കാൻബറ: സൗദി അറേബ്യയിലെ വിമാനത്താവളങ്ങൾക്ക് നേരെ തുടർച്ചയായി ഉണ്ടാകുന്ന മാരകമായ മിസൈൽ ആക്രമണങ്ങളുടെ പശ്ചാത്തലത്തിൽ, അങ്ങോട്ടേക്കുള്ള എല്ലാവിധ യാത്രകളും ഒഴിവാക്കണമെന്ന് ഓസ്‌ട്രേലിയൻ പൗരന്മാർക്ക് മുന്നറിയിപ്പ്. ഓസ്‌ട്രേലിയൻ സർക്കാരിന്റെ ട്രാവൽ അഡ്വൈസറി ഏജൻസിയായ സ്മാർട്ട് ട്രാവലറാണ് (Smart Traveller) യാത്രയുടെ ആവശ്യം പരിഗണിക്കാതെ തന്നെ സൗദി അറേബ്യ വഴിയുള്ള യാത്ര പൂർണ്ണമായി ഒഴിവാക്കണമെന്ന് ആവശ്യപ്പെട്ട് അടിയന്തര ജാഗ്രതാ നിർദ്ദേശം പുറപ്പെടുവിച്ചത്.
യുഎസ്-ഇറാൻ സംഘർഷം രൂക്ഷമാകുന്നതിന്റെ ഭാഗമായി വടക്കൻ യെമനിൽ നിന്ന് പ്രവർത്തിക്കുന്ന ഇറാൻ പിന്തുണയുള്ള ഹൂത്തി വിമതരാണ് അമേരിക്കൻ സഖ്യകക്ഷിയായ സൗദി അറേബ്യയിലെ വിമാനത്താവളങ്ങൾക്ക് നേരെ ആക്രമണം നടത്തുന്നത്. റിയാദിലെ കിംഗ് ഖാലിദ് ഇന്റർനാഷണൽ എയർപോർട്ടിലേക്ക് യാതൊരു കാരണവശാലും യാത്ര ചെയ്യരുതെന്ന് നിർദ്ദേശമുണ്ട്. മറ്റ് വിമാനത്താവളങ്ങളിലേക്ക് യാത്ര ചെയ്യുന്നവർ അതീവ ജാഗ്രത പാലിക്കണമെന്നും ഹൂത്തികൾ ഇനിയും വിമാനത്താവളങ്ങളെ ലക്ഷ്യമിടുമെന്ന് ഭീഷണി മുഴക്കിയിട്ടുണ്ടെന്നും മുന്നറിയിപ്പിൽ പറയുന്നു.
വ്യോമാതിർത്തി അടച്ചിടലും വിമാന സർവീസുകൾ റദ്ദാക്കലും വൈകലും കാരണം മേഖലയിലെ വ്യോമഗതാഗതം പൂർണ്ണമായും താറുമാറായിരിക്കുകയാണ്. മിഡിൽ ഈസ്റ്റ് വഴി യാത്ര ചെയ്യാൻ നിർബന്ധിതരാകുന്ന യാത്രക്കാർ പുറപ്പെടുന്നതിന് മുൻപ് തന്നെ വിമാനക്കമ്പനികളുമായി ബന്ധപ്പെട്ട് സമയം സ്ഥിരീകരിക്കണമെന്നും, ആവശ്യമെങ്കിൽ യുഎഇയോ ഖത്തറോ വഴിയുള്ള കരമാർഗ്ഗ യാത്രാ ബദലുകൾ പരിഗണിക്കണമെന്നും ഓസ്‌ട്രേലിയൻ വിദേശകാര്യ വകുപ്പ് അറിയിച്ചു.