ക്വീൻസ്‌ലൻഡിൽ ഫ്യൂണറൽ ഹോമിൽ മൃതദേഹത്തോട് അതിക്രമം നടത്തിയെന്ന കേസിൽ രണ്ട് പുരുഷന്മാരും ഒരു സ്ത്രീയും അറസ്റ്റിലായി. ലോഗൻ നഗരത്തിലെ ബ്രൗൺസ് പ്ലെയിൻസിലുള്ള സ്വാൻബറോ ഫ്യൂണറൽസിലാണ് സംഭവം. വെള്ളിയാഴ്ച ഉച്ചയ്ക്ക് ഒരു മണിക്ക് മുമ്പ് മരിച്ചുപോയ പരിചയക്കാരന്റെ മൃതദേഹം കാണാനായാണ് മൂവരും ഫ്യൂണറൽ ഹോമിലെത്തിയത്. ഇതിനിടെ ഒരാൾ മൃതദേഹത്തോട് അതിക്രമം നടത്തിയ ശേഷം പൊലീസ് എത്തുന്നതിന് മുമ്പ് സ്ഥലത്തുനിന്ന് കടന്നുകളഞ്ഞെന്നാണ് ക്വീൻസ്‌ലൻഡ് പൊലീസിന്റെ വിശദീകരണം. മറ്റ് രണ്ടുപേരെ സംഭവസ്ഥലത്തുവെച്ചുതന്നെ അറസ്റ്റ് ചെയ്തു.
ഫ്യൂണറൽ ഹോം ഡയറക്ടർ എസ്തർ സ്വാൻബറോയുടെ മൊഴി പ്രകാരം, മൃതദേഹം കാണാനെത്തിയ ബന്ധുക്കൾ മുറിയിൽനിന്ന് പുറത്തുപോകാൻ അവരോട് ആവശ്യപ്പെട്ടു. തിരികെ എത്തിയപ്പോൾ ഇവരുടെ പെരുമാറ്റത്തിൽ സംശയം തോന്നിയതിനെത്തുടർന്ന് എന്താണ് സംഭവിച്ചതെന്ന് ചോദിച്ചു. തുടർന്ന് മൃതദേഹം പരിശോധിച്ചപ്പോഴാണ് ശരീരഭാഗമോ കലകളോ മുറിച്ചെടുക്കാൻ ശ്രമിച്ചതായി ശ്രദ്ധയിൽപ്പെട്ടതെന്ന് അവർ 9ന്യൂസിനോട് പറഞ്ഞു. ഇത്തരമൊരു സംഭവം മുമ്പൊരിക്കലും ഉണ്ടായിട്ടില്ലെന്നും സംഭവത്തിൽ ഞെട്ടിപ്പോയെന്നും സ്വാൻബറോ പ്രതികരിച്ചു. കുടുംബത്തെ സഹായിക്കാനാണ് തങ്ങൾ ശ്രമിച്ചതെന്നും എന്നാൽ മറ്റൊരു ലക്ഷ്യത്തോടെ തങ്ങളെ കബളിപ്പിക്കുകയായിരുന്നുവെന്ന് തിരിച്ചറിഞ്ഞില്ലെന്നും അവർ കൂട്ടിച്ചേർത്തു.
സംഭവത്തെത്തുടർന്ന് ഫ്യൂണറൽ ഹോമിൽ പൊലീസ് കുറ്റകൃത്യസ്ഥലമായി പ്രഖ്യാപിച്ച് പരിശോധന നടത്തി. രക്ഷപ്പെട്ട രണ്ടാമത്തെ പുരുഷനെ വൈകിട്ട് 6.30-ന് മുമ്പ് ബ്രൗൺസ് പ്ലെയിൻസിലെ ഒരു വീട്ടിൽനിന്ന് അറസ്റ്റ് ചെയ്തു. അറസ്റ്റിലായ 47-കാരൻ, 38-കാരൻ, 43-കാരി എന്നിവർക്കെതിരെ കുറ്റകൃത്യം ചെയ്യാനുള്ള ഉദ്ദേശ്യത്തോടെ സ്ഥലത്ത് പ്രവേശിക്കൽ, ആയുധവുമായി കുറ്റകൃത്യം ചെയ്യാൻ സ്ഥലത്ത് പ്രവേശിക്കാൻ ശ്രമിക്കൽ, മൃതദേഹത്തോടുള്ള അനുചിതമായ പെരുമാറ്റം എന്നീ മൂന്ന് കുറ്റങ്ങൾ വീതം ചുമത്തിയിട്ടുണ്ട്. മൂവരും ശനിയാഴ്ച ബ്രിസ്ബേൻ മജിസ്‌ട്രേറ്റ് കോടതിയിൽ ഹാജരാകേണ്ടതായിരുന്നു.