മെൽബൺ: ഓസ്‌ട്രേലിയയുടെ തെക്കുകിഴക്കൻ മേഖലകളിൽ കനത്ത നാശനഷ്ടം വിതച്ച് ആഞ്ഞടിച്ച ഇടിമിന്നലോട് കൂടിയ പേമാരിയും മിന്നൽ പ്രളയവും അയയുന്നു. ന്യൂ സൗത്ത് വെയിൽസ് (NSW), വിക്ടോറിയ എന്നീ സംസ്ഥാനങ്ങളിലാണ് ശനിയാഴ്ച തീവ്ര കാലാവസ്ഥാ മുന്നറിയിപ്പ് നൽകേണ്ട സാഹചര്യമുണ്ടായത്. ന്യൂ സൗത്ത് വെയിൽസിലെ സെൻട്രൽ വെസ്റ്റ്, സെൻട്രൽ-സതേൺ ടേബിൾലാൻഡ്‌സ്, ഇല്ലവാര മേഖലകളിലുടനീളം രൂപപ്പെട്ട കനത്ത കാറ്റും മഴയും വലിയ പ്രതിസന്ധി സൃഷ്ടിച്ചു. ന്യൂനമർദ്ദ രൂപീകരണത്തെത്തുടർന്ന് തെക്കൻ തണുത്ത കാറ്റും വീശിയടിച്ചതായി കാലാവസ്ഥാ നിരീക്ഷകർ വ്യക്തമാക്കി.
വിക്ടോറിയയിലെ നോർത്ത് ഈസ്റ്റ്, നോർത്തേൺ കൺട്രി ജില്ലകളിൽ അതിശക്തമായ മഴയാണ് പെയ്തിറങ്ങിയത്. ലോണിലെ മൗണ്ട് കൗലിയിൽ ആറ് മണിക്കൂറിനിടെ 72 മില്ലിമീറ്ററും ബെൻവെറിനിൽ മൂന്ന് മണിക്കൂറിനുള്ളിൽ 64 മില്ലിമീറ്ററും മഴ രേഖപ്പെടുത്തി. തലൻഗട്ട ക്രീക്കിലും ബൺയിപ്പ് നദിയിലും വെള്ളപ്പൊക്ക മുന്നറിയിപ്പുകൾ നൽകേണ്ടി വന്നു. എന്നാൽ ശനിയാഴ്ച വൈകുന്നേരത്തോടെ വിക്ടോറിയയിലെ ഭൂരിഭാഗം പ്രദേശങ്ങളിലും സ്ഥിതിഗതികൾ നിയന്ത്രണവിധേയമായിട്ടുണ്ട്. ഞായറാഴ്ചയോടെ ന്യൂനമർദ്ദം തീരത്തുനിന്ന് പൂർണ്ണമായി നീങ്ങുമെന്നും രാജ്യത്തുടനീളം പൊതുവെ തെളിഞ്ഞ കാലാവസ്ഥ പ്രതീക്ഷിക്കാമെന്നും അധികൃതർ അറിയിച്ചു.