ഓസ്ട്രേലിയയിൽ ഏറ്റവും വലിയ റോഡ് മരണ വർധന ടാസ്മാനിയയിൽ രേഖപ്പെടുത്തിയതായി പുതിയ കണക്കുകൾ വ്യക്തമാക്കുന്നു. 2025-ൽ ടാസ്മാനിയൻ റോഡുകളിൽ 44 പേർ മരിച്ചു — 2024-ലെ 31 മരണങ്ങളുമായി താരതമ്യപ്പെടുത്തുമ്പോൾ 42 ശതമാനത്തിന്റെ കുതിച്ചുചാട്ടമാണ് ഇത്.
ഓസ്ട്രേലിയൻ ഓട്ടോമൊബൈൽ അസോസിയേഷൻ പുറത്തുവിട്ട കണക്കുകൾ പ്രകാരം, ദേശീയതലത്തിൽ മരണനിരക്ക് വെറും 1.7 ശതമാനം മാത്രമേ ഉയർന്നിട്ടുള്ളൂ.
മോട്ടോർ സൈക്കിൾ യാത്രികരെയാണ് ഏറ്റവും കൂടുതൽ ബാധിച്ചത്, മരണനിരക്ക് നാലിൽ നിന്ന് 12 ആയി മൂന്നിരട്ടിയായി. ഡ്രൈവർ മരണനിരക്ക് 12.5% വർദ്ധിച്ച് 18 ആയി, അതേസമയം യാത്രക്കാരുടെ മരണനിരക്ക് 14% വർദ്ധിച്ച് എട്ടായി. കാൽനടയാത്രികരായ അഞ്ച് പേർ കൊല്ലപ്പെട്ടു — 25 ശതമാനത്തിന്റെ വർധനയാണിത്. ഒരു സൈക്ലിസ്റ്റും മരിച്ചു; 2022 ഫെബ്രുവരിക്ക് ശേഷമുള്ള ആദ്യ സൈക്ലിംഗ് മരണമാണ് ഇത്.
ഇപ്പോൾ ടാസ്മാനിയയിലെ റോഡ് മരണനിരക്ക് ഇപ്പോൾ 100,000 നിവാസികൾക്ക് 7.6 ആണ്, നോർത്തേൺ ടെറിട്ടറിക്ക് പിന്നിൽ രണ്ടാമതും ദേശീയ നിരക്കായ 4.8 നേക്കാൾ വളരെ കൂടുതലുമാണ്.
RACT അഡ്വക്കസി ജനറൽ മാനേജർ മെലിന്ദ പെർസിവൽ ഈ കണക്കുകൾ ഭീകരകരമാണെന്ന് പ്രതികരിച്ചു.
“ഇവ വെറും കണക്കുകൾ മാത്രമല്ല; അനാവശ്യമായി നഷ്ടപ്പെട്ട മനുഷ്യജീവിതങ്ങളാണ്,” അവർ പറഞ്ഞു. വേഗത, ശ്രദ്ധവ്യതിചലനം, ക്ഷീണം, മദ്യപിച്ച് വാഹനമോടിക്കൽ എന്നിവ പോലുള്ള തടയാവുന്ന പെരുമാറ്റങ്ങളാണ് പല അപകടങ്ങൾക്കും കാരണമെന്ന് അവർ ചൂണ്ടിക്കാട്ടി.
എല്ലാവരും സുരക്ഷിതമായ ഡ്രൈവിങ്ങിനെക്കുറിച്ച് ചർച്ചകൾ ആരംഭിക്കണമെന്നും വാഹനമോടിക്കുന്ന ഓരോ തവണയും വ്യക്തിഗത ഉത്തരവാദിത്വം ഏറ്റെടുക്കണമെന്നും അവർ ആവശ്യപ്പെട്ടു.
ഫോൺ ഉപയോഗം ഒഴിവാക്കുക, വേഗപരിധി പാലിക്കുക, മയക്കുമരുന്നോ മദ്യമോ ഉപയോഗിച്ച് വാഹനമോടിക്കരുത്, ക്ഷീണിച്ചിരിക്കുമ്പോൾ ഡ്രൈവ് ചെയ്യരുത്, സീറ്റ് ബെൽറ്റ് നിർബന്ധമായും ധരിക്കണം എന്നുമാണ് നിർദേശം.
യുവ ഡ്രൈവർമാർ അപകടങ്ങളിൽ കൂടുതലായി ഉൾപ്പെടുന്ന സാഹചര്യത്തിൽ, സംസ്ഥാന സർക്കാരുമായി ചേർന്ന് യുവജന റോഡ് സുരക്ഷാ പദ്ധതി വികസിപ്പിക്കുകയാണെന്ന് RACT അറിയിച്ചു.
ഇൻഫ്രാസ്ട്രക്ചർ മന്ത്രി കെറി വിന്സെന്റ് 2026 നിർണായക വർഷമാകണമെന്നും പറഞ്ഞു. വാഹനയാത്രികരായാലും കാൽനടയാത്രക്കാരായാലും എല്ലാവർക്കും റോഡ് സുരക്ഷയിൽ പങ്കുണ്ടെന്ന് അദ്ദേഹം പറഞ്ഞു.
വേഗം, സീറ്റ് ബെൽറ്റ് ധരിക്കാത്തത്, മദ്യ-മയക്കുമരുന്ന് ഉപയോഗം, ക്ഷീണം, ശ്രദ്ധക്കുറവ് എന്നീ ‘ഫേറ്റൽ ഫൈവ്’ ഒഴിവാക്കണമെന്ന് അദ്ദേഹം ആവശ്യപ്പെട്ടു.