർദേശിക്കുകയും ചെയ്തു. എന്നാൽ, ഗിഫ്റ്റ് കാർഡ് സേവനങ്ങൾ കൈകാര്യം ചെയ്യുന്ന മൂന്നാംകക്ഷി പ്ലാറ്റ്‌ഫോമായ GiveX-ന്റെ ആഗോള സാങ്കേതിക തകരാറാണ് പ്രശ്‌നത്തിന് കാരണമെന്ന് കമ്പനി പിന്നീട് വ്യക്തമാക്കി. സേവനം പുനഃസ്ഥാപിച്ചെന്നും ചില മേഖലകളിൽ അറ്റകുറ്റപ്പണികൾ തുടരുകയാണെന്നും ദൈനംദിന പ്രവർത്തനങ്ങളിൽ മാറ്റമില്ലെന്നും കമ്പനി അറിയിച്ചു.
മാധ്യമങ്ങളിൽ വരുന്ന ഊഹാപോഹങ്ങളോട് പ്രതികരിക്കില്ലെന്ന് ഡേവിഡ് ജോൺസ് വക്താവ് പറഞ്ഞു. സിഇഒ എറിക്ക ബെർച്ച്‌റ്റോൾഡിന്റെ മുൻഗണന കമ്പനിയുടെ INSPIRE30 തന്ത്രം നടപ്പാക്കുന്നതിനും മാറുന്ന റീട്ടെയിൽ മേഖലയ്ക്കനുസരിച്ച് ബിസിനസ് ക്രമീകരിക്കുന്നതിനുമാണെന്നും അദ്ദേഹം വ്യക്തമാക്കി. ഓസ്‌ട്രേലിയയിലെ സ്റ്റോറുകളുടെ ശൃംഖലയും വിതരണക്കാരുമായും ബ്രാൻഡ് പങ്കാളികളുമായുമുള്ള വ്യാപാര വ്യവസ്ഥകളും പരിശോധിക്കുന്നുണ്ടെന്നും വക്താവ് അറിയിച്ചു. വാടക ഇളവുകൾക്കായി കമ്പനി ഉടമകളുമായി ചർച്ച നടത്തിയതായും ഡിസംബറിൽ വാടക നൽകേണ്ടതില്ലെന്ന ധാരണയുൾപ്പെടെ സഹായം നേടിയതായും റിപ്പോർട്ടുകളുണ്ട്. പ്രധാന വായ്പാദാതാവായ ബ്രിട്ടീഷ് സ്ഥാപനമായ ഹിൽകോ ക്യാപിറ്റലുമായി ധാരണയിലെത്തിയാൽ ഒരു മൂന്നാംകക്ഷി നിക്ഷേപകൻ കമ്പനിയിൽ ഓഹരി മൂലധനം നിക്ഷേപിക്കുമെന്നും റിപ്പോർട്ടുണ്ട്. ഭൂരിഭാഗം സ്റ്റോറുകളുടെയും വാടകക്കരാറുകൾക്ക് ഇനിയും 10 മുതൽ 15 വർഷം വരെ കാലാവധിയുണ്ട്.
2023 മുതൽ ഓസ്‌ട്രേലിയൻ സ്വകാര്യ ഇക്വിറ്റി സ്ഥാപനമായ ആങ്കറേജ് ക്യാപിറ്റൽ പാർട്‌ണേഴ്‌സിന്റെ നിയന്ത്രണത്തിലാണ് ഡേവിഡ് ജോൺസ്. 2025-ലെ സാമ്പത്തിക കണക്കുകൾ സമർപ്പിക്കാൻ ആറുമാസം വൈകിയതിനെത്തുടർന്ന് ASIC കമ്പനിയെ നിരീക്ഷിച്ചുവരികയാണ്. 2026-ലെ ആദ്യ ഒൻപത് മാസത്തെ പ്രവർത്തനഫലങ്ങൾ പുറത്തുവിട്ട് ബിസിനസ് തിരിച്ചുപിടിക്കാനുള്ള ശ്രമങ്ങൾ കമ്പനി വിശദീകരിച്ചിരുന്നു. ഈ കാലയളവിൽ പലിശ, നികുതി, മൂല്യത്തകർച്ച, അമോർട്ടൈസേഷൻ എന്നിവയ്ക്ക് മുമ്പുള്ള വരുമാനം നാലിരട്ടിയായി ഉയർന്ന് 15 മില്യൺ ഡോളറിലെത്തി. വിൽപ്പനയിൽ 3.6 ശതമാനം വർധനയുണ്ടായതായും റിപ്പോർട്ടുണ്ട്.
അതേസമയം, 2025-ലെ കണക്കുകളുമായി ബന്ധപ്പെട്ട് കമ്പനിക്കെതിരായ അന്വേഷണം തുടരുകയാണെന്ന് ASIC വക്താവ് ഓസ്‌ട്രേലിയൻ ഫിനാൻഷ്യൽ റിവ്യൂവിനോട് പറഞ്ഞു. ആ വർഷം 95.5 മില്യൺ ഡോളറിന്റെ നഷ്ടമാണ് കമ്പനി രേഖപ്പെടുത്തിയത്. അതിന് മുൻവർഷം നഷ്ടം 74.1 മില്യൺ ഡോളറായിരുന്നു. വിൽപ്പന ഇടിവ്, വർധിച്ച നഷ്ടം, പ്രമുഖ ഫാഷൻ ബ്രാൻഡുകളുടെ പിന്മാറ്റം എന്നിവയും കമ്പനിയെ ബാധിച്ചിട്ടുണ്ട്. കൺട്രി റോഡ്, വിച്ചറി, മിംകോ തുടങ്ങിയ ബ്രാൻഡുകൾ ഡേവിഡ് ജോൺസിലെ സാന്നിധ്യം കുറയ്ക്കാൻ നീക്കം നടത്തുമ്പോൾ ഗുച്ചി, ചാനൽ, ക്രിസ്റ്റ്യൻ ഡിയർ തുടങ്ങിയ ആഡംബര ബ്രാൻഡുകൾ ഇതിനകം തന്നെ സ്റ്റോറുകളുടെ പ്രവർത്തനം ചുരുക്കിയിട്ടുണ്ട്.