ഗ്രീൻസ് പാർട്ടിയുടെ പുതിയ നേതാവായി തിരഞ്ഞെടുക്കപ്പെട്ട ഡേവിഡ് ഷൂബ്രിഡ്ജ്, മുൻ ഡെപ്യൂട്ടി നേതാവ് മെഹ്‌റീൻ ഫറൂഖിയുടെ പ്രതികരണത്തിൽ വിശദീകരണവുമായി രംഗത്തെത്തി. പാർട്ടി നേതൃത്വസംഘത്തിന് പുറത്തുനിന്ന് പ്രവർത്തിക്കുന്നതാണ് ആഗോളതലത്തിലെ പ്രധാന വിഷയങ്ങളിൽ കൂടുതൽ ഫലപ്രദമായി ഇടപെടാൻ കഴിയുന്ന വഴിയെന്ന് ഫറൂഖി പറഞ്ഞിരുന്നു. സംഘർഷം, വംശഹത്യ, വംശീയത, കാലാവസ്ഥാ വ്യതിയാനം, ജീവിതച്ചെലവ് തുടങ്ങിയ വിഷയങ്ങളിൽ പ്രവർത്തിക്കേണ്ടതുണ്ടെന്നും അവർ വ്യക്തമാക്കി.
ഗ്രീൻസ് നേതൃസ്ഥാനത്തേക്ക് മത്സരിച്ച ഫറൂഖി ഡെപ്യൂട്ടി നേതൃസ്ഥാനത്തേക്ക് മത്സരിച്ചിരുന്നില്ല. നേതൃത്വസംഘത്തിന്റെ നിയന്ത്രണങ്ങൾക്ക് പുറത്തുനിന്നാണ് ഇത്തരം വിഷയങ്ങളിൽ തനിക്ക് കൂടുതൽ ഫലപ്രദമായി പ്രവർത്തിക്കാൻ കഴിയുകയെന്ന് അവർ ഇൻസ്റ്റഗ്രാമിൽ കുറിച്ചിരുന്നു. ഫറൂഖി തന്നോടൊപ്പം പ്രവർത്തിക്കാൻ ആഗ്രഹിക്കുന്നില്ലെന്നാണോ ഇതിലൂടെ വ്യക്തമാകുന്നതെന്ന എബിസി അവതാരക മെലിസ ക്ലാർക്കിന്റെ ചോദ്യത്തിന് ഷൂബ്രിഡ്ജ് വിയോജിച്ചു. ഗ്രീൻസ് പാർട്ടിയുടെ പ്രത്യേകത, പാർലമെന്ററി ടീമിലെ മിക്ക അംഗങ്ങൾക്കും പ്രധാനപ്പെട്ട ചുമതലകളും വിവിധ വിഷയങ്ങളിൽ പ്രവർത്തിക്കാനുള്ള ഉത്തരവാദിത്വവും ഉണ്ടെന്നതാണെന്ന് ഷൂബ്രിഡ്ജ് പറഞ്ഞു. ഫറൂഖിക്ക് താൽപര്യവും കഴിവുമുള്ള വിഷയങ്ങളിൽ അവർ കൂടുതൽ സജീവമായി പ്രവർത്തിക്കുന്നത് പ്രതീക്ഷിക്കുന്നതായും ഷൂബ്രിഡ്ജ് വ്യക്തമാക്കി.