AI വളർച്ചയോടെ ഓസ്ട്രേലിയയിലെ ഡാറ്റാ സെന്ററുകളുടെ വൈദ്യുതി ഉപയോഗം വർദ്ധിക്കുന്നു

ആർട്ടിഫിഷ്യൽ ഇന്റലിജൻസിന്റെ (AI) വേഗത്തിലുള്ള വളർച്ച ഓസ്ട്രേലിയയിലെ ഡാറ്റാ സെന്ററുകളുടെ വൈദ്യുതി ആവശ്യകത വലിയ തോതിൽ ഉയർത്തുന്നതായി പുതിയ റിപ്പോർട്ടുകൾ വ്യക്തമാക്കുന്നു. AI സേവനങ്ങൾ പ്രവർത്തിപ്പിക്കാൻ ആവശ്യമായ ഡാറ്റാ സെന്ററുകൾ കൂടുതൽ വൈദ്യുതി ഉപയോഗിക്കുന്നതിനാൽ രാജ്യത്തെ വൈദ്യുതി ശൃംഖലയ്ക്ക് അധിക സമ്മർദ്ദം നേരിടേണ്ടിവരുമെന്ന് വിദഗ്ധർ മുന്നറിയിപ്പ് നൽകി.

ഓസ്ട്രേലിയയുടെ വൈദ്യുതി ആവശ്യകതയിൽ ഡാറ്റാ സെന്ററുകളുടെ പങ്ക് അടുത്ത ഏതാനും വർഷങ്ങൾക്കുള്ളിൽ ഗണ്യമായി വർധിക്കുമെന്നാണ് വിലയിരുത്തൽ. AI അടിസ്ഥാനമാക്കിയുള്ള സേവനങ്ങളുടെയും ക്ലൗഡ് കമ്പ്യൂട്ടിങ്ങിന്റെയും വളർച്ചയാണ് ഇതിന് പ്രധാന കാരണം. വൈദ്യുതി ഉപയോഗം വർധിക്കുന്ന സാഹചര്യത്തിൽ പുതിയ ഡാറ്റാ സെന്ററുകൾ പുനരുപയോഗ ഊർജ പദ്ധതികൾക്ക് പിന്തുണ നൽകുകയും ഗ്രിഡ് കണക്ഷൻ ചെലവുകൾ വഹിക്കുകയും വേണമെന്ന് ഫെഡറൽ സർക്കാർ നിർദേശിച്ചിട്ടുണ്ട്.

ഗാർട്നറിന്റെ കണക്കുകൾ പ്രകാരം, ആഗോളതലത്തിൽ ഡാറ്റാ സെന്ററുകളുടെ വൈദ്യുതി ആവശ്യകത 2026-ൽ 132 ഗിഗാവാട്ടിലെത്തും. ഓസ്ട്രേലിയയിൽ ഇത് ഏകദേശം 1.5 ഗിഗാവാട്ടാകുമെന്നാണ് പ്രതീക്ഷിക്കുന്നത്. 2025-ലെ 104 ഗിഗാവാട്ടിൽ നിന്ന് ആഗോള ആവശ്യകത 27 ശതമാനം ഉയരുമെന്നാണ് പ്രവചനം. അതേസമയം, ഓസ്ട്രേലിയയിൽ 1.1 ഗിഗാവാട്ടിൽ നിന്ന് 38.3 ശതമാനം വളർച്ചയോടെ 1.5 ഗിഗാവാട്ടിലെത്തും. 2030 ഓടെ ആഗോള ഡാറ്റാ സെന്റർ വൈദ്യുതി ആവശ്യകത 290 ഗിഗാവാട്ടിലേക്കും ഓസ്ട്രേലിയയിൽ 3.8 ഗിഗാവാട്ടിലേക്കും ഉയരുമെന്ന് റിപ്പോർട്ട് വ്യക്തമാക്കുന്നു.

വൈദ്യുതി ഉപഭോഗവും വേഗത്തിൽ വർധിക്കുകയാണ്. ലോകമെമ്പാടുമുള്ള ഡാറ്റാ സെന്ററുകളുടെ വൈദ്യുതി ഉപയോഗം 2025-ലെ 447 ടെറാവാട്ട് മണിക്കൂറിൽ നിന്ന് 2026-ൽ 565 ടെറാവാട്ട് മണിക്കൂറായി ഉയരുമെന്നാണ് കണക്ക്.

ഓസ്ട്രേലിയയിൽ ഡാറ്റാ സെന്ററുകളുടെ വൈദ്യുതി ഉപഭോഗം 2025-ലെ 4.5 ടെറാവാട്ട് മണിക്കൂറിൽ നിന്ന് 2026-ൽ 6.2 ടെറാവാട്ട് മണിക്കൂറായി ഉയരും. 2030-ഓടെ ഇത് 15.7 ടെറാവാട്ട് മണിക്കൂറിലെത്തുമെന്നാണ് പ്രവചനം.

AI സേവനങ്ങൾ പ്രവർത്തിപ്പിക്കാൻ ഉപയോഗിക്കുന്ന പ്രത്യേക AI-ഒപ്റ്റിമൈസ്ഡ് സർവറുകളാണ് ഈ വളർച്ചയ്ക്ക് പ്രധാന കാരണം. ഇവ സാധാരണ സർവറുകളേക്കാൾ കൂടുതൽ വൈദ്യുതി ഉപയോഗിക്കുന്നതിനാൽ വൈദ്യുതി ശൃംഖലയ്ക്കും കൂളിംഗ് സംവിധാനങ്ങൾക്കും കൂടുതൽ സമ്മർദ്ദം സൃഷ്ടിക്കുന്നു.

2026-ൽ ആഗോള ഡാറ്റാ സെന്റർ വൈദ്യുതി ഉപയോഗത്തിന്റെ 31 ശതമാനവും AI-ഒപ്റ്റിമൈസ്ഡ് സർവറുകളായിരിക്കും. ഓസ്ട്രേലിയയിൽ ഇത് 35.7 ശതമാനമാകുമെന്നും റിപ്പോർട്ട് പറയുന്നു.

2027-ഓടെ AI-ഒപ്റ്റിമൈസ്ഡ് സർവറുകളുടെ വൈദ്യുതി ഉപയോഗം പരമ്പരാഗത സർവറുകളെ മറികടക്കുമെന്നാണ് വിലയിരുത്തൽ. ഇത് ഡാറ്റാ സെന്ററുകളിലെ കമ്പ്യൂട്ടിംഗ് ആവശ്യകത എത്ര വേഗത്തിലാണ് മാറുന്നതെന്ന് വ്യക്തമാക്കുന്നു. വൈദ്യുതി ഉപയോഗം വർധിക്കുന്ന സാഹചര്യത്തിൽ, രാജ്യത്തെ ഊർജ ശൃംഖല ശക്തിപ്പെടുത്തുകയും കൂടുതൽ കാര്യക്ഷമമായ കൂളിംഗ് സംവിധാനങ്ങൾ വികസിപ്പിക്കുകയും ചെയ്യേണ്ടതുണ്ടെന്ന് വിദഗ്ധർ ചൂണ്ടിക്കാട്ടുന്നു.