ഗുങ്ഗാഹ്ലിൻ ഡ്രൈവിലുണ്ടായ വാഹനാപകടത്തിൽ മരിച്ച രണ്ട് സൈക്കിൾ യാത്രികരെ അനുസ്മരിക്കാൻ നൂറുകണക്കിന് സൈക്കിൾ യാത്രികർ കാൻബറയിൽ ഒത്തുകൂടി. ഓഗസ്റ്റ് 27ന് രാവിലെ 6.20ഓടെ പാമർസ്റ്റണിൽ മൂന്ന് പേരോടൊപ്പം സൈക്കിൾ യാത്ര നടത്തുന്നതിനിടെ ബ്രിഡി ലീ (32), റയാൻ റീത്ത്മുള്ളർ (39) എന്നിവർ നീല ഹ്യുണ്ടായ് ആക്സന്റ് കാറിടിച്ച് അപകടത്തിൽപ്പെടുകയായിരുന്നു. ലീ സംഭവസ്ഥലത്തുവെച്ച് മരിച്ചു. ഗുരുതരമായി പരിക്കേറ്റ റയാൻ ദിവസങ്ങൾക്കുശേഷം ആശുപത്രിയിൽ മരിച്ചു. അടിയന്തര സേവനങ്ങൾ എത്തുന്നതിന് മുമ്പ് ഡ്യൂട്ടിയിലല്ലാതിരുന്ന ഒരു നഴ്സും പൊലീസ് ഉദ്യോഗസ്ഥനും ഉൾപ്പെടെയുള്ളവർ പരിക്കേറ്റ സൈക്കിൾ യാത്രികർക്ക് സഹായം നൽകി.
ACTയിലെ ട്രയാത്ത്ലോൺ സമൂഹത്തിലെ അംഗങ്ങളായിരുന്ന ഇരുവരും Canberra Bilbys Triathlon Club അംഗങ്ങളായിരുന്നു. അപകടം സമൂഹത്തെ ഞെട്ടിച്ച സംഭവമായിരുന്നെന്ന് ക്ലബ് അധികൃതർ പറഞ്ഞു. അപകടത്തിന് പിന്നാലെ വാഹനമോടിച്ച 40കാരി അന്വേഷണവുമായി സഹകരിക്കുന്നതായി പൊലീസ് അറിയിച്ചു. സംഭവത്തിൽ ഇതുവരെ ആരെയും പ്രതിചേർത്തിട്ടില്ല.
അതേസമയം ഇരുവരുടെയും സ്മരണയ്ക്കായി സംഘടിപ്പിച്ച റൈഡിൽ നൂറുകണക്കിന് പേർ പങ്കെടുത്തു. ദുഃഖിക്കുന്ന കുടുംബങ്ങൾക്കും സുഹൃത്തുക്കൾക്കും പിന്തുണ നൽകുന്നതിനൊപ്പം, റോഡിൽ സൈക്കിൾ യാത്ര തുടരാനുള്ള ആത്മവിശ്വാസം സമൂഹത്തിന് തിരികെ നൽകുകയെന്ന ലക്ഷ്യവും പരിപാടിക്കുണ്ടായിരുന്നുവെന്ന് ക്ലബ് സെക്രട്ടറി കാറ്റി ബിൻസ്റ്റോക്ക് പറഞ്ഞു. അപകടത്തിന് ശേഷമുള്ള ആദ്യ ആഴ്ചയിൽ പതിവ് പ്രഭാത സൈക്കിൾ യാത്രയിൽ ഒരാൾ മാത്രമാണ് പങ്കെടുത്തതെന്നും റോഡിലേക്ക് മടങ്ങാൻ പലർക്കും ഭയമുണ്ടായിരുന്നെന്നും അവർ പറഞ്ഞു. ട്രയാത്ത്ലോൺ, സൈക്കിൾ സമൂഹങ്ങൾ തമ്മിലുള്ള ശക്തമായ ബന്ധമാണ് സ്മരണാ റൈഡിലെ പങ്കാളിത്തം വ്യക്തമാക്കുന്നതെന്ന് ACT Triathlon പ്രസിഡന്റ് ലാറ ലിവർ പറഞ്ഞു. റോഡിൽ സൈക്കിൾ യാത്രികരും വാഹനങ്ങളും പരസ്പരം കൂടുതൽ ശ്രദ്ധയും സുരക്ഷിതമായ അകലവും പാലിക്കണമെന്നും അവർ ആവശ്യപ്പെട്ടു. ബ്രിഡിയും റയാനും സൗഹൃദപരവും തമാശക്കാരും മറ്റുള്ളവരെ പിന്തുണച്ചിരുന്നവരുമായിരുന്നുവെന്ന് സുഹൃത്തുക്കൾ അനുസ്മരിച്ചു. സമൂഹത്തിലെ നിരവധി പേരെ ട്രയാത്ത്ലോണിലേക്ക് ആകർഷിക്കാൻ ഇരുവരും പ്രചോദനമായിരുന്നുവെന്നും ക്ലബ് അംഗങ്ങൾ പറഞ്ഞു.