എൽ നിനോ പ്രതിഭാസം രൂപപ്പെടുന്നതായി മുന്നറിയിപ്പ്

പസഫിക് സമുദ്രത്തിലെ ജലതാപനില നിർണായക പരിധിയിലെത്തിയതോടെ എൽ നിനോ കാലാവസ്ഥാ പ്രതിഭാസം രൂപപ്പെടാനുള്ള സാധ്യത വർധിച്ചതായി വിദഗ്ധർ അറിയിച്ചു. ഓസ്ട്രേലിയയിൽ എൽ നിനോ പ്രഖ്യാപിക്കുന്നതിന് സമുദ്ര താപനില ശരാശരിയേക്കാൾ 0.8 ഡിഗ്രി സെൽഷ്യസ് അല്ലെങ്കിൽ അതിലധികം ഉയർന്നിരിക്കണം. ഇത് അമേരിക്ക ഉപയോഗിക്കുന്ന 0.5 ഡിഗ്രി സെൽഷ്യസ് പരിധിയേക്കാൾ കൂടുതലാണ്. എന്നാൽ താപനില ഈ പരിധിയിലെത്തിയെന്നത് മാത്രം എൽ നിനോ ആരംഭിച്ചുവെന്നോ അത് ഉറപ്പാണെന്നോ അർഥമാക്കുന്നില്ല. കാലാവസ്ഥാ ഏജൻസികൾ എൽ നിനോ പ്രഖ്യാപിക്കാൻ, ശരാശരിയേക്കാൾ ഉയർന്ന താപനില തുടർച്ചയായി നിരവധി മാസങ്ങൾ നിലനിൽക്കണം. ഇത്തരത്തിലുള്ള പ്രതിഭാസങ്ങൾ അളക്കുന്നതിന് അന്താരാഷ്ട്രതലത്തിൽ ഏകീകൃത മാനദണ്ഡമില്ലാത്തതിനാൽ വിവിധ രാജ്യങ്ങളിലെ കാലാവസ്ഥാ ഏജൻസികൾ വ്യത്യസ്ത രീതികളാണ് പിന്തുടരുന്നത്.

ഓസ്ട്രേലിയൻ ബ്യൂറോ ഓഫ് മെറ്റിയറോളജി (BoM) പ്രകാരം, പസഫിക്കിലെ താപനില എൽ നിനോ രൂപപ്പെടാൻ ആവശ്യമായ പരിധിക്ക് മുകളിലെത്തിയിട്ടുണ്ട്. ലോക കാലാവസ്ഥാ സംഘടന (WMO) ജൂൺ മുതൽ ഓഗസ്റ്റ് വരെയുള്ള കാലയളവിൽ എൽ നിനോ രൂപപ്പെടാൻ 80 ശതമാനം സാധ്യതയുണ്ടെന്നും നവംബർ വരെ ഇത് തുടരാൻ 90 ശതമാനം സാധ്യതയുണ്ടെന്നും അറിയിച്ചു. എൽ നിനോ രൂപപ്പെട്ടാൽ ഓസ്ട്രേലിയയിൽ ചൂടേറിയതും വരണ്ടതുമായ കാലാവസ്ഥയ്ക്കും മഴക്കുറവിനും സാധ്യതയുണ്ട്. ഇത് വരൾച്ചയുടെയും കാട്ടുതീയുടെയും അപകടസാധ്യത വർധിപ്പിക്കുമെന്നും വിദഗ്ധർ മുന്നറിയിപ്പ് നൽകി.