ടാസ്മാനിയയിൽ വക്കീലന്മാരുടെ കടുത്ത ക്ഷാമം; കുറഞ്ഞ ശമ്പളവും ജോലിഭാരവും കാരണം കരിയർ ഉപേക്ഷിക്കുന്നു

Image / Pulse

ഹോബാർട്ട്: ഓസ്‌ട്രേലിയൻ സംസ്ഥാനമായ ടാസ്മാനിയയിലെ ക്രിമിനൽ നീതിന്യായ വ്യവസ്ഥ കടുത്ത പ്രതിസന്ധിയിലേക്ക് നീങ്ങുന്നതായി റിപ്പോർട്ട്. കുറഞ്ഞ സാമ്പത്തിക നേട്ടവും കടുത്ത മാനസിക സമ്മർദ്ദവും കാരണം സംസ്ഥാനത്ത് ക്രിമിനൽ വക്കീലന്മാർ (Criminal Lawyers) കൂട്ടത്തോടെ ഈ മേഖല ഉപേക്ഷിക്കുകയാണെന്ന് യൂണിവേഴ്സിറ്റി ഓഫ് ടാസ്മാനിയ (UTas) നടത്തിയ പുതിയ പഠനം വ്യക്തമാക്കുന്നു. നിയമരംഗത്ത് എത്തുന്ന ഭൂരിഭാഗം പേരും തങ്ങളുടെ കരിയറിലെ ആദ്യത്തെ മൂന്ന് വർഷത്തിനുള്ളിൽ തന്നെ പ്രാക്ടീസ് അവസാനിപ്പിക്കുന്നതായാണ് കണ്ടെത്തൽ.

'അട്രാക്റ്റിങ് ആൻഡ് റീറ്റെയിനിങ് ക്രിമിനൽ ലോയേഴ്സ് ഇൻ ടാസ്മാനിയ' (ഭേദഗതി ചെയ്ത റിപ്പോർട്ട് പതിപ്പ്: 'Justice Needs Lawyers') എന്ന പേരിൽ ഈ മാസം പുറത്തിറക്കിയ പഠന റിപ്പോർട്ട് നിലവിലുള്ളതും മുൻപ് പ്രവർത്തിച്ചിരുന്നതുമായ 211 നിയമവിദഗ്ദ്ധർക്കിടയിൽ നടത്തിയ സർവേയുടെയും അഭിമുഖങ്ങളുടെയും അടിസ്ഥാനത്തിലാണ് തയാറാക്കിയിട്ടുള്ളത്. വക്കീലന്മാർ കരിയർ മാറുന്നതിനുള്ള ഏറ്റവും പ്രധാന കാരണമായി ചൂണ്ടിക്കാണിക്കുന്നത് പണച്ചെലവുകൾക്ക് അനുയോജ്യമായ ശമ്പളം ലഭിക്കുന്നില്ല എന്നതാണ്. നിലവിൽ ജോലി ചെയ്യുന്ന ക്രിമിനൽ വക്കീലന്മാരിൽ 71 ശതമാനം പേരും തങ്ങളുടെ ജോലിയുടെ ഏറ്റവും മോശം വശമായി കുറഞ്ഞ സാമ്പത്തിക വരുമാനത്തെ രേഖപ്പെടുത്തിയപ്പോൾ, 56 ശതമാനം പേർ മികച്ചൊരു വ്യക്തിജീവിതം (Poor work-life balance) കൊണ്ടുപോകാൻ സാധിക്കാത്തതാണ് പ്രശ്നമായി പറഞ്ഞത്.

ലീഗൽ എയ്ഡ് നിരക്കുകളിലെ വലിയ വ്യത്യാസം:

സംസ്ഥാനത്ത് ലീഗൽ എയ്ഡ് (Legal Aid - സൗജന്യ നിയമസഹായം) കേസുകൾ ചെയ്യുന്ന വക്കീലന്മാർക്ക് മണിക്കൂറിന് 160 മുതൽ 180 ഡോളർ വരെയാണ് ലഭിക്കുന്നത്. എന്നാൽ സ്വകാര്യ കമ്പനികളിൽ (Private firms) ഇത് മണിക്കൂറിന് 220 മുതൽ 880 ഡോളർ വരെയാണ്. ഈ ഭീമമായ വ്യത്യാസം കാരണം പ്രൈവറ്റ് കമ്പനികൾ തങ്ങളുടെ വക്കീലന്മാർക്ക് വലിയ ഫിനാൻഷ്യൽ ടാർഗെറ്റുകൾ നൽകുകയും ഇത് ലീഗൽ എയ്ഡ് കേസുകൾ ഏറ്റെടുക്കുന്നതിൽ നിന്നും ഇവരെ പിന്നോട്ട് വലിപ്പിക്കുകയും ചെയ്യുന്നു. വക്കീലന്മാർ ജയിലുകളിലും കോടതി സെല്ലുകളിലും പ്രതികളെ സന്ദർശിക്കുമ്പോഴുള്ള സുരക്ഷാ പ്രശ്നങ്ങളും (പ്രത്യേകിച്ച് വനിതാ വക്കീലന്മാർക്ക്) കടുത്ത മാനസിക സമ്മർദ്ദവും ഈ മേഖലയിൽ തുടരുന്നതിന് തടസ്സമാകുന്നതായി മുഖ്യ ഗവേഷകയായ അസോസിയേറ്റ് പ്രൊഫസർ ഇവെറ്റ് മേക്കർ (Associate Professor Yvette Maker) ചൂണ്ടിക്കാട്ടി.

കോടതികളിൽ കേസുകൾ കെട്ടിക്കിടക്കുന്ന അവസ്ഥ ഒഴിവാക്കാനും നീതിന്യായ വ്യവസ്ഥയുടെ സുഗമമായ പ്രവർത്തനത്തിനും സർക്കാർ അടിയന്തരമായി ഇടപെടണമെന്ന് ടാസ്മാനിയ ലോ സൊസൈറ്റി പ്രസിഡന്റ് അമേലിയ ഹിഗ്സ് (Amelia Higgs) ആവശ്യപ്പെട്ടു. ലീഗൽ എയ്ഡ് ഫണ്ട് വർദ്ധിപ്പിക്കുക, ജൂനിയർ വക്കീലന്മാർക്കായി പ്രത്യേക മെന്ററിങ് പ്രോഗ്രാമുകൾ ആരംഭിക്കുക, മാനസികാരോഗ്യ പിന്തുണ ഉറപ്പാക്കുക തുടങ്ങിയ 20 സുപ്രധാന നിർദ്ദേശങ്ങൾ അടങ്ങിയ റിപ്പോർട്ട്Adopt ചെയ്യാൻ സൊസൈറ്റി സംസ്ഥാന സർക്കാരിന് മേൽ സമ്മർദ്ദം ചെലുത്തും.