ഹൊബാർട്ട്: ഓസ്‌ട്രേലിയൻ ദ്വീപ് സംസ്ഥാനമായ ടാസ്മാനിയയിൽ പെട്രോൾ വില ഒരു വർഷത്തിനിടയിലെ ഏറ്റവും ഉയർന്ന നിരക്കിലെത്തി. സംസ്ഥാനത്തെ ശരാശരി അൺലെഡഡ് പെട്രോൾ വില ലിറ്ററിന് 2.47 ഡോളറായി (ഏകദേശം 136 ഇന്ത്യൻ രൂപ) ഉയർന്നതായി ഔദ്യോഗിക ഇന്ധന നിരീക്ഷണ പോർട്ടലായ 'ഫ്യുവൽചെക്ക് ടാസ്' (FuelCheck TAS) പുറത്തുവിട്ട പുതിയ കണക്കുകൾ വ്യക്തമാക്കുന്നു. ഡീസൽ വില ലിറ്ററിന് 2.89 ഡോളറിലാണ് വ്യാപാരം തുടരുന്നത്. കഴിഞ്ഞ ഒരു മാസത്തിനിടെ മാത്രം ഇരു ഇന്ധനങ്ങൾക്കും ലിറ്ററിന് ശരാശരി 30 സെന്റിലധികം വർധനവാണ് രേഖപ്പെടുത്തിയത്.
ഫെബ്രുവരി മാസത്തിൽ ലിറ്ററിന് 1.76 ഡോളറായിരുന്ന പെട്രോൾ വിലയിൽ ഇതുവരെ 41 ശതമാനവും, 1.86 ഡോളറായിരുന്ന ഡീസൽ വിലയിൽ 55 ശതമാനവും കുതിച്ചുചാട്ടമാണുണ്ടായത്. ഓഗസ്റ്റ് 2-ന് ഫെഡറൽ സർക്കാർ നൽകിവന്നിരുന്ന ഇന്ധന എക്സൈസ് തീരുവ ഇളവുകൾ (Fuel excise relief) പൂർണ്ണമായി അവസാനിച്ചതാണ് വിലക്കയറ്റം ഇത്രത്തോളം രൂക്ഷമാക്കിയത്. വില വർധനവ് ജനങ്ങളുടെ നിത്യജീവിതച്ചെലവുകളിൽ വലിയ സമ്മർദ്ദം ചെലുത്തുന്നുണ്ടെങ്കിലും സംസ്ഥാനത്ത് ഇന്ധന ക്ഷാമമില്ലെന്ന് സർക്കാർ വ്യക്തമാക്കി. സെപ്റ്റംബർ 29-ലെ കണക്കുകൾ പ്രകാരം 65 ദിവസത്തേക്കുള്ള പെട്രോളും 51 ദിവസത്തേക്കുള്ള ഡീസലും സ്റ്റോക്കുണ്ട്. ഇന്ധനവില വർധനവിന്റെ ആഘാതം കുറയ്ക്കുന്നതിനായി പ്രഖ്യാപിച്ച സൗജന്യ ബസ്, ഫെറി യാത്രാ ആനുകൂല്യങ്ങൾ അടുത്ത വർഷം ജൂൺ 30 വരെ തുടരുമെന്നും ടാസ്മാനിയൻ സർക്കാർ അറിയിച്ചു.