ഹോബാർട്ട്: ഓസ്‌ട്രേലിയയിൽ ഏറ്റവും ഉയർന്ന തൊഴിലില്ലായ്മ നിരക്ക് രേഖപ്പെടുത്തുന്ന സംസ്ഥാനമായി ടാസ്മാനിയ. ഓസ്‌ട്രേലിയൻ ബ്യൂറോ ഓഫ് സ്റ്റാറ്റിസ്റ്റിക്‌സ് (ABS) പുറത്തുവിട്ട ഏറ്റവും പുതിയ ട്രെൻഡ് കണക്കുകൾ പ്രകാരം ടാസ്മാനിയയിലെ തൊഴിലില്ലായ്മ നിരക്ക് 5.2 ശതമാനത്തിൽ മാറ്റമില്ലാതെ തുടരുകയാണ്. ദേശീയ ശരാശരി 4.6 ശതമാനമായി തുടരുമ്പോഴാണ് ടാസ്മാനിയ ഈ തിരിച്ചടി നേരിടുന്നത്. കൂടാതെ രാജ്യത്തെ ഏറ്റവും കുറഞ്ഞ തൊഴിൽ പങ്കാളിത്ത നിരക്കും (60.2%) ജനസംഖ്യാ ആനുപാതിക തൊഴിൽ നിരക്കും (57.1%) ടാസ്മാനിയയിലാണ് രേഖപ്പെടുത്തിയത്.
കഴിഞ്ഞ വർഷം ഓഗസ്റ്റിൽ ലിബറൽ സർക്കാർ രൂപീകരിച്ചതിന് ശേഷം സംസ്ഥാനത്ത് ഏകദേശം 7,000-ത്തോളം തൊഴിലുകൾ നഷ്ടപ്പെട്ടതായി ഷാഡോ ട്രഷറർ ഡീൻ വിന്റർ ആരോപിച്ചു. ആഗോള സാമ്പത്തിക മാന്ദ്യത്തിന് ശേഷമുള്ള ഏറ്റവും ഗുരുതരമായ തൊഴിൽ നഷ്ടത്തിലൂടെയാണ് ടാസ്മാനിയ കടന്നുപോകുന്നതെന്നും തൊഴിൽ മേഖലയിലെ എല്ലാ പ്രധാന സൂചികകളിലും സംസ്ഥാനം ഏറ്റവും പിന്നിലാണെന്നും അദ്ദേഹം വിമർശിച്ചു. അടുത്ത അഞ്ച് വർഷത്തിനുള്ളിൽ പൊതുമേഖലയിൽ നിന്ന് 1,800-ഓളം ജീവനക്കാരെ ഒഴിവാക്കാനുള്ള പ്രീമിയർ ജെറമി റോക്ക്‌ലിഫിന്റെ നീക്കം സ്ഥിതി കൂടുതൽ വഷളാക്കുമെന്നും പ്രതിപക്ഷം ചൂണ്ടിക്കാട്ടി.
എന്നാൽ, ഉയർന്ന പലിശനിരക്കും ഇന്ധനവില വർധനവും സൃഷ്ടിച്ച ആഗോള വെല്ലുവിളികൾക്കിടയിലും ടാസ്മാനിയൻ സമ്പദ്‌വ്യവസ്ഥ ശക്തമായി നിലനിൽക്കുകയാണെന്ന് ട്രഷറർ എറിക് അബെറ്റ്‌സ് വ്യക്തമാക്കി. മൗണ്ട് ലയൽ, സാവേജ് റിവർ, മാക്വാറി പോയിന്റ് തുടങ്ങിയ വൻകിട വികസന പദ്ധതികൾ പുരോഗമിക്കുകയാണെന്നും കയറ്റുമതിയിൽ റെക്കോർഡ് നേട്ടം കൈവരിച്ചതായും അദ്ദേഹം കൂട്ടിച്ചേർത്തു. മുൻപ് ലേബർ പാർട്ടിയുടെ ഭരണകാലത്ത് തൊഴിലില്ലായ്മ നിരക്ക് ഏഴ് ശതമാനത്തിന് മുകളിലായിരുന്നുവെന്നും തങ്ങളുടെ ഭരണത്തിൽ 45,000-ലധികം പുതിയ തൊഴിലവസരങ്ങൾ സൃഷ്ടിച്ചുവെന്നും അദ്ദേഹം അവകാശപ്പെട്ടു.