മുട്ടിനേറ്റ തുടർച്ചയായ പരിക്കിനെത്തുടർന്ന് ഓസ്‌ട്രേലിയൻ ബാസ്‌കറ്റ്‌ബോൾ താരം ഐസക് ഹംഫ്രീസ് 28-ാം വയസ്സിൽ വിരമിച്ചു. 2022-ൽ നാഷണൽ ബാസ്‌കറ്റ്‌ബോൾ ലീഗ് (NBL) ചരിത്രത്തിൽ സ്വവർഗാനുരാഗിയാണെന്ന് പരസ്യമായി വെളിപ്പെടുത്തിയ ആദ്യ താരമായി ശ്രദ്ധ നേടിയ ഹംഫ്രീസ്, ചൊവ്വാഴ്ച വികാരനിർഭരമായ സമൂഹമാധ്യമ കുറിപ്പിലൂടെയാണ് വിരമിക്കൽ പ്രഖ്യാപിച്ചത്. സിഡ്‌നി കിങ്‌സ്, അഡലെയ്ഡ് 36ers, മെൽബൺ യുണൈറ്റഡ് ടീമുകൾക്കായി ആകെ 173 NBL മത്സരങ്ങളിൽ കളിച്ച ശേഷമാണ് താരം കരിയറിന് വിരാമമിടുന്നത്.
“ഇങ്ങനെ വിടപറയേണ്ടിവരുന്നതിൽ എനിക്ക് വലിയ സങ്കടമുണ്ട്. ചിലപ്പോൾ ജീവിതം നമ്മുടെ കഥ സ്വയം എഴുതുന്ന സാഹചര്യങ്ങൾ സൃഷ്ടിക്കും. മുട്ടിനേറ്റ പരിക്ക് തുടർന്നുകൊണ്ടിരിക്കുന്നതിനാൽ വളരെ ബുദ്ധിമുട്ടുള്ള ഈ തീരുമാനം എടുക്കേണ്ടിവന്നു,” ഹംഫ്രീസ് കുറിച്ചു. “സഹതാരങ്ങളെ എനിക്ക് മിസ് ചെയ്യും. ഒരുമിച്ചുള്ള ചിരിയും കഠിനമായ മത്സരസാഹചര്യങ്ങളും ആരാധകരെയും അവരുടെ ആരവങ്ങളെയും പിന്നിൽ ഒരു സമൂഹമാകെ പിന്തുണയ്ക്കുന്നുണ്ടെന്ന തോന്നലിനെയും ഞാൻ മിസ് ചെയ്യും. എന്റെ ജീവിതത്തിന്റെ വലിയൊരു ഭാഗം ഈ കായികരംഗത്തിനായി നൽകി. അതിന് പകരമായി ഞാൻ ഒരിക്കലും സങ്കൽപ്പിക്കാത്തൊരു ജീവിതമാണ് ബാസ്‌കറ്റ്‌ബോൾ എനിക്ക് സമ്മാനിച്ചത്,” അദ്ദേഹം പറഞ്ഞു. “ഇനിയും ഒരുപാട് പറയാനുണ്ട്. ഇപ്പോൾ, നന്ദി മാത്രം,” എന്നും ഹംഫ്രീസ് കുറിച്ചു.
2023 മുതൽ 2026 വരെ രണ്ടാം തവണ അഡലെയ്ഡ് 36ers-നായി കളിച്ചാണ് താരം കരിയർ അവസാനിപ്പിച്ചത്. 2017–18 സീസണിൽ NBL-ന്റെ റൂക്കി ഓഫ് ദ ഇയർ പുരസ്‌കാരം നേടിയ ഹംഫ്രീസ് പിന്നീട് ലീഗിലെ മികച്ച സെന്റർ താരങ്ങളിലൊരാളായി വളർന്നു. 2024-ൽ 36ers-ന്റെ ഏറ്റവും മൂല്യമേറിയ താരത്തിനുള്ള (MVP) പുരസ്‌കാരവും നേടി. ടീമിന്റെ സഹനായകനായും പ്രവർത്തിച്ചിട്ടുണ്ട്. അമേരിക്കൻ ബാസ്‌കറ്റ്‌ബോൾ ലീഗായ NBA-യിൽ അറ്റ്‌ലാന്റ ഹോക്‌സിനായും കളിച്ചിട്ടുള്ള ഹംഫ്രീസ് ഓസ്‌ട്രേലിയൻ പുരുഷ ദേശീയ ടീമായ ബൂമേഴ്‌സിനെയും നിരവധി തവണ പ്രതിനിധീകരിച്ചു.
മെൽബൺ യുണൈറ്റഡിനായി കളിക്കുന്നതിനിടെയാണ് 2022 നവംബറിൽ താൻ സ്വവർഗാനുരാഗിയാണെന്ന് താരം പരസ്യമായി വെളിപ്പെടുത്തിയത്. “എന്റെ ജീവിതകാലം മുഴുവൻ എന്നിലെ ഒരു കാര്യം ഞാൻ മറച്ചുവെച്ചിരുന്നു,” എന്നായിരുന്നു അന്ന് അദ്ദേഹത്തിന്റെ പ്രതികരണം. “ഞാൻ സൃഷ്ടിച്ച വ്യക്തിത്വം എന്റെ ജേഴ്‌സി ധരിക്കുന്ന ഓരോരുത്തരിലും, എനിക്ക് വീടെന്ന് വിളിക്കാൻ ഭാഗ്യം ലഭിച്ച ഓരോ ഇടത്തിലും നിലനിൽക്കുമെന്ന് പ്രതീക്ഷിക്കുന്നു. ഇതൊരു പൂർണമായ വിടപറച്ചിലല്ല; ഒരുപക്ഷേ, വീണ്ടും കാണുന്നതുവരെയുള്ള വിടപറച്ചിൽ മാത്രമാണ്,” വിരമിക്കൽ പ്രഖ്യാപനത്തിൽ ഹംഫ്രീസ് പറഞ്ഞു. “ഇപ്പോൾ, നിങ്ങളുടെ എട്ടാം നമ്പർ താരം എന്ന നിലയിൽ, നന്ദി,” എന്നും അദ്ദേഹം കൂട്ടിച്ചേർത്തു. വിരമിച്ചെങ്കിലും 36ers-ൽ സമൂഹസമ്പർക്കം, മാർക്കറ്റിങ്, വാണിജ്യ വിഭാഗങ്ങൾ എന്നിവയുമായി ബന്ധപ്പെട്ട് കളിക്കളത്തിന് പുറത്തുള്ള ചുമതല ഹംഫ്രീസ് ഏറ്റെടുത്തിട്ടുണ്ട്. ഹംഫ്രീസിന് പകരക്കാരനായി മുൻ NBA താരം മാങ്കോക്ക് മത്തിയാങ്ങിനെ ടീമിലെത്തിക്കാൻ 36ers ഒരുങ്ങുന്നതായി ന്യൂസ് കോർപ് റിപ്പോർട്ട് ചെയ്തു.