കാൻബറ: ജാമ്യവ്യവസ്ഥകൾ ലംഘിച്ചെന്ന ആരോപണത്തെ തുടർന്ന് ഫെഡറൽ ലേബർ എംപി ലൂക്ക് ഗോസ്ലിംഗ് ആൽബനീസ് സർക്കാരിലെ പ്രത്യേക ദൂതൻ പദവിയിൽ നിന്ന് താൽക്കാലികമായി മാറി. പ്രതിരോധം, വെറ്ററൻസ് അഫയേഴ്സ്, നോർത്ത് ഓസ്ട്രേലിയ എന്നിവയുടെ പ്രത്യേക ദൂതനായിരുന്നു ഗോസ്ലിംഗ്. ജാമ്യവ്യവസ്ഥ ലംഘിച്ചെന്ന ആരോപണവും ആക്രമണക്കേസും കോടതിയുടെ പരിഗണനയിലിരിക്കുന്ന സാഹചര്യത്തിൽ, സർക്കാർ പ്രവർത്തനങ്ങൾക്ക് ഉണ്ടാകുന്ന ശ്രദ്ധതിരിച്ചിലും മാധ്യമശ്രദ്ധയും ഒഴിവാക്കുന്നതിനാണ് താൽക്കാലികമായി പദവിയിൽ നിന്ന് മാറുന്നതെന്ന് അദ്ദേഹം ബുധനാഴ്ച പ്രസ്താവനയിൽ പറഞ്ഞു. തനിക്കെതിരെ ഉയർന്നിരിക്കുന്ന എല്ലാ ആരോപണങ്ങളും പൂർണമായും നിഷേധിക്കുന്നതായി ഗോസ്ലിംഗ് വ്യക്തമാക്കി. കേസുകൾ കോടതിയിൽ ശക്തമായി പ്രതിരോധിക്കുമെന്നും അദ്ദേഹം പറഞ്ഞു.
54കാരനായ ഗോസ്ലിംഗിനെ കഴിഞ്ഞ മാസം നോർത്ത് ടെറിട്ടറി അഡ്മിനിസ്ട്രേറ്റർ ഡേവിഡ് കൊണോളിയെ ആക്രമിച്ചെന്നാരോപിച്ച് അറസ്റ്റ് ചെയ്തിരുന്നു. ജൂലൈ 18ന് ഡാർവിനിൽ നടന്ന NT Thailand Grand Festival-നിടെ കൊണോളിയെ കൈമുട്ടുകൊണ്ട് ഇടിച്ചെന്നാണ് ആരോപണം. സംഭവത്തെ തുടർന്ന് ഗോസ്ലിംഗിനെതിരെ രണ്ട് ആക്രമണക്കേസുകൾ ചുമത്തി. പിന്നീട് ജാമ്യത്തിൽ വിട്ടയച്ച അദ്ദേഹം ജൂലൈ 31ന് Darwin Local Court-ൽ ജാമ്യവ്യവസ്ഥകളിൽ മാറ്റം ആവശ്യപ്പെട്ടിരുന്നു. എന്നാൽ ഓഗസ്റ്റ് 14ന് ഗോസ്ലിംഗ് ജാമ്യവ്യവസ്ഥ ലംഘിച്ചെന്നാണ് നോർത്ത് ടെറിട്ടറി പൊലീസ് ആരോപിക്കുന്നത്. ആരോപിക്കപ്പെടുന്ന ലംഘനത്തിന്റെ കൃത്യമായ സ്വഭാവം പൊലീസ് പുറത്തുവിട്ടിട്ടില്ല.
ചൊവ്വാഴ്ച ഗോസ്ലിംഗിനെതിരെ ജാമ്യവ്യവസ്ഥ ലംഘിച്ചെന്ന ഒരു കുറ്റം കൂടി ചുമത്തി കോടതി സമൻസ് നൽകി. സെപ്റ്റംബർ 30ന് അദ്ദേഹം വീണ്ടും കോടതിയിൽ ഹാജരാകണം. ആക്രമണക്കേസിലെ ആരോപണങ്ങളും ഗോസ്ലിംഗ് ശക്തമായി നിഷേധിച്ചിട്ടുണ്ട്. അദ്ദേഹത്തിന്റെ അഭിഭാഷകൻ മാർട്ടി ഓസ്റ്റും പൊലീസിന്റെ നടപടിയെ വിമർശിച്ചു. ഹാജരാകാനുള്ള നോട്ടീസ് നൽകുന്നതിന് പകരം എംപിയെ അറസ്റ്റ് ചെയ്തത് എന്തുകൊണ്ടാണെന്ന് അദ്ദേഹം ചോദ്യം ചെയ്തിരുന്നു. പ്രതിപക്ഷ നേതാക്കളിൽ ചിലർ ഗോസ്ലിംഗിനെ പദവിയിൽ നിന്ന് മാറ്റണമെന്ന് ആവശ്യപ്പെട്ടിരുന്നെങ്കിലും, കേസ് കോടതിയിൽ പരിഗണനയിലിരിക്കെ പ്രത്യേക ദൂതൻ പദവിയിൽ തുടരാനായിരുന്നു അദ്ദേഹത്തിന്റെ നേരത്തെയുള്ള തീരുമാനം. എന്നാൽ പുതിയ ജാമ്യലംഘന ആരോപണത്തെ തുടർന്നാണ് ഇപ്പോൾ പദവിയിൽ നിന്ന് താൽക്കാലികമായി മാറാൻ ഗോസ്ലിംഗ് തീരുമാനിച്ചിരിക്കുന്നത്.