ഹോബാർട്ട്: ഓസ്ട്രേലിയൻ സംസ്ഥാനമായ ടാസ്മാനിയയിൽ കനത്ത നാശനഷ്ടം വിതച്ചുകൊണ്ട് അതിശക്തമായ കാറ്റും കനത്ത മഴയും താഴ്ന്ന താപനിലയും തുടരുന്നു. തുടർച്ചയായി എത്തുന്ന ന്യൂനമർദ്ദങ്ങളുടെയും ശക്തമായ തണുത്ത കാറ്റിന്റെയും (Cold Front) ഫലമായാണ് പ്രവിശ്യയിലുടനീളം ജനജീവിതം സ്തംഭിപ്പിച്ചുകൊണ്ട് അതിരൂക്ഷമായ പ്രതികൂല കാലാവസ്ഥ രൂപപ്പെട്ടിരിക്കുന്നത്.
വ്യാഴാഴ്ച സംസ്ഥാനത്തിന്റെ വിവിധ ഭാഗങ്ങളിൽ റെക്കോർഡ് വേഗതയിലുള്ള കാറ്റാണ് രേഖപ്പെടുത്തിയത്. ഫർണോ ഗ്രൂപ്പിലെ ഹോഗൻ ഐലൻഡിൽ കാറ്റിന്റെ വേഗത മണിക്കൂറിൽ 104 കിലോമീറ്റർ വരെ ഉയർന്നു. ഡെവൻപോർട്ട് എയർപോർട്ടിൽ മണിക്കൂറിൽ 95 കിലോമീറ്ററും കിഴക്കൻ തീരത്തെ ലാരാപുനയിൽ 83 കിലോമീറ്ററും വേഗതയിലാണ് വടക്ക്-പടിഞ്ഞാറൻ കാറ്റ് വീശിയടിച്ചത്. സംസ്ഥാനത്തിന്റെ വടക്കൻ, മധ്യ, പടിഞ്ഞാറൻ മേഖലകളിൽ വരും ദിവസങ്ങളിൽ കനത്ത മഴ തുടരുമെന്നും ശനിയാഴ്ചയോടെ പലയിടങ്ങളിലും 100 മില്ലിമീറ്റർ വരെ മഴ ലഭിക്കാൻ സാധ്യതയുണ്ടെന്നും ബ്യൂറോ ഓഫ് മെറ്റീരിയോളജി (BoM) മുന്നറിയിപ്പ് നൽകി. മൗണ്ട് റീഡ്, ക്രേഡിൽ മൗണ്ടൻ തുടങ്ങിയ ഉയർന്ന മലയോര മേഖലകളിൽ മഴയുടെ അളവ് 150 മില്ലിമീറ്റർ വരെ ഉയർന്നേക്കാം.
മൗണ്ട് വെല്ലിംഗ്ടണിൽ താപനില മൈനസിലേക്ക്; കനത്ത മഞ്ഞുവീഴ്ചയ്ക്ക് സാധ്യത:
വ്യാഴാഴ്ച രാത്രിയോടെ പ്രവിശ്യ കടന്നുപോകുന്ന ശക്തമായ കോൾഡ് ഫ്രണ്ട് വടക്കൻ-പടിഞ്ഞാറൻ തീരപ്രദേശങ്ങളിൽ കടുത്ത ഇടിമിന്നലിനും കാരണമാകും. വെള്ളിയാഴ്ചയോടെ ഈ തണുത്ത കാറ്റ് കടന്നുപോകുന്നതോടെ അന്തരീക്ഷ താപനില വൻതോതിൽ ഇടിയുകയും തെക്കൻ മേഖലകളിൽ സമുദ്രനിരപ്പിൽ നിന്നും 500 മീറ്റർ വരെ താഴ്ന്ന പ്രദേശങ്ങളിൽ പോലും മഞ്ഞുവീഴ്ചയ്ക്ക് (Snowfall) സാധ്യതയുണ്ടെന്നും കാലാവസ്ഥാ നിരീക്ഷകൻ ഡാനിയൽ ഷെർവിൻ-സിംപ്സൺ വ്യക്തമാക്കി. ഹൊബാർട്ടിലെ പ്രശസ്തമായ കുനാന്തി/മൗണ്ട് വെല്ലിംഗ്ടൺ (kunanyi/Mount Wellington), ക്രേഡിൽ മൗണ്ടൻ, ബെൻ നെവിസ്, ഹാർട്സ് മൗണ്ടൻ എന്നീ മലനിരകളിൽ വാരന്ത്യത്തോടെ ഇരട്ട അക്ക സെന്റിമീറ്റർ അളവിൽ കനത്ത മഞ്ഞുവീഴ്ച ഉണ്ടാകും. നിലവിൽ മൗണ്ട് റീഡിൽ 3.1 ഡിഗ്രിയും മൗണ്ട് വെല്ലിംഗ്ടണിൽ 3.5 ഡിഗ്രിയുമാണ് താപനിലയെങ്കിലും, വീശിയടിക്കുന്ന കടുത്ത തണുത്ത കാറ്റ് കാരണം അനുഭവപ്പെടുന്ന തണുപ്പ് മൈനസ് 9 ഡിഗ്രിക്ക് താഴേക്ക് പതിച്ചിരിക്കുകയാണ്. മലയോര മേഖലകളിലൂടെ യാത്ര ചെയ്യുന്നവർ കടുത്ത ജാഗ്രത പാലിക്കണമെന്ന് ദുരന്തനിവാരണ വിഭാഗം നിർദ്ദേശിച്ചു.