ഇന്ധനവില കുതിച്ചുയരുന്ന സാഹചര്യത്തിൽ ടിക്കറ്റ് നിരക്കുകൾ വർധിപ്പിക്കാനും ആഭ്യന്തര വിമാന സർവീസുകൾ വെട്ടിക്കുറയ്ക്കാനും ഓസ്‌ട്രേലിയൻ വിമാനക്കമ്പനിയായ ക്വാണ്ടാസ്. 2027-ൽ ക്വാണ്ടാസിന്റെയും ജെറ്റ്‌സ്റ്റാറിന്റെയും ആഭ്യന്തര വിമാന സർവീസുകൾ ആകെ നാല് ശതമാനം കുറയ്ക്കുമെന്ന് കമ്പനി വെള്ളിയാഴ്ച അറിയിച്ചു. ആഗോള വിപണിയിൽ എണ്ണവില ഉയരുന്നത് കമ്പനിയുടെ സാമ്പത്തിക നിലയെ ബാധിക്കുന്ന സാഹചര്യത്തിലാണ് നടപടി. 2026-ന്റെ രണ്ടാം പകുതിയിൽ ഇന്ധനത്തിനായി ഏകദേശം 375 കോടി ഓസ്‌ട്രേലിയൻ ഡോളർ ചെലവാകുമെന്നാണ് ക്വാണ്ടാസിന്റെ കണക്കുകൂട്ടൽ. നേരത്തെ കണക്കാക്കിയിരുന്നതിനെക്കാൾ 15 കോടി ഡോളർ അധികമാണിത്.
ഇന്ധനച്ചെലവ് വർധിക്കുന്നതിനനുസരിച്ച് ടിക്കറ്റ് നിരക്കുകളിലും സർവീസ് ശേഷിയിലും മാറ്റം വരുത്തുന്നത് തുടരുമെന്ന് കമ്പനി പ്രസ്താവനയിൽ വ്യക്തമാക്കി. 2027-ലും ഇന്ധനവില ഉയർന്ന നിലയിൽ തുടരാനാണ് സാധ്യതയെന്നും അറിയിച്ചു. വില വർധനയുണ്ടായിട്ടും യാത്രക്കാരുടെ ആവശ്യകതയിൽ വലിയ കുറവുണ്ടായിട്ടില്ലെന്ന് ക്വാണ്ടാസ് വ്യക്തമാക്കി. മധ്യപൂർവദേശത്തേക്കുള്ള യാത്രകൾ ഒഴിവാക്കി മറ്റ് ലക്ഷ്യസ്ഥാനങ്ങളിലേക്ക് മാറുന്ന യാത്രക്കാരുടെ എണ്ണം വർധിച്ചതോടെ ക്വാണ്ടാസിന്റെയും ജെറ്റ്‌സ്റ്റാറിന്റെയും അന്താരാഷ്ട്ര സർവീസുകൾക്ക് മികച്ച ഡിമാൻഡുണ്ട്. ആഭ്യന്തര വിനോദസഞ്ചാര യാത്രകളുടെ ആവശ്യകതയും ശക്തമായി തുടരുകയാണ്.
അതേസമയം, പ്രീമിയം വിഭാഗത്തിലുള്ള ക്വാണ്ടാസിന്റെ അന്താരാഷ്ട്ര വിമാന സർവീസുകൾ ഒരു ശതമാനം വർധിപ്പിക്കും. കമ്പനിയുടെ ലോയൽറ്റി പദ്ധതിയായ ക്വാണ്ടാസ് ഫ്രീക്വന്റ് ഫ്ലയറിന്റെ 2026-27 സാമ്പത്തിക വർഷത്തെ പ്രവർത്തനലാഭത്തിൽ അഞ്ച് മുതൽ ഏഴ് ശതമാനം വരെ വളർച്ചയുണ്ടാകുമെന്നും പ്രതീക്ഷിക്കുന്നു. 2026-27 സാമ്പത്തിക വർഷത്തേക്കുള്ള ഇന്ധനാവശ്യത്തിന്റെ 85 ശതമാനവും മുൻകൂട്ടി വില ഉറപ്പാക്കി സംരക്ഷിച്ചിട്ടുണ്ടെന്നും കമ്പനി അറിയിച്ചു. ഈ സാമ്പത്തിക വർഷത്തെ മൊത്തം മൂലധനച്ചെലവ് നേരത്തെ കണക്കാക്കിയ 430 കോടി മുതൽ 460 കോടി ഡോളർ വരെയുള്ള പരിധിയുടെ താഴ്ന്ന നിലയിലായിരിക്കുമെന്നാണ് പ്രതീക്ഷ.
ഇറാനിലെ തുടരുന്ന സംഘർഷത്തെത്തുടർന്ന് ഇന്ധനവിലയിലുണ്ടാകുന്ന ചാഞ്ചാട്ടം ഓസ്‌ട്രേലിയൻ വിമാനഗതാഗത മേഖലയ്ക്ക് സമ്മർദം സൃഷ്ടിക്കുന്നുണ്ട്. ഇതിന്റെ ഭാഗമായി ഏപ്രിലിലും ക്വാണ്ടാസ് ആഭ്യന്തര സർവീസുകൾ അഞ്ച് ശതമാനം കുറച്ചിരുന്നു. 2025-26 സാമ്പത്തിക വർഷത്തിന്റെ രണ്ടാം പകുതിയിൽ വിമാന ഇന്ധനത്തിനായി 310 കോടി മുതൽ 330 കോടി ഡോളർ വരെ ചെലവാകുമെന്നായിരുന്നു കമ്പനിയുടെ നേരത്തെയുള്ള കണക്ക്. അതേസമയം, അമേരിക്കയിലെ ഇടക്കാല തിരഞ്ഞെടുപ്പ് ഫലത്തെത്തുടർന്നുണ്ടായ ഇടിവിന് ശേഷം ബ്രെന്റ് ക്രൂഡ് ഓയിൽ വില ബാരലിന് 99.18 മുതൽ 99.52 യുഎസ് ഡോളർ വരെയാണ് വ്യാപാരം നടത്തുന്നത്.