ശിശുസംരക്ഷണ മേഖല ദേശീയസാൽക്കരിക്കേണ്ടതുണ്ടോ? ഓസ്‌ട്രേലിയ നേരിടുന്ന പ്രതിസന്ധിയും കാനഡയുടെ മാതൃകയും

മെൽബൺ: ഓസ്‌ട്രേലിയയിൽ സ്കൂൾ അവധിക്കാലമായ ഈ ആഴ്ചകളിൽ മാതാപിതാക്കൾ നേരിടുന്ന ഏറ്റവും വലിയ വെല്ലുവിളി കുട്ടികളെ നോക്കാനുള്ള 'ഔട്ട്‌സൈഡ് സ്കൂൾ അവേഴ്സ് കെയർ' (OSHC) ആണ്. ഈ മേഖലയിൽ നിലവിൽ സ്വകാര്യ നിക്ഷേപ സ്ഥാപനങ്ങളുടെ അമിതമായ ആധിപത്യമാണ് പ്രകടമാകുന്നത്. ക്യാമ്പ് ഓസ്‌ട്രേലിയ, ജൂനിയർ അഡ്വഞ്ചേഴ്സ് ഗ്രൂപ്പ് എന്നീ രണ്ട് പ്രമുഖ കമ്പനികൾ വിപണിയുടെ 20 ശതമാനവും കൈക്കലാക്കിയിരിക്കുകയാണ്. ബെയ്‌ൻ ക്യാപിറ്റൽ ക്വാഡ്രന്റ് പ്രൈവറ്റ് ഇക്വിറ്റി എന്നീ വൻകിട കമ്പനികളാണ് ഇവയുടെ ഉടമകൾ.

സ്വകാര്യ നിക്ഷേപകരുടെ താല്പര്യം:

സ്കൂൾ പരിസരത്ത് തന്നെ പ്രവർത്തിക്കുന്നതിനാൽ ഈ ബിസിനസിന് സ്വന്തമായി കെട്ടിടം വാങ്ങേണ്ട ആവശ്യമില്ല. വരുമാനത്തിന്റെ 10 മുതൽ 15 ശതമാനം വരെ സ്കൂളിന് നൽകിയാൽ മതിയാകും. ഒരിക്കൽ കരാർ ലഭിച്ചാൽ ആ സ്കൂളിൽ ഇവർക്ക് കുത്തകാവകാശം ലഭിക്കുന്നു. ജോലിക്ക് പോകേണ്ട മാതാപിതാക്കൾക്ക് മറ്റ് വഴികളില്ലാത്തതിനാൽ ഇത്തരം സ്വകാര്യ കമ്പനികളെ ആശ്രയിക്കാൻ നിർബന്ധിതരാകുന്നു.

നിലവിലെ അവസ്ഥയും പ്രശ്നങ്ങളും:

അമിതമായ ചിലവ്: അഞ്ച് വയസ്സിൽ താഴെയുള്ള കുട്ടികളുടെ വിദ്യാഭ്യാസവും സംരക്ഷണവും ഏതാണ്ട് പൂർണ്ണമായും സ്വകാര്യ മേഖലയിലാണ്. ഇതിൽ 70 ശതമാനവും ലാഭലക്ഷ്യത്തോടെ പ്രവർത്തിക്കുന്നവയാണ്.

സബ്‌സിഡി രീതി: ഫെഡറൽ സർക്കാർ മാതാപിതാക്കൾക്ക് നേരിട്ടാണ് സബ്‌സിഡി നൽകുന്നത് (വൗച്ചർ സിസ്റ്റം). ഇത് വരുമാനത്തിന് അനുസരിച്ചായതിനാൽ (Means tested), ഉയർന്ന വരുമാനമുള്ളവർക്ക് വലിയ തുക സ്വന്തം പോക്കറ്റിൽ നിന്ന് നൽകേണ്ടി വരുന്നു.

വീട് വിലയുമായുള്ള ബന്ധം: കഴിഞ്ഞ 25 വർഷത്തിനിടെ വീട് വില കുതിച്ചുയർന്നതും ശിശുസംരക്ഷണ ചിലവ് വർദ്ധിച്ചതും ഓസ്‌ട്രേലിയയിലെ യുവതലമുറയെ കടുത്ത സാമ്പത്തിക സമ്മർദ്ദത്തിലാക്കുന്നു. മോർട്ട്‌ഗേജ് തിരിച്ചടയ്ക്കാൻ ദമ്പതികൾ രണ്ടുപേരും ജോലി ചെയ്യേണ്ടി വരുന്നതും അതേസമയം കുട്ടികളെ നോക്കാൻ വൻതുക ചിലവാക്കേണ്ടി വരുന്നതും പ്രതിസന്ധി രൂക്ഷമാക്കുന്നു.

പരിഹാര മാർഗ്ഗങ്ങൾ:

ഈ മേഖലയെ ദേശീയസാൽക്കരിക്കണമെന്ന നിർദ്ദേശത്തിന് വലിയ പിന്തുണ ലഭിക്കുന്നുണ്ടെങ്കിലും പ്രായോഗികമായി അത് നടപ്പിലാക്കാൻ ബുദ്ധിമുട്ടാണ്. സർക്കാർ നിയന്ത്രിക്കുന്ന സെന്ററുകൾ സ്വകാര്യ സെന്ററുകളേക്കാൾ ഗുണമേന്മയുള്ളതും ചിലവ് കുറഞ്ഞതുമാണെന്ന് കണക്കുകൾ സൂചിപ്പിക്കുന്നു. കാനഡ നടപ്പിലാക്കിയ 'പ്രതിദിനം 10 ഡോളർ' (10-a-day) എന്ന മാതൃക ഓസ്‌ട്രേലിയയ്ക്ക് പരീക്ഷിക്കാവുന്നതാണ്. അവിടെ സർക്കാർ പണം നൽകുന്നത് മാതാപിതാക്കൾക്കല്ല, മറിച്ച് ശിശുസംരക്ഷണ കേന്ദ്രങ്ങൾക്കാണ്. ഇതിന് പകരമായി സെന്ററുകൾ ഫീസ് കുറയ്ക്കുകയും ഗുണനിലവാരം ഉറപ്പാക്കുകയും വേണം. ഈ രീതിയിലൂടെ ശിശുസംരക്ഷണ മേഖലയിൽ സർക്കാരിന് കൂടുതൽ നിയന്ത്രണവും സുതാര്യതയും കൊണ്ടുവരാൻ സാധിക്കും.