ഓസ്‌ട്രേലിയയിലെ പ്രമുഖ ബാങ്കുകളിലൊന്നായ വെസ്റ്റ്പാക്കിന്റെ ഓൺലൈൻ ബാങ്കിങ് സേവനങ്ങൾ തകരാറിലായതോടെ ആയിരക്കണക്കിന് ഉപഭോക്താക്കൾക്ക് പണം ഇടപാടുകൾ നടത്താനാകാതെ ബുദ്ധിമുട്ട് നേരിട്ടു. ചൊവ്വാഴ്ച ബാങ്കിന്റെ മൊബൈൽ ആപ്പ്, ഓൺലൈൻ ബാങ്കിങ്, PayID, Osko പേയ്‌മെന്റ് സംവിധാനങ്ങൾ എന്നിവ ഉപയോഗിക്കുന്നതിൽ ചില ഉപഭോക്താക്കൾക്ക് തടസ്സം നേരിട്ടതായി വെസ്റ്റ്പാക് സമൂഹമാധ്യമങ്ങളിലൂടെ അറിയിച്ചു. ചൊവ്വാഴ്ച രാത്രി 11.45 വരെയും സേവനങ്ങൾ പുനഃസ്ഥാപിക്കപ്പെട്ടിരുന്നില്ല. പ്രശ്നം പരിഹരിക്കാൻ സാങ്കേതിക സംഘങ്ങൾ പ്രവർത്തിച്ചുവരികയാണെന്നും ബാങ്ക് അറിയിച്ചു. ഉപഭോക്തൃ സേവന കേന്ദ്രങ്ങളിലെ ഫോൺ കാത്തിരിപ്പ് സമയം സാധാരണയേക്കാൾ കൂടുതലാണെന്നും ബാങ്ക് വക്താവ് വ്യക്തമാക്കി.
ചൊവ്വാഴ്ച ഉച്ചയോടെ തന്നെ ആയിരക്കണക്കിന് ഉപഭോക്താക്കൾക്ക് പ്രശ്നങ്ങൾ നേരിട്ടതായി ഡൗൺ ഡിറ്റക്ടർ റിപ്പോർട്ട് ചെയ്തു. മണിക്കൂറുകളോളം തടസ്സം തുടർന്നതോടെ ഉപഭോക്താക്കൾ സമൂഹമാധ്യമങ്ങളിൽ പരാതികളുമായി രംഗത്തെത്തി. നേരിട്ടുള്ള ഡെബിറ്റ് പേയ്‌മെന്റുകൾ നടത്താനും കടകളിൽനിന്ന് സാധനങ്ങൾ വാങ്ങാനും കഴിയുന്നില്ലെന്ന് പലരും അറിയിച്ചു. പണം കൈവശമുണ്ടായിട്ടും ചെക്ക്ഔട്ടിൽ പണമടയ്ക്കാൻ കഴിയാതെ കുടുങ്ങിയെന്ന് ഒരാൾ പ്രതികരിച്ചു. കാറിൽ ഇന്ധനം നിറയ്ക്കാൻ തന്റെ മകൾക്ക് പണം നൽകാൻ കഴിഞ്ഞില്ലെന്ന് മറ്റൊരാളും കുറിച്ചു.
ഉപഭോക്താക്കൾക്കുണ്ടായ ബുദ്ധിമുട്ടിൽ വെസ്റ്റ്പാക് ക്ഷമാപണം നടത്തി. സേവനങ്ങൾ എത്രയും വേഗം പുനഃസ്ഥാപിക്കാൻ ശ്രമിക്കുകയാണെന്നും കൂടുതൽ വിവരങ്ങൾ സമൂഹമാധ്യമങ്ങളിലൂടെ അറിയിക്കുമെന്നും ബാങ്ക് വ്യക്തമാക്കി. തകരാറുമായി ബന്ധപ്പെട്ട അടുത്ത അറിയിപ്പ് ബുധനാഴ്ച രാവിലെ ആറിന് നൽകുമെന്നും ബാങ്ക് അറിയിച്ചു.