സിഡ്നി: 85-കാരനായ സിഡ്നി സ്വദേശി ക്രിസ് ബാഗ്സാരിയനെ തട്ടിക്കൊണ്ടുപോയി കൊലപ്പെടുത്തിയ കേസിൽ മറ്റൊരു സംശയാസ്പദ വ്യക്തിയെ തിരിച്ചറിയാൻ പൊതുജനങ്ങളുടെ സഹായം തേടി ന്യൂ സൗത്ത് വെയിൽസ് പൊലീസ്. ഫെബ്രുവരി 13-ന് പുലർച്ചെയാണ് നോർത്ത് റൈഡിലെ വീട്ടിൽ നിന്ന് ബാഗ്സാരിയനെ തട്ടിക്കൊണ്ടുപോയതെന്നാണ് പൊലീസ് ആരോപിക്കുന്നത്. തുടർന്ന് 11 ദിവസത്തോളം നീണ്ട തിരച്ചിലിനൊടുവിൽ അദ്ദേഹത്തിന്റെ മൃതദേഹം പിറ്റ് ടൗണിലെ ഒരു സ്ഥലത്ത് നിന്ന് കണ്ടെത്തി.
ബാഗ്സാരിയൻ യഥാർഥ ലക്ഷ്യമല്ലായിരുന്നുവെന്നും തെറ്റായാണ് അദ്ദേഹത്തെ തട്ടിക്കൊണ്ടുപോയതെന്നുമാണ് അന്വേഷണ സംഘത്തിന്റെ നിഗമനം. കേസുമായി ബന്ധപ്പെട്ട് ഇതിനകം നാല് പേരെ അറസ്റ്റ് ചെയ്ത് കുറ്റം ചുമത്തിയിട്ടുണ്ട്. തിങ്കളാഴ്ച പൊലീസ് പുറത്തുവിട്ട ചിത്രങ്ങളിൽ ഹൈ-വിസ് ഷർട്ട് ധരിച്ച ഒരാൾ ലെപ്പിങ്ടണിലെ ഒരു ഹാർഡ്വെയർ സ്റ്റോറിൽ സ്ലെഡ്ജ് ഹാമർ കൈയിൽ പിടിച്ചുനിൽക്കുന്നതായി കാണാം. ഫെബ്രുവരി 11-ന് രാവിലെ എടുത്ത ഈ ദൃശ്യങ്ങളിലെ വ്യക്തിക്ക് അന്വേഷണത്തിൽ നിർണായക വിവരങ്ങൾ നൽകാൻ കഴിയുമെന്നാണ് പൊലീസ് കരുതുന്നത്. സംഭവത്തെക്കുറിച്ച് എന്തെങ്കിലും വിവരം അറിയുന്നവർ മുന്നോട്ടുവരണമെന്ന് പൊലീസ് അഭ്യർഥിച്ചു. അന്വേഷണം തുടരുകയാണെന്നും കൂടുതൽ അറസ്റ്റുകൾ ഉണ്ടാകാൻ സാധ്യതയുണ്ടെന്നും അധികൃതർ അറിയിച്ചു.